wo: ek

By

main jab us se milne jata hun akele raste par
an-ginat aankhen sitaron sang-rezon pattiyon ki
mere qadmon par jami hoti hain lekin
mere sar par hath hota hai kisi ka
jab mere kapdon ke gahre zakhm be-awaz jeben
bhar nahin sakte tamannaen sar-e-mizhgan-e-ghurbat
mere dil mein phut kar roti hain lekin
mere sar par hath hota hai kisi ka
go tasawwur ke bhayanak jangalon mein din-dahade
an-ginat gham ki chudelen zahr ki ghamsan kheti
daman-e-ehsas par boti hain lekin
mere sar par hath hota hai kisi ka

pyar hai wo

By

nannhi munni dudh ki khushbu lundhati gudhliyon chalti mohabbat bantti
tutlahaton ka qafila-salar hai wo
ras se bhaari hont chandan si mahakti zulf amrit se bhare
ulte katoron lajlaji lazzat se bojhal tahniyon ka khandaqon qoson
tikonon ka alam-bardar hai wo
jhukti kamron barf se baalon badan ke dukhte jodon jannati pairon
ki khatir surat-e-dastar hai wo
subh-e-takhliq-o-tasawwur hai jawani ki do-pahri
visal-e-zist ka tyauhaar hai wo
pyar hai wo

nazm

By

aashiq wo ahl-e-hawas ke bich mein do ek aisi trophiyan thin
sab ko ye malum tha teamen barabari ki rahengi
sab badan ke hausle hain jeb ki karigari hai
jo retire ho gaya wo gerwe kapde pahan kar
ruh ki mala ke ek sau aath dane bechta hai
sab badan ke hausle the
pensionen tankhwah ka aksar tihai hi rahi hain
aur qimat dhire dhire umr ki surat falak ko chhu rahi hai
ek aur nau ki ye nisbat
pople munh mein kasili rakh hi ka zaiqa deti rahi hai
wo khuda ke nek bande hain ki jin ki jeb mein paisa nahin hai
muflisi ke board ghar ghar muft bante ja rahe hain
qabz se badh kar koi neamat nahin hai
ladkiyan lipstick suno skurts jeans mangti hain
jeb ki karigari thi
sab badan ke hausle the jeb ki karigari thi

nam us ka

By

nam jab leta hun honton par zaban ko pherta hun kyun ki
us ke nam mein us ki zaban us ke labon ka zaiqa hai
jab badan wo nam leta hai to aise jhunjhunata hai ki jaise
us ki zahri ungliyon ne chhu liya ho
nam us ka us ke apne bazuon ke daere ki tarah
shorida-badan ko gherta hai
nam us ka paniyon mein ghol kar pi lo zaban luknat-zada
ho jae hai, aankhen alag chadh jaen hain, ji kuchh kahe
lab kuchh kahe hai,
nam us ka zanu-e-nakatkhadai par likhe se chhatiyon
mein dudh chhalkane lage hain
nam us ka siyahiyon mein gholne se sher la-fani likhe hai
nam banjar dhartiyon mein thoda thoda sa chhidak dene se
har pal bel-bute khinch de hai
nam us harjai ka lene se har sankal khule hai
us ko us ke nam se aawaz de dije to chaaron samt
jo koi sune hai us ke lakhon nam dohrane lage hai
aur kabhi us nam ke sunte hi andar se koi puchhe hai
kis ka nam lo ho
aur tab ehsas howe hai ki us ka ho ki apna ho
wahi ek nam to hai
aur tab ehsas howe hai wo hum mein hai ki us ka nam
hum hain
aur tab ehsas howe hai ki yusuf se zulekha sham se
radha ke hijje hi juda hain warna chaaron
ka tamasha ek sa hai

eada-e-hikayaten

By

wo din jo guzre hain bholi bisri hikayaten hain
ki doston se na koi shikwa na dushmanon se shikayaten hain
kuchh aisa lagta hai jaise ab tak main rail mein tha
bura bhala jo tha aane jaane ke khel mein tha
shajar shajar thin hiqaraten bhi mohabbaten bhi
shuur-e-gham ke muzahire bhi masarraten bhi
jo muskurae the un ke haalat mukhtalif the
jo gham uthae the un ki raat mukhtalif thi
jo sath chalte the un ki majburiyan bahut thin
kuchh itne majbur the ki apnon se dur the duriyan bahut thin
ye jitna jo kuchh hai jaisa kuchh hai kuchh itna dilchasp hai ki ek din
main us taraf aaunga dobara
agar meri baat mein hua to main khud ko dohraunga dobara