wo nazar aaina-fitrat hi sahi

By

wo nazar aaina-fitrat hi sahi
mujhe hairat hai to hairat hi sahi
zindagi dagh-e-mohabbat hi sahi
aap se dur ki nisbat hi sahi
tum na chaho to nahin kat sakti
ek lamhe ki masafat hi sahi
dil mohabbat ki ada chahta hai
ek aansu dam-e-rukhsat hi sahi
aab-e-haiwan bhi nahin mujh pe haram
zahr ki mujh ko zarurat hi sahi
apni taqdir mein sannata hai
ek hangame ki hasrat hi sahi
is qadar shor-e-tarab kya mani
jagne ki mujhe aadat hi sahi
bazm-e-rindan se talluq kaisa
aap ki mez pe sharbat hi sahi
hadd-e-manzil hai muqarrar 'baqi'
rahraw-e-shauq ko ujlat hi sahi

teri nigah ka andaz kya nazar aaya

By

teri nigah ka andaz kya nazar aaya
darakht se hamein saya juda nazar aaya
bahut qarib se aawaz ek aai thi
magar chale to bada fasla nazar aaya
ye raste ki lakiren bhi gum na ho jaen
wo jhadiyon ka naya silsila nazar aaya
ye raushni ki kiran hai ki aag ka shoala
har ek ghar mujhe jalta hua nazar aaya
kali kali ki sada gunjne lagi dil mein
jahan bhi koi chaman-ashna nazar aaya
suno to kis liye patthar uthae phirte ho
kaho to aaina-khane mein kya nazar aaya
ye dopahar ye pighalti hui sadak 'baqi'
har ek shakhs phisalta hua nazar aaya

rang-e-dil rang-e-nazar yaad aaya

By

rang-e-dil rang-e-nazar yaad aaya
tere jalwon ka asar yaad aaya
wo nazar ban gai paigham-e-hayat
halqa-e-sham-o-sahar yaad aaya
ye zamana ye dil-e-diwana
rishta-e-sang-o-guhar yaad aaya
ye naya shahr ye raushan rahen
apna andaz-e-safar yaad aaya
rah ka rup bani dhup apni
koi saya na shajar yaad aaya
kab na us shahr mein patthar barse
kab na us shahr mein sar yaad aaya
ghar mein tha dasht-nawardi ka khayal
dasht mein aae to ghar yaad aaya
gard udti hai sar-e-rah-e-khayal
dil-e-nadan ka safar yaad aaya
ek hansti hui badli dekhi
ek jalta hua ghar yaad aaya
is tarah sham ke sae phaile
raat ka pichhla pahar yaad aaya
phir chale ghar se tamasha ban kar
phir tera rauzan-e-dar yaad aaya
kisi patthar ki haqiqat hi kya
dil ka aaina magar yaad aaya
aanch daman-e-saba se aai
eatibar-e-gul-e-tar yaad aaya
dil jala dhup mein aisa ab ke
panw yaad aae na sar yaad aaya
gar pade hath se kaghaz 'baqi'
apni mehnat ka samar yaad aaya

marhale zist ke aasan hue

By

marhale zist ke aasan hue
shahr kuchh aur bhi viran hue
aas lagao pe har ek shakhs se lag
thi nai baat ki hairan hue
wo nazar uthne lagi dil ki taraf
hadse ab mere arman hue
aap ko hum se shikayat kaisi
hum to ghafil hue nadan hue
dil-e-warafta ki baaten 'baqi'
yaad kar kar ke pasheman hue

marhala dil ka na tasKHir hua

By

marhala dil ka na taskhir hua
tu kahan aa ke inan-gir hua
kaam duniya ka hai tir-andazi
hum hue ya koi nakhchir hua
sang-e-buniyaadi hain hum us ghar ka
jo kisi tarah na tamir hua
safar-e-shauq ka hasil malum
rasta panw ki zanjir hua
umr-bhar jis ki shikayat ki hai
dil usi aag se iksir hua
kis se puchhen ki wo andaz-e-nazar
kab tabassum hua kab tir hua
kaun ab dad-e-sukhan de 'baqi'
jis ne do sher kahe 'mir' hua