har gam pe aawargi-o-dar-ba-dari mein

har gam pe aawargi-o-dar-ba-dari mein
ek dhyan ka saya hai meri ham-safari mein
ta-hadd-e-nazar pighli hui ret ka dariya
kis samt nikal aae hain ye be-khabari mein
kis ki tarab-andaz-nazar ghol rahi hai
andoh-o-gham-o-soz mizaj-e-bashari mein
kya koi kahin kunj-e-khayaban-e-sukun hai
ai dasht-e-gham-e-zist teri be-shajari mein
ai qarya-e-dil dekh guzarti hai isi taur
har shahr pe barbaadi-o-zer-o-zabari mein
ahl-e-talab-o-shauq zamanon se pade hain
arsa-gah-e-khud-sozi-o-hairan-nazari mein
lahrae na lahrae wo ab barq-e-khad-o-khal
ab hum nahin khar-e-khas-e-ashufta-sari mein
ek hamdam-e-derina ki yaadon ki kasak hai
khushbu-e-khush-anfasi-e-baad-e-sahari mein
nigaran meri jaanib nigah-e-khush-hunran hai
kuchh to hunar aakhir hai meri be-hunari mein
ek tesha-e-sad-para ki surat hain 'bashir' ab
hasil yad-e-tula tha jinhen shisha-gari mein

giraft-e-zist mein hun qaid-e-be-hisar mein hun

giraft-e-zist mein hun qaid-e-be-hisar mein hun
azab-e-arsa-gah-e-jabr-o-ikhtiyar mein hun
khayal hai to abhi dhundh phir milun na milun
abhi main tere udae hue ghubar mein hun
bhadak raha hai badan ruh ko khabar bhi nahin
ye kya maqam hai ye kaise shoala-zar mein hun
main kaun hun tere nazdik ye sawal nahin
hubab hun ki sadaf bahar-e-be-kanar mein hun
khud apne aap se har dam hun barsar-e-paikar
main apni zat ke maidan-e-kar-zar mein hun
mein bhed kya tujhe dun be-karan khalaon ke
ki main azal se isi halqa-e-madar mein hun
talash kis ki hai mujh ko abhi ye kya sochun
'bashir' abhi to main apne hi intizar mein hun

dur tak chaaron taraf mere siwa koi na tha

dur tak chaaron taraf mere siwa koi na tha
phir palak jhapki to kya dekha ki khud main bhi na tha
ek tadap bijli ki aur diwar-o-dar mitti ke dher
ek tadap shoale ki aur dariyaon mein pani na tha
daere banti sadaen chhu ke jab hadd-e-ufuq
apne markaz ki taraf lautin to kuchh baqi na tha
qaid-e-zindan-e-jasad mein tha ye kab kashf-e-wajud
aur bhi kuchh tha main sirf ek paikar-e-khaki na tha
kya khabar tum ne kahan kis rup mein dekha mujhe
main kahin moti kahin patthar kahin aaina tha
den hisab-e-roz-o-shab kya us ko jis ke dard se
koi saat koi lamha koi pal khali na tha
aarzu lal-o-gohar ki kis liye karta 'bashir'
harf-o-mani ka khazina kya use kafi na tha