trahdar kahan se laun

By

jhut ki garmi-e-bazar kahan se laun
raqs-e-be-mani ki jhankar kahan se laun
dhund ke hila-e-takzib barae-insaf
be-muhaba sar-e-darbar kahan se laun
be-khabar ishq se hain aaj riya-kar shuyukh
jazb-e-mansur sar-e-dar kahan se laun
bech kar chadar-e-zahra ko sajata firdaus
reshmi makr ki dastar kahan se laun
maut ki god mein hai aarif-o-dana ka wajud
dil-ruba fikr-e-sahar-kar kahan se laun
mein wo fankar hun ikhlas hai jis ka shahkar
makr-o-tarwiz ki guftar kahan se laun
khanqahon mein bhi raij hai hawas ki tadris
ba-khuda shaikh-e-nigah-dar kahan se laun
maktab-e-nau ka moallim hai farangi baqqal
buzar-o-khalid-o-karrar kahan se laun
ruh-e-tauhid ki qatil hai siyasi talim
sar-faroshan-e-wafadar kahan se laun
khub waqif hun hadis-e-mai-o-mina se magar
aalam-e-hashr mein dildar kahan se laun
saz-e-fitrat pe ghazal-khwan hai shuur-e-tanqid
kaghzi kakul-o-rukhsar kahan se laun
shola-zan daman-e-giti hai to mazmun koi
jinsiyat-bakhsh trahdar kahan se laun
dil ka paimana hai zahrab-e-alam se labrez
bulbul-e-zamzama-asar kahan se laun
tazkire hain qad-o-gesu ke bahar-taur aziz
muflisi mein dil-e-gulbar kahan se laun
tishnagi sahab-e-nama ki bujhane walo
aabru-bakhta shahkar kahan se laun
arsa-e-dahr ka har zarra hai aatish-ba-kanar
ramish-o-rang ke ashaar kahan se laun
jannati hone ki mana ki sanad bikti hai
ganj-e-qarun ka ambar kahan se laun
zeb-e-tan waqt ka pairahan-e-shoala hai abhi
kaif-angez main afkar kahan se laun
khair-agah mera fikr hai masruf-e-amal
bahs-o-takrar ki talwar kahan se laun
jaan pad sakti hai 'bebak' tan-e-murda mein
mard-e-'faruq' sa kirdar kahan se laun

raqqasa-e-auham

By

asnam-e-imarat ka parastar hai aalam
sarmaya-e-ghaflat ka kharidar hai aalam
katti hain sada sidq maqalon ki zabanen
haq-go ke liye arsa-gah-e-dar hai aalam
darwesh-e-khuda nan-e-shabina ko hai muhtaj
go neamat-o-ikram ka bazar hai aalam
shadab hai din-raat gharibon ke lahu se
arbab-e-zar-o-sim ka gulzar hai aalam
khud zahid-e-sad-sala giraftar hai jis mein
wo halqa-e-tazwir-o-fusun-zar hai aalam
har gam pe hai shoabada-e-nafs ka phanda
raqqasa-e-auham ka darbar hai aalam
dil khizr ka hai naghma-e-be-mani pe raqsan
tahzib ke pazeb ka jhankar hai aalam
is qahba-e-bazari se rakho na tawaqqo
ehsan faramosh-o-ziyan-kar hai aalam
sar rakhta hai aawara-mizajon ke qadam par
ye haq mein wafadaron ke talwar hai aalam
shair ke nahin sine mein gunjaish-e-takiya
mana ki bahut dilkash-o-purkar hai aalam
is ahd-e-pur-ashob mein 'bebak' na puchho
kis darja jafa-kash-o-sitam-gar hai aalam

naqsh bar-diwar

By

mata-e-dard ko sahab shuur kho baithe
sabaat-e-azm ko mard-e-ghuyur kho baithe
nazar se mahw hai ummul-kitab ki tafsir
huzur mani-e-ghaib-o-zuhur kho baithe
gaya jo hath se iman to tahayyur kya
wafur-e-aish mein takht-o-qusur kho baithe
dil-o-dimagh se rukhsat jihad ka jazba
sabil-e-haq ke zaruri umur kho baithe
khudi se baqi thi mazhab ki aabru thodi
sharab-e-faqr ka husn-e-surur kho baithe
gharib millat-e-masum ka khuda-hafiz
faqih-e-shahr tadayyun ka nur kho baithe
qulub zinda se afsos hashmi farzand
charagh ishq-e-ilahi ka nur kho baithe
jahan mein kaise ho mearaj-e-zindagi hasil
yaqin ki ruh ko sadrussudur kho baithe
hakim-o-arif-o-sufi hain naqsh bar-diwar
dil-o-dimagh se anwar-e-tur kho baithe
zalil sahab-e-quran ho ye nahin mumkin
zarur husn-e-amal ko huzur kho baithe
uwais o bu-zar o usman ke ata-karda
mazaq-e-faqr-e-mohammad zarur kho baithe
khulus-e-dil se thi 'bebak' shaeri raushan
payambari ke sukhnawar shuur kho baithe

KHanjar talash karta hai

By

bashar rumuz-e-muqaddar talash karta hai
qaza-o-qadr ka mehwar talash karta hai
faqih-e-shahr sanam-khana-e-siyasat mein
siraat-e-din ka rahbar talash karta hai
khuda ko chhod ke jamhur ka hawas-pesha
sukun-e-qalb falak par talash karta hai
mazaq-e-adl se begana hai magar insan
fasad-khana mein yawar talash karta hai
pae najat watan mein ba-faiz-e-azadi
sharif aadmi khanjar talash karta hai
faza-e-dahr mein takhrib ka alam-bardar
hayat-saz payambar talash karta hai
tarashta hai barahim-e-asr sad-asnam
charagh-e-tur par aazar talash karta hai
barahna zulmat-e-tahzib mein tan-e-maryam
masih-e-waqt ki chadar talash karta hai
sanam-kade mein tafalsuf ke tira-dil waiz
uwais-o-khalid-o-bu-zar talash karta hai
ilaj khatir-e-millat ka pasban-e-haram
lain-e-waqt ke dar par talash karta hai
khulus-e-din ko baad-az-kharabi-e-bisyar
zamana aaj mukarrar talash karta hai
tan-e-shuyukh ba-zahir galim-posh sahi
zamir shahid-o-saghar talash karta hai
dua asiri ki karta hai sahab-e-quran
mafar ghulami se kafar talash karta hai
mazaq-e-faqr hai rahmat asar zamane mein
azab-e-kunz tawangar talash karta hai
jahan-e-shor mein paiham yazid ka lashkar
husain-e-asr ko ghar ghar talash karta hai
sanwar to sakti hai millat ki naseha taqdir
lahu zamane ka tewar talash karta hai
miyan-e-bahr sadaf mein guhar to hai lekin
khatar-pasand shanawar talash karta hai
zamana batn-e-jahannam mein ek muddat se
nishat-o-kaif barabar talash karta hai
gunahgar hai 'bebak' be-nawa lekin
nabi ka gumbad-e-akhzar talash karta hai

hikmat ka but-KHana

By

sharab-e-shor se labrez hai duniya ka paimana
harif-e-din-o-danish hai mazaq-e-pir-e-mai-khana
bashar iblis ko tazwir-e-nau ka dars deta hai
muzayyan hai gunah-e-gunagun se har pari-khana
ulum-e-nau se raushan bazm hai tahzib-e-hazir ki
yad-e-tajdid ne dhaala hai dil-awez but-khana
ye mana maghribi talim ne parwaz bakhshi hai
ye mah-o-khur bhi ban jaenge ab qindil ka shana
khuda ke chahne wale abhi tak bhole-bhaale hain
bana rakha hai harz-e-jaan sada mazi ka afsana
gunah-e-taza ki takhliq se iblis qasir hai
dimagh-e-fitna-ju par hai musallat zof-e-pirana
bahut majbur be-chaara hai khud pirana-sali se
use malum kya hai masiyat ka taza paimana
khuda wale tajjub hai ki masum-o-muqaddas hain
azab-e-nau-ba-nau se hai murassa aaina-khana
rah-e-tashkik par rakhsh-e-hunar paiham khiraman hai
bahut mushkil hai fitrat ka abhi taskhir farmana
musawat-e-nazar ka muddaton se shor sunta hun
faza duniya ki hai lekin abhi tak firqa-warana
hawas ka dars to yaro bahut hi khub hai lekin
abhi quran ki tafhim se aajiz hai farzana
buton ka todna tha kar-e-asan ahd-e-mazi mein
wale mushkil hai dhana aaj ki hikmat ka but-khana
qulub-e-asr-e-hazir mein abhi iman dhal jae
faqiron ka nahin dekha hai ejaz-e-kalimana
tafakhur ke marizon ke liye iksir hoti hai
sarasar banda-e-'bebak' ki tarz-e-faqirana

haq-kesh ki fariyaad

By

tahsin ke talib nahin ausaf-e-khuda-dad
aafaq hila deti hai haq-kesh ki fariyaad
aabaad kahan halqa-e-sheri ki faza mein
but-khana-e-mani ki sanam-e-khana-e-bahzad
mit jaega aiwan-e-tafakhur ka takalluf
yak shola-e-jawwala hai aah-e-dil-e-nashad
zargham hai rubah ke zarrin qafas mein
aazad hain paband giraftar hain aazad
ghazi ne kaha lut lo but-khana-e-daulat
sufi ne kaha chhod do ishrat gah-e-shaddad
tezab-e-siyasat mein khudi jis ki hui gharq
wo kaghzi lobat bane kya paikar-e-faulad
hajat ke but-khana-e-tazwir hazaron
bandon ne tere nam pe kar dale hain ijad
lut jata hai har gam pe ismat ka khazana
dilkash bahut hai mana ki har raqs-e-pari-zad
jamhur ki tahzib se ikhlas hai madum
imroz nai nasl ko allah nahin yaad
jamhur ki barakat se hue aadmi nange
science ne sau fitna-e-mahshar kiye ijad