uski nazar ka mujh pe kuchh aisa asar hua

By

us ki nazar ka mujh pe kuchh aisa asar hua
dil tha sadaf misal ba-rang-e-guhar hua
wo shokhiyan thin aur na wo rang-rup tha
kal main bahut udas use dekh kar hua
isar aur wafa ki mere dastan ye hai
jab bhi watan pe war hue main sipar hua
wo hadisa to koi bada hadisa na tha
ye aur baat dil pe ziyaada asar hua
aisa bhi ek dar hai isi kaenat mein
us dar ka jo faqir hua tajwar hua
ab ja ke mujh ko sard shabistan hua nasib
barson tamam jism pasine mein tar hua
dahshat-zada fazaon se wo be-niyaz tha
jab us ka ghar jala hai to us par asar hua
yaad aa gai thi mujh ko shahid-e-wafa ki pyas
dariya ko dekh kar jo mera dil sharar hua
patthar bhi phenkte koi aata nahin idhar
budhe shajar ki tarah jo main be-samar hua
jis din meri ghazal ne chhue us ke lab 'bashir'
us din meri ghazal ka safar mo'atabar hua

kar gaya mere dil-o-jaan ko moattar koi

By

kar gaya mere dil-o-jaan ko moattar koi
chhu ke is tarah se guzra mujhe aksar koi
jitni nazren thin usi shakhs mein uljhi hui thin
ja raha tha sar-e-bazar sambhal kar koi
kaun sa hadisa guzra nahin us par is bar
aur wo hai ki shikayat nahin lab par koi
dil ko dil un ki nigahon ne banaya warna
aisa be-dard tha dil jaise ki patthar koi
chand taron pe nazar thahre to yun lagta hai
tere jaisa hai pas-e-parda-e-manzar koi
waqt thahra hua lagta tha sar-e-rahguzar
is tarah dekh raha tha mujhe mud kar koi
husn shirin mein bhi tha husn to azra mein bhi tha
na hua mere trahdar ka ham-sar koi
aaina apne muqaddar pe na kyun naz kare
mud ke ek bar use dekhe jo sanwar kar koi
kitne tufan chhupe hain tah-e-har-mauj 'bashir'
aaj ka daur hai ya jaise samundar koi

dhup rakh di thi muqaddar ne sirhane mere

By

dhup rakh di thi muqaddar ne sirhane mere
umr-bhar aag mein jalte rahe shane mere
main tere nam ka aamil hun wo ab jaan gae
hadse ab nahin dhundhenge thikane mere
chand si un ki wo khush-rang qaba wo dastar
un ki darweshi pe qurban khazane mere
mauj-e-rang aai kuchh is taur ki dil jhum utha
hosh gum kar diye sarmast hina ne mere
phir koi lams mere jism mein shoale bhar de
phir se yun ho ki palat aaen zamane mere
ja tujhe chhod diya ai gham-e-dauran main ne
warna khali nahin jate hain nishane mere
aisa lagta tha ki laut aae hain guzre hue din
mil gae the mujhe kuchh dost purane mere
zindagi dekh li main ne teri duniya ki jahan
waqt ne chhin liye khwab suhane mere
ab main sahil pe nahin main hun tah-e-ab-e-rawan
shahr-dar-shahr hain honton pe fasane mere
gir pada sail-e-hawadis mere qadmon pe 'bashir'
hath thame jo buzurgon ki dua ne mere

badan mein rang bhare lahlha rahe hain charagh

By

badan mein rang bhare lahlha rahe hain charagh
mahak rahi hai faza muskura rahe hain charagh
ujale dube hue hain ghane andheron mein
ajab safar hai bahut yaad aa rahe hain charagh
khuda kare ki unhen ye milap ras aae
hawaon se jo talluq badha rahe hain charagh
surur-e-lams ka ab sham lutf uthaegi
ki din guzar gaya nazdik aa rahe hain charagh
tamam raat jale ab ye khauf kaisa hai
hawa-e-subh se daman bacha rahe hain charagh
wo de rahe hain hamein bujh ke bhi payam-e-hayat
hamein andheron mein jina sikha rahe hain charagh
ujale bant rahe hain siyah raaton ko
ye aur baat ki khud ko jala rahe hain charagh
visal-o-hijr ke mausam guzar gae ki 'bashir'
jala rahe hain na hum ab bujha rahe hain charagh