na-rasa

By

mujhe khwab apna aziz tha
so main nind se na jaga kabhi
mujhe nind apni aziz hai
ki main sar-zamin pe khwab ki
koi phul aisa khila sakun
ki jo mushk ban ke mahak sake
koi dip aisa jala sakun
jo sitara ban ke damak sake
mera khwab ab bhi hai nind mein
meri nind ab bhi hai muntazir
ki main wo karishma dikha sakun
kahin phul koi khila sakun
kahin dip koi jala sakun

mujhe kahna hai

By

nahin main yun nahin kahta
ki ye duniya jahannam aur hum sab is ka indhan hain
nahin yun bhi nahin kahta
ki hum jannat ke basi hain
saron par la-jawrdi shamiyane aur pairon mein
nirale zaeqon wale phalon ke ped shir o shahad ki nahren machalti hain
mujhe to bas yahi kuchh aam si kuchh chhoti chhoti baaten kahni hain
mujhe kahna hai
is dharti pe gulshan bhi hain sahra bhi
mahakti narm mitti bhi
aur us ki kokh mein khwabon ka jadu aane wali nit nai faslon ki khushbu bhi
chatakhti aur tapti sakht be-his khun ki pyasi chatanen bhi
mujhe kahna hai
hum sab apni dharti ki
burai aur bhalai sakhtiyon aur narmiyon achchhaiyon kotahiyon har rang
har pahlu ke mazhar hain
hamein insan ki manind
khair o shar mohabbat aur nafrat dushmani aur dosti ke sath jina hai
isi dharti ka shahad o sam
isi dharti ke khat-mith jaane pahchane maze ka jam pina hai
mujhe bas itna kahna hai
ki hum ko aasmanon ya khalaon ki koi makhluq mat samjho

mujhe jina nahin aata

By

main jaise dard ka mausam
ghata ban kar jo bas jata hai aankhon mein
dhanak ke rang khushbu nazr karne ki tamanna le ke jis manzar talak jaun
siyah ashkon ke gahre kohr mein duba hua paun
mein apne dil ka sona
pyar ke moti
tarasti aarzu ke phul jis dar par sajata hun
wahan jaise makin hota nahin koi
bana hun ek muddat se sada-e-bazgasht aisi
jo diwaron se takrae
hirasan ho ke laut aae
dhadakte dil ke sune-pan ko suna aur kar jae
main apne aap ko sunta hun
apne aap ko chhuta hun
apne aap se milta hun khwabon ke suhane aaina-ghar mein
to mera aks mujh par muskuraata hai
ye kahta hai
saliqa tujh ko jine ka na aana tha nahin aaya
sadaen pattharon ki tarah mujh par
mere khwabon ke bikharte aaina-ghar par barasti hain
udhar tara idhar jugnu
kahin ek phul ki patti kahin shabnam ka ek aansu
bikhar jata hai sab kuchh ruh ke sunsan sahra mein
main phir se zindagi karne ke arman mein
ek ek reze ko chunta hun sajata hun nai murat banata hun
dhanak ke rang khushbu nazr karne ki tamanna mein qadam aage badhata hun
to ek be-nam gahri dhund mein sab dub jata hai
kisi se kuchh shikayat hai na shikwa hai
ki main to dard ka mausam hun
apne aap mein palta hun apne aap mein jita hun
apne aansuon mein bhigta hun muskuraata hun
magar sab log kahte hain
tujhe jina nahin aata

fasla

By

na phir wo main tha
na phir wo tum the
na jaane kitni masafaten darmiyan khadi thin
us ek lamhe ke aaine par
na jaane kitne baras pareshan dhul ki tarah se jame the
jinhen rifaqat samajh ke hum donon mutmain the
is ek lamhe ke aaine mein
jab apne apne naqab ulat kar
khud apne chehron ko hum ne dekha
to ek lamha
wo ek lamhe ka aaina kitni sadiyon kitne hazar milon ki shakl mein
darmiyan khada tha
na phir wo main tha na phir wo tum the
bas ek viran khamosh sahra bas ek viran khamosh sahra

ek KHwahish

By

ab ki bar milo jab mujh se
pahli aur bas aakhiri bar
hans kar milna
pyar bhari nazron se takna
aise milna
jaise azal se
mere liye tum sargardan the
bahr tha main tum mauj-e-rawan the
pahli aur bas aakhiri bar
aise milna
jaise tum khud mujh pe fida ho
jaise mujassam mehr-e-wafa ho
jaise but ho tum na khuda ho

azal-ta-abad

By

ufuq-ta-ufuq ye dhundalke ka aalam
ye had-e-nazar tak
nam-alud si ret ka narm qalin ki jis par
samundar ki chanchal jawan betiyon ne
kisi naqsh-e-pa ko bhi na chhoda
faza apne daman mein bojhal khamoshi samete hai lekin
machalti hui mast lahron ke honton pe naghma hai raqsan
ye naghma suna tha mujhe yaad aata nahin kab
magar han
bas ehsas hai is qadar qarna-ha qarn pahle
ki ginna bhi chahe to koi jinhen gin na pae
bhala reg-e-sahil ke phaile hue nanhe zarron ko koi kahan tak gine
machalti hui mast lahron ko sahil se chhutne ka gham hi nahin hai
wida-e-sukun jaise koi sitam hi nahin hai
jise qarna-ha-qarn pahle bhi main ne suna tha
jise log suraj ke bujhne talak yunhi sunte rahenge