taDKHan

By

koi shisha chatakhta hai
kisi billor ki tadkhan mere kanon tak aati hai
sutun-e-ustukhwan jis par mera baam-e-shikasta hai yakayak dol jata hai
meri gardan se kuchh niche jahan ye ridh ki chob-e-sitada kapkapi mein hai
wahin wiswas ke aur khauf ke aur yas ke jinnat wahshat rag mein apna qadimi git gate hain
tanaw is tarah jaise tanab-e-jaan khinchti ho
dabao is tarah ka hai main jaise qulzum-e-tarik ki gahraiyon mein hun
ki sab par zau-fishan suraj jahan saya nahin karta
so rang o raushni ke aur hararat ke sandese bhi nahin aate
lahu jun bahr-e-ashufta sar-e-uftan ke sahil se damadam sar patakhta hai
koi shisha chatakhta hai
kisi billor ki tadkhan mere kanon tak aati hai

sote mein muskuraate bachche ko dekh kar

By

teri makhmur si muskan abhi dekhi to yaad aaya
meri muskan par ek din mujhe man ne bataya tha ki chhota tha to aksar nind mein main muskuraata tha
(uluhi ungliyon ki chhed ka mitha tarannum mere lab par raqs karta tha)
ki jaise gudgudi ke ek latif ehsas ki qulqul se meri nind hansti thi
ye guzre kal ka qissa hai, wo guzre kal ki basti thi
khuda ka aur man ka aur bachpan ka zamana tha
wo jis mein ji raha tha main asatiri zamanon ka koi pahla fasana tha
ki ahd-e-be-khuda mein be-aman be-saeban hun main
sau nind aati nahin mujh ko, aur aae bhi to dar ki chap se har khwab kanp utthe
sau marg-e-khwab ki rut mein
teri makhmur si muskan abhi dekhi to viran-khana-e-lab se dua nikli
khuda ki aur teri chhed yunhi umar bhi thahre
uluhi ungliyon ka lams daim mo'tabar thahre
tere har khwab ke us par ek khwab-e-digar thahre

Nostalgia

By

wo din kitne munawwar the
kisi ko bazuon mein be-tarah bharne ki khwahish se
ayagh-e-jism-o-jaan ek be-khudi mein jab laba-lab tha
chanaron ke badan mein srukh-ru masti dahakti thi
kuchh aisa haal besh-o-kam hamare dil ka bhi tab tha
wo din kitne munawwar the
ki bachpan ki hasin shamon ke sae baat karte the
tu jaise dur ufuq qulqul se hansta tha, jahan rab tha
ki har lazzat zaban ko yaad ke name sunati thi
ki har khushbu se paiwasta koi pichhla jahan jab tha
mohabbat dil ke khali dasht mein jab sair karti thi
so is taraj ke aage hamein kuchh hosh hi kab tha
khushi ka narm-par tair badan mein sarsaraata tha
to aansu bhi umadte the, khushi ka ye bhi ek dhab tha
wo din kitne munawwar the
tahi-kesa zamane sarkhushi se jab chhalakte the
bhare din jis se khali hain tahi kison mein wo sab tha

mushkil

By

khuda ko yaad karta hun to man ki yaad aati hai
abhi azalon se gardan chaak ki mitti ka nam aaankhon mein raushan tha ki main ne man ko dekha tha
mujhe muskan ka pahla sahifa yaad hai ab tak
ki dil jis ki tilawat se sakun ke ghunt bharta tha
ki jis ki lau, agarche wo na sharqi thi na gharbi thi
magar do nain ke billor mein kuchh yun bhadakti thi
ki mere sharq o gharb ek nur ke haale mein aiman the
(khuda gar nur hai to man ki aaankhon ke siwa kin taqchon ko zeb deta hai)
khuda gar radd na kar deta to main aaankhon se zau karti isi lau ki qasam khata
mohabbat ke muqaddas roghan-e-zaitun se jo khud mein bhadakti thi
mujhe bhula nahin ab tak
wo pahla lams jis se meri qismat ki lakiron mein abhi tak tabnaki hai
mohabbat ka wo jibrail mujh se baat karta tha to main sarshaar hota tha
main darta hun khuda ke rizq ka kufran karne se
magar wo chashni jo rizq mein us lams ki shirkat se thi ab khwab lagti hai
so man ke baad ek gambhir mushkil mein pada hun main
kuchh aisa hai ki mujh ko rabt kuchh baqi nahin ab nuriyan-e-lams-o-khanda ki hikayat se
so main ab lams o khanda ke sahifon ke bina aajiz hun rab ko bhi samajhne se
kuchh aisa hai
ki jaise main kisi bhuli hui ummat ke ek matruk mabad mein abas fariyaad karta hun
khuda ko yaad karta hun

meri ek buri aadat thi

By

meri ek buri aadat thi
tu meri aadat ke hathon kaisi zich aur kitni diq thi
jab hairat ki ungli thame tere sath chala karta tha
ek shirin muskan ki belen mere tan bute ke upar istehqaq se chadhti thin
aur ek lams ka gata pani nas nas dip jalata tha
lams ke jugnu aur muskan ki titli mere khilaune the
in donon ki duri sahna jine jaisa mushkil tha
in ko pallu mein bandhe tu jab bhi dur kahin jati thi
main wiswas ki dor se lipta pichhe pichhe aa jata tha
sab logon se, har raste se tera pata puchha karta tha
ab hairat ki ungli thame tu ek aise des gai hai
jis ke sab bazar aur galiyan, sare ghar aur sab chaubare
gahri dhund mein sar-basta hain, guzre kal se paiwasta hain
main is dhund ke chaurahe par nam aaankhon ko ponchh raha hun
rote rote soch raha hun
kis ko rokun kis se puchhun kya meri man ko dekha hai?
is raste se ho ke gai thi
apni ek buri aadat se kaisa zich aur kitna diq hun

ek KHwab

By

purani qabren adhure chehre ugal rahi thin
adhure chehre purani qabron ki sard-za bhurbhuri udasi jo apne upar gira rahe the
to aariz o chashm o lab ki tashkil ho rahi thi
wo ek kun jo hazar sadiyon se multawi tha ab us ki tamil ho rahi thi
qubur-e-khasta se gah khezan o gah uftan, hujum-e-isyan
har ek rishte se, har talluq se mawara tha
gae dinon ki mohabbaton ko, raqabaton ko, saubaton ko bhula chuka tha
hujum apne azal ke maqsum ke mutabiq
khud apne anjam ke junun mein kashan kashan rah katta tha
zamana apne jamal ko tark kar chuka tha
jalal us ke buzurg chehre ki har shikan mein dubak gaya tha
buzurg chehra, hameshgi ka qadim chehra
azal se is din ka muntazir tha
ki kab ye amboh-e-khaksaran
khud apne aamal ke khanakte hue salasil mein gharq aae
gunah barte sawab pae