partaw-e-husn ek hai aur aaina-KHane bahut

By

partaw-e-husn ek hai aur aaina-khane bahut
ek haqiqat ne bana dale hain afsane bahut
rukhsat ai chaak-e-gareban dast-e-wahshat alwidaa
badh chuke hain ab junun ki had se diwane bahut
kho na jaen kasrat-e-asnam mein wahdat-parast
bandagi ke zehn mein hote hain but-khane bahut
sham-e-turbat par meri aate hue jalte hain par
sham-e-mahfil par to aa jate the parwane bahut
'bismil' is dilli ke in sunsan viranon mein aah
gunjte hain aaj bhi ibrat ke afsane bahut

nigah-e-naz teri jab se karsaz nahin

By

nigah-e-naz teri jab se karsaz nahin
jigar mein dard nahin qalb mein gudaz nahin
nafas nahin koi aisa ki jaan-gudaz nahin
ye mera ishq hai zahid teri namaz nahin
jise farishton se qudrat chhupa ke rakhti hai
sharab-khane mein wo raaz koi raaz nahin
hawas ki zindagi-e-jawedan pe lanat hai
bala se umr-e-mohabbat agar daraaz nahin
talluqat mohabbat ki jaan hoti hai
wo ek nigah ba-zahir jo dil-nawaz nahin
teri jafaon pe hai naz jis qadar mujh ko
mujhe wafaon pe bhi apni itna naz nahin
agar kisi ki mohabbat mein koi raaz na ho
to phir kisi ki mohabbat to koi raaz nahin
nigah bhi jurm kabhi jurm-e-be-nigahi bhi
kisi usul pe wo jalwa-gah-e-naz nahin
main be-niyaz sahi tum se bhi mohabbat main
magar tumhaari mohabbat se be-niyaz nahin
tum apne husn ki kha kar qasam mukar jao
agar tumhaari mohabbat ko mujh pe naz nahin
kal un ke jalwon pe tha mera ikhtiyar-e-nazar
aur aaj apni nazar ka bhi mein majaz nahin
nigah-e-naz ke allah re ye ghalat andaz
koi ye samjhe abhi un ko mashq-e-naz nahin
sunai deti hai mahsus jaan-o-dil ho kar
wo ek sada jo hanuz aashna-e-saz nahin
tumhaari bazm ki ye dost-dariyan tauba
kisi se jaise kisi ko kuchh ehtiraaz nahin
khula hua hai wo bab-e-qubul-e-mai-khana
agar nahin dar-e-tauba bala se baz nahin
teri ada-e-taghaful ki jaan se zalim
wo ek ada teri jis par tujhe bhi naz nahin
ab apne jalwon ka lillah ehtiram muaf
nigah-e-shauq ko ab tab-e-imtiyaz nahin
dobara kis se mili ishq ki nigah-e-garm
zamana-soz hai 'bismil' zamana-saz nahin

naya saman hai naya ek jahan hai aur hum hain

By

naya saman hai naya ek jahan hai aur hum hain
nai zamin naya aasman hai aur hum hain
nae maqam nae marhale nai rahen
nae irade naya karwan hai aur hum hain
hamare naqsh-e-qadam hain ye mehr-o-mah-o-nujum
hamari rah sar-e-kahkashan hai aur hum hain
wo jis hayat pe thi marg-e-na-gahan tari
wahi hayat hai aur jawedan hai aur hum hain
gai wo qissa-e-ahd-e-kuhan ki baat gai
naya zamana nai dastan hai aur hum hain
hum apne sud-o-ziyan ke hain aap zimmedar
hamara sud hamara ziyan hai aur hum hain
wahi qafas jo kabhi aashiyan hamara tha
wahi qafas hai ki ab aashiyan hai aur hum hain
hue hain dair-o-haram se hamare kuchh paiman
hamare un ke khuda darmiyan hai aur hum hain
har ek rang ke phul us mein hain sharik-e-bahaar
hamara mushtarak ek gulistan hai aur hum hain
hamein bhi zehn-o-fikr apne badalne hain 'bismil'
nae khayal ka hindostan hai aur hum hain

nahin malum paenge sukun ahl-e-jahan kab tak

By

nahin malum paenge sukun ahl-e-jahan kab tak
khuda jaane rahega is zamin par aasman kab tak
ye afsana abhi to zer-e-unwan-e-karam bhi hai
sunae jaun main un ke sitam ki dastan kab tak
qafas mein to mujhe jab tak bhi rahna ho magar yarab
tasawwur mein mere jalta rahega aashiyan kab tak
zamir aaluda-e-baatil zaban aazurda-e-na-haq
teri mahfil mein rah kar hum milaen han mein han kab tak
ghazab hai thes lagna ishq ki khuddar fitrat ko
bas ai chashm-e-karam ab iltifat-e-raegan kab tak
dil-e-mayus mein kuchh khar-e-hasrat se khatakte hain
khuda jaane rahengi rakh mein chingariyan kab tak
nahin jab pas-e-wada to mukar bhi jaoge ek din
badal jaega jab dil to na badlegi zaban kab tak
kabhi ummid ki nazron se dekh apni taraf 'bismil'
nigah-e-yas se dekhega su-e-asman kab tak

na ab wo ishq na wo ishq ki adaen rahin

By

na ab wo ishq na wo ishq ki adaen rahin
na ab wo husn na wo husn ki hawaen rahin
na ishq ishq raha ab na husn husn raha
na wo wafaen rahin ab na wo jafaen rahin
wo husn-o-ishq ke raaz-o-niyaz hi na rahe
na wo khataen rahin ab na wo sazaen rahin
mizaj-e-husn-o-mohabbat mein sadgi na fareb
na wo yaqin raha ab na wo daghaen rahin
ghurur-e-husn ki be-iltifatiyon ki tarah
nigah-e-shauq rahi ab na iltijaen rahin
na wo ayaadat-o-taskin na wo dil-e-ranjur
na ab wo dard-e-mohabbat na wo dawaen rahin
na zindagi se wo nafrat na maut ki hasrat
wo bad-duaen rahin ab na wo duaen rahin
rabab-e-isq na mizrab-e-husn kuchh bhi nahin
wo naghma-ha-e-tamanna na wo sadaen rahin
na mai-kada na wo mai-khwar aur na wo saqi
na wo chaman na bahaaren na wo ghataen rahin
badal gae sahar-o-sham-e-zindagi 'bismil'
wo zindagi ke manazir na wo fazaen rahin

meri tarah koi na-kaamyab ho na saka

By

meri tarah koi na-kaamyab ho na saka
kisi nigah mein bhi intikhab ho na saka
khayal-o-khwab mein bhi kaamyab ho na saka
mera khayal kabhi un ka khwab ho na saka
chaman hazar ba-ranai-e-bahaar raha
tumhaara husn tumhaara shabab ho na saka
meri nigah ke andaz-e-shauq jab dekhe
hijab kar na sake wo hijab ho na saka
jahan-e-ishq mein wo ham-mizaj-e-fitrat hun
mere khilaf koi inqalab ho na saka
kahan wo ahd-e-shabab aur talatum-e-jazbaat
sukun-pazir kabhi iztirab ho na saka
nigah-e-shauq se jab tak na chhed-chhad hui
tera shabab mukammal shabab ho na saka
nigah-e-shokh ki bebakiyan koi dekhe
ki jaise koi kabhi kaamyab ho na saka
harim-e-naz ki allah re rifaten 'bismil'
khayal mein bhi koi baryab ho na saka