baat karne ki shab-e-wasl ijazat de do

By

baat karne ki shab-e-wasl ijazat de do
mujh ko dam bhar ke liye ghair ki qismat de do
tum ko ulfat nahin mujh se ye kaha tha main ne
hans ke farmate hain tum apni mohabbat de do
hum hi chuke sahar-e-wasl manana hi na tha
ab hai ye hukm ki jaane ki ijazat de do
muft lete bhi nahin pher ke dete bhi nahin
yun sahi khair ki dil ki hamein qimat de do
kam nahin pir-e-kharabaat-nashin se 'bekhud'
mai-kasho to use mai-khane ki khidmat de do

donon hi ki jaanib se ho gar ahd-e-wafa ho

By

donon hi ki jaanib se ho gar ahd-e-wafa ho
chahat ka maza jab hai ki tum bhi mujhe chaho
ye hum nahin kahte hain ki dushman ko na chaho
is chah ka anjam magar dekhiye kya ho
shamshir se badh kar hain hasinon ki adaen
be-maut kiya qatl un achchhon ka bura ho
mashuq tarah-dar ho andaz ho achchha
dil aae na aise pe to phir dil ka bura ho
pura koi hota nazar aata nahin arman
un ko to ye zid hai ki hamara hi kaha ho
tum mujh ko pilate to ho mai sina pe chadh kar
us waqt agar koi chala aae to kya ho
wada wo tumhaara hai ki lab tak nahin aata
matlab ye hamara hai ki baaton mein ada ho
khanjar ki zarurat hai na shamshir ki hajat
tirchhi si nazar ho koi banki si ada ho
khali to na jaen dam-e-rukhsat mere nale
fitna koi utthe jo qayamat na bapa ho
chori ki to kuchh baat nahin mujh ko bata do
mera dil-e-betab agar tum ne liya ho
un se dam-e-raftar ye kahti hai qayamat
fitne se na khali koi naqsh-e-kaf-e-pa ho
bad-zan hain wo is tarah ki surma use samjhen
bimar ki aankhon mein agar nil dhala ho
khat khol ke padhte hue darta hun kisi ka
lipti hui khat mein na kahin meri qaza ho
marna hai usi ka jo tujhe dekh ke mar jae
jina hai usi ka jo mohabbat mein jiya ho
hai dil ki jagah sine mein kawish abhi baqi
paikan koi pahlu mein mere rah na gaya ho
mujh ko bhi kahin aur se aaya hai bulawa
achchha hai chalo aaj bhi wada na wafa ho
'bekhud' ka fasana to hai mashhur-e-zamana
ye zikr to shayad kabhi tum ne bhi suna ho

adu ke takne ko tum idhar dekho udhar dekho

By

adu ke takne ko tum idhar dekho udhar dekho
magar hum tum ko dekhe jaen tum chaho jidhar dekho
ladai se yunhi to rokte rahte hain hum tum ko
ki dil ka bhed kah deti hai tum chaho jidhar dekho
adaen dekhne baithe ho kya aaine mein apni
diya hai jis ne tum jaise ko dil us ka jigar dekho
sawal-e-wasl par kuchh soch kar us ne kaha mujh se
abhi wada to kar sakte nahin hain hum magar dekho
na karna tark 'bekhud' mohtasib ke dar se mai-khwari
kahin dhabba laga lena na apne nam par dekho