ai kahkashan-nawaz muqaddar ujal de

By

ai kahkashan-nawaz muqaddar ujal de
meri taraf bhi ek sitara uchhaal de
hum pure aaftab ke qabil nahin agar
thodi si pili dhup hi aankhon mein dal de
han kahte kahte gung na ho jae dil kahin
yarab meri zaban ko tab-e-sawal de
rogi hua hai dhup ko tarsa hua badan
ai mamta suput ko ghar se nikal de
koi to doston se mere dosti kare
koi to mehrban ho balaon ko tal de
tu lafz-gar to hai tujhe shair kahenge jab
ek be-zaban harf ko naghme mein dhaal de
bijli ka tir jaise dhanak ki kaman mein
kya aur is shabab ki koi misal de
'baqar' is aaftab mein jauhar hai is qadar
aa jae josh mein to samundar ubaal de

dawa baghair koi tifl mar gaya to kya hua

By

dawa baghair koi tifl mar gaya to kya hua
bas ek phul hi to tha bikhar gaya to kya hua
kabhi kabhi to raushni bhi ek azab-e-jaan hui
wo chandni se teri kokh bhar gaya to kya hua
na raat hi sanwar gai na raushni hi mar gai
andheri bauli mein chand utar gaya to kya hua
kamal jugnuon ka tha ki raushni mein kho gae
fareb apne sae hi se dar gaya to kya hua
mere liye to khwab ek chashma-e-hayat tha
kisi ko khwab khwab tha bikhar gaya to kya hua
guzarte mausamon ke qafile to raundte rahe
gharib koi sahn se guzar gaya to kya hua
na main koi sawar hun na koi mal-dar hun
udhar raha to kya hua idhar gaya to kya hua