karoge yaad to har baat yaad aaegi

By

karoge yaad to har baat yaad aaegi
guzarte waqt ki har mauj thahar jaegi
ye chand bite zamanon ka aaina hoga
bhatakte abr mein chehra koi bana hoga
udas rah hai koi dastan sunaegi
karoge yaad to har baat yaad aaegi
barasta bhigta mausam dhuan dhuan hoga
pighalti shama pe chehra koi guman hoga
hatheliyon ki hina yaad kuchh dilaegi
karoge yaad to har baat yaad aaegi
gali ke mod pe suna sa koi darwaza
tarasti aankh mein rasta kisi ka dekhega
nigah dur talak ja ke laut aaegi
karoge yaad to har baat yaad aaegi

visal

By

jab kisi timtimate hue jism ka sarsaraata hua pairahan
ras bhare santare ke chamakdar chhilke ki manind utarne lagega
dhundalke mein soe hue narm bistar ki ninden
kisi sondhi khushbu ki jhankar se jab uchat jaengi
aur uljhi hui garm sanson ki maujon pe main
be-sahaara bhatakti hui naw ki tarah bahne lagunga
yaqin hai mujhe
tum hawaon ki poshak pahne hue
band kamre ki jannat mein dar aaogi
ajnabi muskuraate hue jism ke ek ek naqsh mein
aap hi aap dhal jaogi
dur ufuq ke qarin
do parinde fazaon mein aahista aahista tahlil ho jaenge

waqt ke kaTahre mein

By

suno tumhaara jurm tumhaari kamzori hai
apne jurm pe
rang-birange lafzon ki be-jaan ridaen mat dalo
suno tumhaare khwab tumhaara jurm nahin hain
tum khwabon ki tabir se dar kar
lafzon ki tarik gupha mein chhup rahne ke mujrim ho
tum ne hawaon ke zine par
panw rakh kar
qaus-e-quzah ke rang samete
aur khalaon mein udte
farzi taron sayyaron ki baaten kin
tum mujrim ho us nannhi konpal ke jis ne
subh ki pahli shokh kiran se sargoshi ki
tum mujrim ho us aangan ke jis mein shayad
ab bhi tumhaare bachpan ki masum shararat zinda hai
tum mujrim ho tum ne apne panw se lipti mitti ko
ek izafi chiz samajh kar jhad diya

to aisa kyun nahin karte

By

to aisa kyun nahin kahte
ki ye sapne hi mere karb ke zamin hain un ke hi sabab se main
jhulaste reg-zaron mein barahna-pa bhatakta hun
inhi parchhaiyon ko jism dene ki tamanna mujh se aasaish ka har lamha
maze ki nind aasabi sukun sab chhin leti hai
yahi wo zahr hai jis ne
mere khun ke namak ko nim ke ras mein badal dala
to aisa kyun nahin kahte
ki main sapnon ke is arzang ko
suraj ki jalti bhattiyon mein phenk dun sab kuchh jala dalun
kisi langar-shikasta naw ki manind dhaare par rawan ho jaun
har ek mauj ke hamrah dubun aur ubhar aaun
to aisa kyun na kar pae
wo jo kuchh mera hissa tha
mera wirsa tha
mujh se chhin lete aur mujhe jangal ke behis ped ki manind uga dete
jo har mausam ke hamrah apna pairahan badalta hai
hawa ke jhonke dete hain ijazat jis taraf badhne ki badhta hai
zamin ki narmiyon ko dekh kar apni jaden paiwast karta hai
magar tum ye na kar pae
mera wirsa na mujh se chhin pae aur wo pahla shakhs jis ne sab se pahla khwab dekha tha
abhi tak mujh mein zinda hai
to aisa kyun nahin karte
unhi sapnon unhi parchhaiyon ko jism de dalo
jinhen ek jism dene ki tamanna mujh se aasaish ka har lamha
maze ki nind aasabi sukun sab chhin leti hai

qarz

By

mohr honton pe
samaat pe bitha len pahre
aur aankhon ko
kisi aahani tabut mein rakh den
ki hamein
zindagi karne ki qimat bhi chukani hai yahan

pata nahin wo kaun tha

By

pata nahin wo kaun tha
jo mere hath
mugre ki dal pankh mor ka thama ke chal diya
pata nahin wo kaun tha
hawa ke jhonke ki tarah jo aaya aur guzar gaya
nazar ko rang dil ko nikhaton ke dukh se bhar gaya
main kaun hun
guzarne wala kaun tha
ye phul pankh kya hain kyun mile
ye sochte hi sochte tamam rang ek rang mein utarte gae
siyah rang
tamam nikhaten idhar udhar bikhar gain
khalaon mein
yaqin hai nahin nahin guman hai
wo koi mera dushman-e-qadim tha
dikha ke jo sarab meri pyas aur badha gaya
main be-hisab aarzuon ka shikar
intiha-e-shauq mein fareb us ka kha gaya
guman nahin nahin yaqin hai
wo koi mera dost tha
jo do ghadi ke waste hi kyun na ho
nazar ko rang dil ko nikhaton se bhar gaya
pata nahin kidhar gaya
main is ko dhundhta hua
tamam kaenat mein
udhar udhar bikhar gaya