zahir meri shikast ke aasar bhi nahin

By

zahir meri shikast ke aasar bhi nahin
mujh ko yaqin fath ka is bar bhi nahin
qaid-e-makan se dekhiye kab tak rihai ho
ab tak to bad-guman dar-o-diwar bhi nahin
kis sehr ki giraft mein aae hue hain hum
aankhen bhi hain khuli hui bedar bhi nahin
jo kuchh ki dil mein ho bhari mahfil mein kah sake
har shakhs mein ye jurat-e-izhaar bhi nahin
kya asl kaenat ko 'saifi' samajh sakun
mujh par ayan to zat ke asrar bhi nahin

KHud apna eatibar ganwata raha hun main

By

khud apna eatibar ganwata raha hun main
zarre ko aaftab batata raha hun main
andhi hawa ko dun koi ilzam kis liye
apne diye ko aap bujhata raha hun main
ek umr ke riyaz ka hasil na puchhiye
reg-e-rawan pe naqsh banata raha hun main
har chand maslahat ka taqaza kuchh aur tha
aaina har kisi ko dikhata raha hun main
bachchon ke hanste-khelte chehron ki ot mein
apne dukhon ki tis chhupata raha hun main
ye aur baat khud mere panw na uth sake
auron ko rasta to dikhata raha hun main
'saifi' fishaar-e-gham ki tamazat ke bawajud
hairat hai apni baat nibhata rahun main

is bahr-e-be-sada mein kuchh aur niche jaen

By

is bahr-e-be-sada mein kuchh aur niche jaen
aawaz ka khazina shayad tahon mein paen
galiyon mein sad rahi hain bite dinon ki lashen
kamre mein gunjti hain be-nam si sadaen
mazi ki ye imarat mehman hai koi dam ki
diwar-o-dar shikasta aur tez-tar hawaen
lete hi hath mein kyun akhbar phad dala
kaisi khabar chhapi thi hum kis ko kya bataen
shab ki siyah nadi se 'saifi' ubhar ke socho
suraj ki raushni mein sae kahan chhupaen

aisa lagta hai muKhaalif hai KHudai meri

By

aisa lagta hai mukhalif hai khudai meri
koi karta hi nahin khul ke burai meri
mujh mein madfun bade shahr-e-maani the magar
dur tak kar na saka waqt khudai meri
be-sada shahr tha khamosh the galiyon ke makin
ek muddat mujhe aawaz na aai meri
khair-khwahi ka raha yun to sabhi ko dawa
chahta bhi to koi dil se bhalai meri
shab ki dahliz pe qazzaq zarurat to nahin
chhin leta hai jo din-bhar ki kamai meri
kuchh mere ilm ne bhi mujh ko fazilat bakhshi
fan se nisbat ne bhi tauqir badhai meri
mujh ko mujh tak hi na mahdud samajhna 'saifi'
la-makan se bhi pare tak hai rasai meri