zabt-e-gham kar bhi liya to kya kiya

By

zabt-e-gham kar bhi liya to kya kiya
dil ki rag rag se lahu tapka kiya
har tajalli aap ki taswir thi
is liye main har taraf dekha kiya
gham ke shoale jaan tak sarkash hue
ishq soz-e-dil hi ko roya kiya
lut len sab husn ki khuddariyan
ai nigah-e-wapsin ye kya kiya
tha tumhaare samne dil ko sukun
phir jo ghabraya to ghabraya kiya
sham-e-gham ki badh gain tarikiyan
ai charagh-e-arzu ye kya kiya
kis se paiman-e-mohabbat bandhiye
kaun kis ka rasta dekha kiya
aap se ab kya kahen is ke siwa
aap ne jo kuchh kiya achchha kiya
hasil-e-gham bhi mita kar rakh diya
ai gham-e-be-hasili ye kya kiya
tujh pe ye ilzam 'basit' kam nahin
pyar ki nazron se kyun dekha kiya

waraftagi-e-ishq na jae to kya karen

By

waraftagi-e-ishq na jae to kya karen
tera bhi ab khayal na aae to kya karen
khud sharm-e-ishq dil ko mitae to kya karen
un tak nigah-e-shauq na jae to kya karen
mai-khwariyan gunah sahi saqi-e-azal
jab abr jhum jhum ke aae to kya karen
ye dair wo haram ye kalisa wo mai-kada
apni taraf har ek bulae to kya karen
mumkin hai har khayal ka dil se nikalna
tera khayal aa ke na jae to kya karen
mana nigah-e-shauq rahe ehtiyat se
har jalwa khud nazar mein samae to kya karen
'basit' sitam pe shukr-e-sitam chahiye magar
koi karam se hum ko mitae to kya karen

sab kaenat-e-husn ka hasil liye hue

By

sab kaenat-e-husn ka hasil liye hue
baitha hun dil mein ishq ki mahfil liye hue
ek ek nazar farebi-e-sahil liye hue
har mauj samne hai mera dil liye hue
sarmaya-e-nashat gham-e-dil liye hue
hun yani kaif-e-ishq ka hasil liye hue
phir kashti-e-hayat hai girdab-e-gham ke sath
tufan-e-be-niyazi-e-sahil liye hue
ji chahta hai thak ke kahin baith jaiye
aaghosh-e-pa-e-shauq mein manzil liye hue
jab lutf hai ki main bhi rahun apne hosh mein
aao meri nigah mera dil liye hue
wo mast-o-mahw apne farogh-e-nashat mein
main mutmain hun dard bhara dil liye hue
ai qais-e-did apne hijabon se hoshiyar
har parda-e-nigah hai mahmil liye hue
mujh par bhi kuchh karam nigah-e-neshtar-nawaz
main bhi hun ek dard bhara dil liye hue
'basit' kisi jihat se na ho aashna magar
halka sa ek tasawwur-e-manzil liye hue

mohabbat ki intiha chahta hun

By

mohabbat ki intiha chahta hun
unhen hasil-e-ibtida chahta hun
use barmala dekhna chahta hun
adab ai mohabbat ye kya chahta hun
gham-e-ishq ka silsila chahta hun
main tujh tak tera wasta chahta hun
karam-ha-e-na-mustaqil ka gila kya
sitam-ha-e-be-intiha chahta hun
wo ghabra ke jis par nazar dal hi den
main wo qalb-e-shorish-ada chahta hun
karam kijiye to karam ka hun talib
saza dijiye to saza chahta hun
teri yaad achchhi tarah zikr pyara
magar main tujhe dekhna chahta hun
tere ishq hi se bani meri hasti
tere ishq hi mein mita chahta hun
jo taza kare qissa-e-tur 'basit'
main aisa hi ek waqia chahta hun

mere rone par kisi ki chashm giryan hae hae

By

mere rone par kisi ki chashm giryan hae hae
wo gul-e-tar wo faza-e-shabnamistan hae hae
wo kisi ki yaad-e-paiham sham-e-hijran hae hae
har nafas waqf-e-nawa-ha-e-pareshan hae hae
dil pe dard-e-ishq ka ek ek ehsan hae hae
jaan ki surat mein koi dushman-e-jaan hae hae
subh-e-hijran bad-tar-az-shab-ha-e-hijran hae hae
zindagi ek mustaqil khwab-e-pareshan hae hae
dil ki rahat ke liye un ki mohabbat ke liye
koshish-e-be-sud phirta hadd-e-imkan hae hae
meri khatir aur wo majburiyon ka e'tiraf
un ke nazuk dil ko bhi ehsas-e-hijran hae hae
kaifiyat-e-sajda-e-zauq-e-mohabbat al-aman
kaba-e-dil be-niyaz-e-kufr-o-iman hae hae
wo mera kaif-e-nazar wo be-khudi wo sarkhushi
fursat-e-nazzara-ha-e-husn-e-jaanan hae hae
un ki mahfil mein bhi hun daman-kash-e-wahshat-ba-dil
har jagah ek aalam-e-adab-e-zindan hae hae
yas ki maujon mein har manzar ka aakhir dubna
dil se wo uthta hua tufan-e-hirman hae hae
jo na samjhen dard kya hai dard ka ehsas kya
kab tak un ke waste 'basit' ghazal-khwan hae hae

kuchh sila hi na mila ishq mein jal jaane ka

By

kuchh sila hi na mila ishq mein jal jaane ka
shama ne lut liya soz bhi parwane ka
zabt-e-fariyaad ki be-sud tawaqqo dil se
zarf kyun dekhiye tute hue paimane ka
mera mitna nahin aasan mohabbat ki qasam
maut hai nam tere dil se utar jaane ka
hashr tak roegi duniya-e-mohabbat mujh ko
silsila khatm na hoga mere afsane ka
maut ki nind se insan ko jaga deti hai
jis haqiqat mein zara rang ho afsane ka
is tarah mujh se mukhatab hai zamana jaise
hosh ki fikr bhi ek farz ho diwane ka
un ke andaz-e-sitam ka hai taqaza 'basit'
ahd kar lijiye mar mar ke jiye jaane ka