zabt-e-nala dil-e-figar na kar

By

zabt-e-nala dil-e-figar na kar
aag ko aur shoala-bar na kar
shab-e-gham dagh-e-dil ki shama jala
chand-taron ka intizar na kar
shauq se phul chun chaman mein magar
khar-o-khas ko zalil-o-khwar na kar
mah-o-anjum pe dal badh ke kamand
past zarron par apna war na kar
gamzan ho jo shauq-e-manzil hai
rah ke pech-o-kham shumar na kar
aur paida kar apne khun se phul
raat-din matam-e-bahaar na kar
subh ka saz bhi to chhed zara
sham ka zikr bar bar na kar
sar-nigun ho na maut ke aage
zindagani ko sharmsar na kar
kuchh mizaj-e-gul-o-saman bhi samajh
sirf nazzara-e-bahaar na kar
aag se khelna nahin achchha
bhul kar bhi kisi ko pyar na kar
dusron ka to zikr ishq mein kya
apne dil par bhi eatibar na kar
khar ko bhi nazar mein rakh 'rana'
gul se andaza-e-bahaar na kar

mohabbat naghma bhi hai saz bhi hai

By

mohabbat naghma bhi hai saz bhi hai
shikast-e-saz ki aawaz bhi hai
hai niyyat hi mein dozakh aur jannat
yahi dam-soz bhi dam-saz bhi hai
na toden mera saz-e-dil na toden
ki is mein aap ki aawaz bhi hai
mohabbat yun to hai ek lafz-e-sada
jo samjho to fasana-saz bhi hai
qafas parwaz-e-dushman to hai lekin
qafas ek dawat-e-parwaz bhi hai
yahi gul hai jo taswir-e-khamoshi
shikast-e-ghuncha ki aawaz bhi hai
nahin zanjir-e-pa hi ye tasawwur
jo bandh jae par-e-parwaz bhi hai
main tera raaz kholun bhi to kyun kar
ki tera raaz mera raaz bhi hai
ye duniya hai jo khwab-e-naz 'rana'
yahi tabir-e-khwab-e-naz bhi hai

KHayal ko zau nazar ko tabish nafas ko raKHshandagi milegi

By

khayal ko zau nazar ko tabish nafas ko rakhshandagi milegi
bhadak utha soz-e-gham jo dil mein to har kahin raushni milegi
khalish ki tah mein sukun milega alam ki tah mein khushi milegi
baghaur dekho to maut mein bhi tumhein nai zindagi milegi
maqam-e-insan maqam-e-yazdan mein fasla hai bas ek qadam ka
jahan malegi khudi ki sarhad wahin had-e-be-khudi milegi
ye zauq-e-sajda shikast-khurda tabiaton ki hai khud-farebi
bashar ki taslim ki tahon mein bashar ki kam-himmati milegi
nigah jitni bulandi hogi ye utni hi arjumand hogi
ba-qadr-e-qurb-e-falak kiran mein hararat-o-raushni milegi
hai khud-shanasi jahan-shanasi jahan-shanasi khuda-shanasi
mili jo tujh ko khudi ki daulat to daulat-e-sarmadi milegi
agar hai teri nigah baaligh agar hai tera shuur pukhta
to jehl ki zulmaton hi se tujh ko mashal-e-agahi malegi
gham-o-musarrat milenge baham to zindagi bhi chamak uthegi
ye ru hai manfi ye ru hai musbat milegi ye raushni milegi
rah-e-talab ke safar mein 'rana' sukun hai khwab-o-khayal yaksar
qadam qadam thokaren lagengi nafas nafas barhami milegi

duniya mein wafa-kesh bashar DhunDh raha hun

By

duniya mein wafa-kesh bashar dhundh raha hun
main nakhl-e-sanobar mein samar dhundh raha hun
main apni duaon mein asar dhundh raha hun
tarik fazaon mein qamar dhundh raha hun
main aur tamasha-e-gul-o-rang pe mail
khoya hua ek zauq-e-nazar dhundh raha hun
wo subh-e-qayamat mein hue jate hain pinhan
main sham-e-musibat ki sahar dhundh raha hun
khushbu ki tarah khalwat-e-gul se hun ramida
zindan-e-tamanna se mafar dhundh raha hun
tashbih ke afsun ka asar puchho na 'rana'
shamshir mein us but ki nazar dhundh raha hun

aarzuen nazr-e-dauran nazr-e-jaanan ho gain

By

aarzuen nazr-e-dauran nazr-e-jaanan ho gain
kya bahaaren thin jo do phulon pe qurban ho gain
gham ki shirin talkhiyan jine ka saman ho gain
bijliyan khun-e-rag-e-jaan-e-gulistan ho gain
ruh-e-gham ruh-e-tarab ruh-e-ajal ruh-e-hayat
jab ye baham mil gain taqdir-e-insan ho gain
yaad hai un ki ki ek muaj-e-jamal-o-rang-o-bu
shamen kaliyon ki si us dil mein farozan ho gain
aansuon ke zabt se betabi-e-dil badh gai
is tarah simtin ye bunden ek tufan ho gain
ek wo hain jin ke virane bane hain bastiyan
ek hum hain bastiyan bhi jin ki viran ho gain
un ka jalwa dekhte hi ud gae hosh-o-hawas
kashtiyan sahil se lag kar nazr-e-tufan ho gain
hadson ne kar diya paida khayal-e-hifz-e-jaan
bijliyan hi wajh-e-tanzim-e-gulistan ho gain
chhat gain 'rana' khunuk aahon se gham ki zulmaten
badliyan thandi hawaon se pareshan ho gain

aap apne raqib hain hum log

By

aap apne raqib hain hum log
kis qadar bad-nasib hain hum log
daulat-e-dard se hain mala-mal
go ba-zahir gharib hain hum log
hum ko har haal mein ujadna hai
aashiqon ka nasib hain hum log
jitne apni khudi se dur hue
utne un se qarib hain hum log
phir na sanwre bigad ke hum shayad
dushmanon ka nasib ka nasib hain hum log
maut se khelte hain sham-o-sahar
zindagi ke qarib hain hum log
un ki nazron se dur hain phir bhi
un ke dil se qarib hain hum log
hum se puchho haqiqaten gham ki
der se gham-nasib hain hum log
kis ko ja kar sunain haal apna
ajnabi hain gharib hain hum log
dosh-e-hasti pe haar hain 'rana'
aaj-kal ke adib hain hum log