suhane sapne aae hain

By

suhane sapne aae hain
lubhane sapne aae hain
mujhe manzil ki dawat hai
bulane sapne aae hain
meri bedar aankhon ko
sajaane sapne aae hain
main ek muddat se soya tha
jagane sapne aae hain
mujhe pane tum aae ho
ganwane sapne aae hain
ye sapne ja nahin sakte
churane sapne aae hain
ye arman phir se todenge
dikhane sapne aae hain
naya sa khel hai koi
purane sapne aae hain
mujhe to aakhiri dam tak
hansane sapne aae hain
ajab 'mahtab' aankhon ke
diwane sapne aae hain

sab ki maujudgi samajhta hai

By

sab ki maujudgi samajhta hai
dil kisi ki kami samajhta hai
ek hi shakhs se main waqif hun
jo mujhe ajnabi samajhta hai
go mujhe jaanta nahin lekin
wo meri shairi samajhta hai
wasl ke ashk hijr ke aansu
wo nami ko nami samajhta hai
wahi meri zaban se hai waqif
jo meri khamushi samajhta hai
aap ke samne main khush hun magar
mere dukh ram hi samajhta hai
yahi urdu zaban ka hai jadu
ab mujhe har koi samajhta hai
main use baat dil ki kahta hun
wo use shairi samajhta hai
itna nadan bhi nahin hai wo
jo tumhaari hansi samajhta hai
kaun 'mahtab' ab tumhaara hai
kaun dil ki lagi samajhta hai

ruKH tumhaara ho jidhar hum bhi udhar ho jaenge

By

rukh tumhaara ho jidhar hum bhi udhar ho jaenge
tum se bichhdenge agar to dar-ba-dar ho jaenge
zindagani ke safar mein lutf hoga tab nasib
ham-khayal-o-ham-nawa jab ham-safar ho jaenge
aasmanon ka safar hum tai karenge ek rose
jab hamare hauslon mein baal-o-par ho jaenge
sadgi yunhi agar lade rahe to ek din
sab tumhaare apne tum se be-khabar ho jaenge
dekhna jis din unhen maqsad samajh mein aaega
manzilon ki justuju mein rahguzar ho jaenge
paude hain urdu adab ke aab-o-dana daliye
aane wale kal mein sae aur samar ho jaenge
saqi saghar ki zarurat hi kahan mere liye
teri aankhon ke hi pyale pur-asar ho jaenge
wo na jaenge kabhi 'mahtab' zulmat ki taraf
waqt par anjam se waqif agar ho jaenge

kis masti mein ab rahta hun

By

kis masti mein ab rahta hun
khud ko khud mein dhund raha hun
duniya mein sab se hi juda hun
aakhir main kis duniya ka hun
main to khud ko bhul chuka hun
tum batla do kaun hun kya hun
ye bhi nahin hai yaad mujhe ab
kyun aakhir rota rahta hun
ek duniya hai mere andar
us mein hi main ghum raha hun
mujh ko nind hai pyari ya phir
us ko bhi main hi pyara hun
wo rukh apna pher chuke hain
main kis ko apna kahta hun
in lafzon ne manzil chhini
aap chalen main abhi aata hun
man to khushiyan bant raha hai
main qatra qatra rota hun
khud ka bojh hai kitna khud par
kitna khud ko jhel raha hun
mujh ko tum 'mahtab' na samjho
shayad main us ka saya hun

jab se mere raqib ka rasta badal gaya

By

jab se mere raqib ka rasta badal gaya
tab se mere nasib ka naqsha badal gaya
shirin tha kitna aap ka andaz-e-guftugu
do-chaar sikke aate hi lahja badal gaya
kis ki zaban se mujhe dekho khabar mujhe
kaise mere harif ka chehra badal gaya
un ke badalne ka mujhe afsos kuchh nahin
afsos ye hai apna hi saya badal gaya
jab se badon ki ghar se hukumat chali gai
jannat-numa makan ka naqsha badal gaya
rahon ki khak chhanta phirta hun aaj tak
rahbar badal gaya kabhi rasta badal gaya
kahta hai us ke jaane se kuchh bhi nahin hua
'mahtab' jabki dil ka wo dhancha badal gaya

mana usko gila nahin mujhse

By

mana us ko gila nahin mujh se
kuchh to hai jo kaha nahin mujh se
haq nahin dosti ka aisa koi
jo ki us ko mila nahin mujh se
dil hi dil mein wo bughz rakhta hai
jo ba-zahir khafa nahin mujh se
kuchh to hoga zarur is ka sabab
wo jo ab tak lada nahin mujh se
lakh pichha chhudana chaha magar
gham hua hi juda nahin mujh se
kaise rah paega wo mere baghair
jo alag hi raha nahin mujh se
jo ba-zahir khafa hai ai 'mahtab'
wo ba-baatin khafa nahin mujh se