tumhaari yaad ka ek daera banati hun

By

tumhaari yaad ka ek daera banati hun
phir is mein rahne ki koi jagah banati hun
wo apne gird uthata hai rose diwaren
main us ki samt naya rasta banati hun
zamana badh ke wahi ped kat deta hai
main jis ki shakh pe ek ghonsla banati hun
wo ghol jata hai nafrat ki talkhiyan aa kar
main chahaton ka naya zaiqa banati hun
khayal-o-harf taghazzul mein dhaal kar 'bilqis'
main apne dard sabhi ghazliya banati hun

sau sadiyon ka nauha hai

By

sau sadiyon ka nauha hai
tum kahte ho naghma hai
dhul udati jhiryon mein
tahzibon ka malba hai
mitti ke do kuzon mein
kuchh khwabon ka girya hai
resham hi se udhdega
ye phulon ka bakhiya hai
jitna bhi tum saf karo
dhabba aakhir dhabba hai
is ghar ki virani ka
jangal jaisa huliya hai
dar aati hai chupke se
yaad pe kis ka pahra hai
aankhon ki virani se
dil ko lahaq khatra hai

rang le kar naya udasi ka

By

rang le kar naya udasi ka
koi manzar bana udasi ka
phir koi dastan chhedi gai
phir bana daera udasi ka
meri aankhon mein raqs-e-virani
dekh kar dil phata udasi ka
main ne kamre mein jis taraf dekha
naqsh banta gaya udasi ka
mushtamil hai hazar sadiyon par
pal wo thahra hua udasi ka
sherwani kharid li us ne
main ne zewar liya udasi ka

musafiron ka yahan se guzar nahin hai kya

By

musafiron ka yahan se guzar nahin hai kya
tumhaare shahr mein koi shajar nahin hai kya
kisi bhi waqt nigahen ye pher sakta hai
tumhein zamane ki kuchh bhi khabar nahin hai kya
jo tira-bakhti ka katib mila to puchhungi
mere nasib mein koi sahar nahin hai kya
nikalte ho bahu ko jo ghar se nange sar
tumhaare zehn mein beti ka ghar nahin hai kya
khurach ke dekhungi hathon ki sab lakiron ko
wafa nibhane ka un mein hunar nahin hai kya
tum aaine se mukhatab ho aaj-kal 'bilqis'
tumhaare ghar mein koi bhi bashar nahin hai kya

laga ke naqb kisi rose mar sakte hain

By

laga ke naqb kisi rose mar sakte hain
purane dost naya rup dhaar sakte hain
hum apne lafzon mein surat-gari ke mahir hain
kisi bhi zehn mein manzar utar sakte hain
ba-zid na ho ki teri pairwi zaruri hai
hum apne aap ko behtar sudhaar sakte hain
wo ek lamha ki jis mein mile the hum donon
us ek lamhe mein sadiyan guzar sakte hain
hamari aankh mein jadu bhara samundar hai
hum us ka aks nazar se nithaar sakte hain

karun kya saKHt mushkil aa paDi hai

By

karun kya sakht mushkil aa padi hai
meri dahliz par chahat khadi hai
maqam-e-zabt hai ai dil sambhalna
judai ki ghadi sar par khadi hai
rasai kab dilon tak pa saki wo
mohabbat jo kitabon mein padi hai
shikasta hain mere aasab yun bhi
ana se jang ek muddat ladi hai
kai din se barahna mere dil mein
talluq ki koi mayyat padi hai
use milna bhi hai qaid-e-musalsal
judai ki bhi apni hathkadi hai