dil jo ummid-war hota hai

dil jo ummid-war hota hai
tir-e-gham ka shikar hota hai
jab tera intizar hota hai
dil mera be-qarar hota hai
ye hi fasl-e-junun ki hai tamhid
pairahan tar tar hota hai
aankh milte hi us sitamgar se
tir sine ke par hota hai
muskurahat labon pe hai un ke
dil mera ashk-bar hota hai
us ka karte hain e'tibar ki jo
qabil-e-e'tibar hota hai
uth ke pahlu se ja raha hai koi
kya ye parwardigar hota hai
kya bataun teri judai mein
jo mera haal-e-zar hota hai
sham-e-gham intizar mein un ke
maut ka intizar hota hai
un ke jaane ka nam sun kar 'raaz'
kuchh ajab haal-e-zar hota hai