sine mein dil hai dil mein dagh dagh mein soz-o-saz-e-ishq

sine mein dil hai dil mein dagh dagh mein soz-o-saz-e-ishq
parda-ba-parda hai nihan parda-nashin ka raaz-e-ishq
naz kabhi niyaz hai aur niyaz naz-e-ishq
khatm hua na ho kabhi silsila-e-daraaz-e-ishq
ishq ada-nawaz-e-husn husn karishma-saz-e-ishq
aaj se kya azal se hai husn se saz-baz-e-ishq
apni khabar kahan unhen jin pe khula hai raaz-e-ishq
sare shuur mit gae jab hua imtiyaz-e-ishq
hosh-o-khirad bhi al-firaq baini-wa-bainaka kahen
hazrat-e-dil ka khair se hai safar-e-hijaz-e-ishq
pir-e-mughan ke pa-e-naz aur mera sar-e-niyaz
hoti hai mai-kade mein roz apni yunhi namaz-e-ishq
hasrat-o-yas-o-arzu shauq ka iqtida karen
kushta-e-gham ki lash par dhum se ho namaz-e-ishq
ishq ki zat hi se hai khubi-e-husn-o-shan-e-husn
husn ke dam-qadam se hai sara ye soz-o-saz-e-ishq
ai dil-e-dardmand phir nala ho koi dil-gudaz
suni padi hai bazm-e-shauq chhed de apna saz-e-ishq
hosh-o-khirad adu-e-ishq ishq hai dushman-e-khirad
hai na hua na ho kabhi aql se saz-baz-e-ishq
'bedam'-e-khasta hai kahan asl mein koi aur hai
zamzama-sanj be-khudi naghma-taraaz saz-e-ishq

kuchh lagi dil ki bujha lun to chale jaiyega

kuchh lagi dil ki bujha lun to chale jaiyega
khair sine se laga lun to chale jaiyega
main za-khud rafta hua sunte hi jaane ki khabar
pahle main aap mein aa lun to chale jaiyega
rasta ghere hain arman-o-qalaq hasrat-o-yas
main zara bhid hata lun to chale jaiyega
pyar kar lun rukh-e-raushan ki balaen le lun
qadam aankhon se laga lun to chale jaiyega
mere hone hi ne ye roz-e-siyah dikhlaya
apni hasti ko mita lun to chale jaiyega
chhod kar zinda mujhe aap kahan jaenge
pahle main jaan se ja lun to chale jaiyega
aap ke jate hi 'bedam' ki sunega phir kaun
apni biti main suna to chale jaiyega