dil mera tera taba-e-farman hai kya karun

By

dil mera tera taba-e-farman hai kya karun
ab tera kufr hi mera iman hai kya karun
ba-hosh hun magar mera daman hai chaak chaak
aalam ye dekh dekh ke hairan hai kya karun
har tarah ka sukun hai har tarah ka hai kaif
phir bhi ye mera qalb pareshan hai kya karun
kahta nahin hun aur zamana hai ba-khabar
chehre se dil ka haal numayan hai kya karun
daman karun na chaak ye mumkin to hai magar
muztar har ek tar-e-gareban hai kya karun
sada sa ek waraq hun kitab-e-hayat ka
hasrat se ab na ab koi arman hai kya karun
har samt pa raha hun wahi rang-e-dil-fareb
hathon mein kufr ke mera iman hai kya karun
daghon ka qalb-e-zar se mumkin to hai ilaj
un ke hi dam se dil mein charaghan hai kya karun
ek be-wafa ke waste se sab kuchh luta diya
'bahzad' ab na din na iman hai kya karun

tum yaad mujhe aa jate ho

By

tum yaad mujhe aa jate ho
jab sehn-e-chaman mein kaliyan khil kar phul ki surat hoti hain
aur apni mahak se har dil mein ek tukhm-e-latafat boti hain
tum yaad mujhe aa jate ho
tum yaad mujhe aa jate ho
jab barkha ki rut aati hai jab kali ghataen uthti hain
jis waqt ki rindon ke dil se hu-haq ki sadaen uthti hain
tum yaad mujhe aa jate ho
tum yaad mujhe aa jate ho
jab meinh ki phuwaren padti hain jab thandi hawaen aati hain
jab sehn-e-chaman se ghabra kar pi pi ki sadaen aati hain
tum yaad mujhe aa jate ho
tum yaad mujhe aa jate ho
jab chaudhwin shab ka chand nikal kar dahr munawwar karta hai
jab koi mohabbat ka mara kuchh thandi sansen bharta hai
tum yaad mujhe aa jate ho
tum yaad mujhe aa jate ho
jab raat ki zulmat ghatti hai jab subh ka nur ubharta hai
jab koyal kuku karti hai jab panchhi pi pi karta hai
tum yaad mujhe aa jate ho
tum yaad mujhe aa jate ho
jab koi kisi ka hath pakad kar sair ko bahar jata hai
jab koi nigah-e-shauq ke aage rah rah kar ghabraata hai
tum yaad mujhe aa jate ho
tum yaad mujhe aa jate ho
jab chaar nigahen kar ke koi mahw-e-tabassum hota hai
jab koi mohabbat ka mara us kaif mein pad kar khota hai
tum yaad mujhe aa jate ho
tum yaad mujhe aa jate ho
aflak pe jab ye lakhon tare jagmag jagmag karti hain
jab tare gin gin kar dil wale thandi sansen bharte hain
tum yaad mujhe aa jate ho
tum yaad mujhe aa jate ho
jab raat ka badhta hai sannata chain se duniya soti hai
tab aankh meri khul jati hai aur dil ki rag rag roti hai
tum yaad mujhe aa jate ho
tum yaad mujhe aa jate ho
jab rota hai bahzad-e-'hazin' wo shair wo diwana sa
wo dil wala wo saudai wo duniya se begana sa
tum yaad mujhe aa jate ho
tum yaad mujhe aa jate ho

tum se shikayat kya karun

By

hota jo koi dusra
karta gila main dard ka
tum to ho dil ka muddaa
tum se shikayat kya karun
dekho hai bulbul nala-zan
kahti hai ahwal-e-chaman
main chup hun go hun pur-mehan
tum se shikayat kya karun
mana ki main behosh hun
par hosh hai pur-josh hun
ye soch kar khamosh hun
tum se shikayat kya karun
tum se to ulfat hai mujhe
tum se to rahat hai mujhe
tum se to mohabbat hai mujhe
tum se shikayat kya karun

tujh par meri mohabbat qurban ho na jae

By

tujh par meri mohabbat qurban ho na jae
ye kufr badhte badhte iman ho na jae
allah ri be-naqabi us jaan-e-muddaa ki
meri nigah-e-hasrat hairan ho na jae
meri taraf na dekho apni nazar ko roko
duniya-e-ashiqi mein haijaan ho na jae
palkon pe ruk gaya hai aa kar jo ek aansu
ye qatra badhte badhte tufan ho na jae
hadd-e-sitam to hai bhi hadd-e-wafa nahin hai
zalim tera sitam bhi ehsan ho na jae
hoti nahin hai waqat hoti nahin hai izzat
jab tak ki koi insan insan ho na jae
us waqt tak mukammal hota nahin hai koi
jab tak ki khud ko apni pahchan ho na jae
'bahzad' is liye main kahta nahin hun dil ki
darta hun sun ke duniya hairan ho na jae

mohabbat mustaqil kaif-afrin malum hoti hai

By

mohabbat mustaqil kaif-afrin malum hoti hai
khalish dil mein jahan par thi wahin malum hoti hai
tere jalwon se takra kar nahin malum hoti hai
nazar bhi ek mauj-e-tah-nashin malum hoti hai
nuqush-e-pa ke sadqe bandagi-e-ishq ke qurban
mujhe har samt apni hi jabin malum hoti hai
meri rag rag mein yun to daudti hai ishq ki bijli
kahin zahir nahin hoti kahin malum hoti hai
ye eajaz-e-nazar kab hai ye kab hai husn ki kawish
hasin jo chiz hoti hai hasin malum hoti hai
umiden tod de mere dil-e-muztar khuda-hafiz
zaban-e-husn par ab tak nahin malum hoti hai
use kyun mai-kada kahta hai batla de mere saqi
yahan ki sar-zamin khuld-e-barin malum hoti hai
are ai chaara-gar han han khalish tu jis ko kahta hai
ye shai dil mein nahin dil ke qarin malum hoti hai
kisi ke pa-e-nazuk par jhuki hai aur nahin uthti
mujhe 'bahzad' ye apni jabin malum hoti hai

KHushi mahsus karta hun na gham mahsus karta hun

By

khushi mahsus karta hun na gham mahsus karta hun
magar han dil mein kuchh kuchh zer-o-bam mahsus karta hun
mohabbat ki ye nairangi bhi duniya se nirali hai
alam koi nahin lekin alam mahsus karta hun
meri nazron mein ab baqi nahin hai zauq-e-kufr-o-din
main ek markaz pe ab dair-o-haram mahsus karta hun
jo lutf-e-zindagani mil raha tha ghatta jata hai
khalish jo dil mein rahti thi wo kam mahsus karta hun
tumhaare zikr par kab munhasir hai dil ki betabi
kisi ka zikr ho main chashm-e-nam mahsus karta hun
kabhi pata hun dil mein ek hashr-e-dard-e-betabi
kabhi main apne dil mein dard-o-gham mahsus karta hun
zaban par meri shikwa aa nahin sakta zamane ka
ki har aalam ko main un ka karam mahsus karta hun
ye dil mein hai jo ghabrahat ye aankhon mein hai jo aansu
is ehsan ko bhi baala-e-karam mahsus karta hun
khushi ki mujh ko ab bahzad kuchh hajat nahin baqi
ki gham ko bhi main ab un ka karam mahsus karta hun