nahin hai ashk se ye KHun-e-nab aankhon mein

nahin hai ashk se ye khun-e-nab aankhon mein
bhara hai rang se tere shahab aankhon mein
kahan nikal sake aansu nazar ko jae nahin
rakha hun shakl ko teri main dab aankhon mein
uluhi kis ki tajalli se ho gaya hun do-chaar
jhamak raha hai sada mahtab aankhon mein
hue hain jab se wo kaif-e-nigah ke aaina-dar
bajae ashk bhari hai sharab aankhon mein
amal se apni zaban kis tarah na ho be-kar
jahan ho rasm sawal-o-jawab aankhon mein
hua hun jab se main itlaq us ke se aagah
jahan main dekhun hai wan bu-turab aankhon mein

lab-e-jaan-baKHsh ke miThe ka tere jo maza paya

lab-e-jaan-bakhsh ke mithe ka tere jo maza paya
to chashma zindagi ka apni labrez-e-baqa paya
na hoe kyun ba-sad jaan dil mera maftun tera jaanan
ki har jalwe mein tere yak karishma main juda paya
do-baala kyun na ho nashsha dil-e-hairan ki hairat ka
jo tujh ko sab mein aur tere mein sab ko barmala paya
teri ek gadish-e-mizgan se yun be-tab-o-taqat hun
na kah sakta hun kuchh gar koi puchhe tu ne kya paya
na duniya us mein rah pawe na uqba us ko phailawe
dil-e-'agah' ke kausar mein jin ne inziwa paya

dil mein dildar nihan tha mujhe malum na tha

dil mein dildar nihan tha mujhe malum na tha
idhar-udhar mein dawan tha mujhe malum na tha
sar-ba-sar anfus-o-afaq mein hai us ka zuhur
parda us rukh ka ayan tha mujhe malum na tha
sahal samjha tha main haalan ki ye ishq-e-zalim
waqf khunin-jigran ka tha mujhe malum na tha
baad muddat dil-e-gumrah se main ne jo mila
kaha ro ro ke kahan tha mujhe malum na tha
mashrab-e-ashiq-e-be-nam-o-nishan main 'agah'
la-makan ain makan tha mujhe malum na tha

dil ko le ji ko ab lubhate ho

dil ko le ji ko ab lubhate ho
is liye ban bana ke aate ho
ishq bin hum to kuchh gunah na kiya
be-gunahon ko kyun satate ho
koi aisa moamla na suna
na to aate ho na bulate ho
bawajud is jafa ke pyare tum
kis qadar mere man ko bhate ho
hum to awwal se mast hain 'agah'
phir tarane ye kyun sunate ho