KHauf

By

sae sae jale jale khamoshi khamoshi si
tuti tuti uljhi uljhi be-khwabi be-khwabi si
harfon se bachta bachta mani se chhupta chhupta
rangon mein duba duba sanson mein ubhra ubhra
zarron mein chamka chamka lahron mein sahma sahma
tez hawa ke jhonkon mein ruk ruk kar udta udta
nashtar zahr mohabbat dard khun ke ek ek qatre mein
rah rah kar chubhta chubhta
kya hai ye
kaun hai ye
aansu ret bane kaise palkon pe chamke kaise
har manzil par lahraata hai kab se zard pharera kaun
tute aadarshon ke shishe ginta hai wo baitha kaun
mere har izhaar mein pinhan be-mani khamosh kyun
mere thak ke so jaane mein khwabon mein bechaini kyun
mere baam se ud jata hai qatra qatra nasha kyun
ye roz-o-shab sare lamhe nanhe nanhe tukde tukde
rag rag mein paiwast hue khun bane dard bane
ek muddat se subh-e-azal se
meri ruh mein kaun chhupa hai
kaun chhupa hai

ye raat

By

sitare chup hain ki chalti hai tez tez hawa
ye raat apni mohabbat ki raat bhi to nahin
faza mein yaadon ke jugnu chamak rahe hain abhi
hasin yaadon ko lekin sabaat bhi to nahin
gham-e-hayat se manus ho chala hai dil
nae nae hi sahi sanehat bhi to nahin
badal ke rakh den jo lail-o-nahaar duniya ke
abhi hayat ke wo hadsat bhi to nahin
wahi hai khun-e-tamanna wahi hai hasrat-e-gham
ye maut bhi to nahin hai hayat bhi to nahin
ye raat johd-e-musalsal ki ek raat sahi
tabahiyon ko liye bar bar guzregi
koi batae kahan tak ki zindagi ki ye raat
fasurda guzri hai aur sogwar guzregi
abhi to roz yahi fikr hai jien kaise
abhi to raat yunhi be-qarar guzregi
sukun-e-dil ke liye aaj bhi yaqin sa hai
yahi chaman se khizan sharmsar guzregi
nae charagh jalaen umid-e-farda se
kabhi to wadi-e-gham se bahaar guzregi
ye raat ek nai yaadgar lai hai
saja ke zakhmon ke phulon ka haar lai hai

usne kaha!

By

sae badhne lage aur jaise kahin raat hui
der tak baithe rahe aankhon mein aankhen dale
phir dil-e-zar ne chupke se unhen chum liya
hont tharrae ki kis tarah ki ye baat hui
pyari aankhon ne kaha hum to bahut hain makhmur
koi nashad rahe hum to abhi hain masrur
zehn-e-shaer bhi takhayyul mein zara jhum liya
baat utni hi hui thi ki wo aankhen bolin
bar-ha tum ne hamari hi qasam khai hai
sach kaho jurat-e-dil kaise kahan pai hai
hum pe sadqe kiya karte ho dil-o-jaan lekin
raaz hain kaun se pinhan ye samajhte bhi ho!
kis tarah tum se karen ahd-e-wafa ki baaten
ajnabi hota hai mehman ye samajhte bhi ho!
dubne lagte ho jab yas ki gahrai mein
bekasi hum se tumhaari nahin dekhi jati!
jam pe jam chadhate ho ki gham kuchh bhi nahin
be-khudi hum se tumhaari nahin dekhi jati!
kyun kaha karte ho duniya hai ye hum kuchh bhi nahin
aise lamhon mein bhala kis ne sambhaala hai kaho
gham-kade se tumhein kis tarah nikala hai kaho!
apne sine mein bhi jazbaat ke tufan hain magar
hum tumhaari hi tarah be-sar-o-saman hain magar
husn ke aaj har ek gam pe saudai hain
apni nazren bhi to ab bais-e-ruswai hain
zehn-e-shaer ne ye baaten bhi sunin kuchh na kaha
hath khud badh ke nai tarah se hathon se mile
aankhon aankhon mein mohabbat ki nai baat hui
sae badhne lage aur jaise kahin raat hui

TuTe shishe ki aaKHiri nazm

By

tute shishe ki aakhiri nazm
bhagte waqt ko main aaj pakad laya hun
ye mera waqt mere zehn ki takhliq sahi
raat aur din ke tasalsul ko pareshan kar ke
main ne lamhat ko ek rup diya
subh ko raat ki zanjir se aazad kiya
khwab-o-bedi ki diwar gira di main ne
zindagi maut se kab tak yun hirasan rahti
kya hua waqt o haqiqat ka zawal
main
apni tuti hui zanjir kahan dafn karun
har taraf qabren mujawir hain
dewtaon ke muqaddas ajsam
har jagah dafn hain
koi virana nahin dur talak
kya mujhe apne hi zehn ke is goshe mein
tute aadarshon ke aaine mein
waqt ke aks ko dafnana hai

saza

By

bhul jaana unhen aasan hai ai dil
tu ne pahle bhi kai bar qasam khai hai
dard jab had se badha zabt ka yara na raha
un ki ek ek ada yaad mujhe aai hai
wo tabassum mein nihan tanz ke mithe nashtar
wo takallum mein taghaful ko chhupane ki ada
ruk ke har lamha nai tarah se aaghaz-e-sitam
jaise kuchh kho ke kisi chiz ko pane ki ada
meri khamoshi pe bebak-nigahi un ki
jazba-e-shauq ko kuchh aur badhane ki ada
wo musalsal meri baaton pe tawajjoh ki nazar
rukh pe machli hui zulfon ko hatane ki ada
mere ashaar ko sunte hi wo aankhon mein ghurur
mujh ko har tarah se diwana banane ki ada
be-khudi dekh ke meri wahi begana-rawi
pas aa aa ke bahut dur wo jaane ki ada
rukhsati lamhon mein honton pe duaon ka guman
dar pe ruk kar meri khatir se wo jaane ki ada
aaj rah rah ke tadapta hun nai baat hai kya
dil ne kyun tark-e-mohabbat ki qasam khai hai
wo sitam lakh karen un ka to shewa hai yahi
ishq ki tark-e-mohabbat mein bhi ruswai hai
ab to jalte hue jina hi padega ai dil
tu ne khud apne kiye ki ye saza pai hai

ret aur dard

By

muddaten guzrin mere dil ko hue virana
aandhiyan bhi nahin aatin
ki ude ret mite naqsh-e-sarab
aur ek dard ka chashma
mundamil zakhmon se phute nai khunki le kar
pyas jag utthe sukut-e-dil-e-muztar tute
taki main dekh sakun
apni be-khwab si aankhon se wo manzar ek din
ret ke tode fazaon mein ude jate hain
aur khush ho ke kahun
zindagi ret sahi dard ka chashma bhi to hai