tum ho jab mere liye hain do-jahan mere liye

By

tum ho jab mere liye hain do-jahan mere liye
ye zamin mere liye ye aasman mere liye
is tarah jazbaat-e-azadi bahal jaenge kya
ban raha hai kyun qafas mein aashiyan mere liye
main chala jaun na gulshan chhod kar qabl-az-bahaar
kyun girin sare chaman par bijliyan mere liye
ro raha hun aaj main sare jahan ke waste
roega kal dekhna sara jahan mere liye
iztirab-e-shauq se kya kya hui hain laghzishen
iltifat-e-yar ne jab imtihan mere liye
hai mohabbat kab rahin-e-rah-o-rasm-e-tahiri
bandagi hai be-niyaz-e-astan mere liye
be-panahi hai yahi 'bismil' jo husn-o-ishq ki
hogi na-kafi hayat-e-jawidan mere liye

suna hai ek jahan is jahan se pahle tha

By

suna hai ek jahan is jahan se pahle tha
ajab jahan tha agar aasman se pahle tha
agarche sajde hain mamnun aastan lekin
mazaq-e-sajda mujhe aastan se pahle tha
tumhin kaho kabhi tum ne suna tha khush ho kar
tumhaara zikr jo mere bayan se pahle tha
qubul-e-khatir-e-ushshaq ho ke rah na gaya
tera fasana meri dastan se pahle tha
na shauq-e-rahzani-e-dil na zauq-e-ghaarat-e-jaan
ajab tariq mere karwan se pahle tha
bahaar thi na khizan barq thi na tha sayyaad
chaman na tha jo mere aashiyan se pahle tha
isi jahan ko inkar tha qayamat ka
yahi jahan jo ek naujawan se pahle tha
kuchh is tarah hai mujhe dard-e-ishq ka ehsas
ye jaise mujh ko yunhi jism-o-jaan se pahle tha
wo naz ban ke phir aakhir niyaz ho ke raha
unhen ghurur jo meri fughan se pahle tha
zahe wo bazm ki hota hai rose ye mahsus
ki jaise koi talluq yahan se pahle tha
hunuz dil mein usi shadd-o-mad se hai 'bismil'
wo hausla jo mujhe imtihan se pahle tha

sharab-e-ishq mein kya jaane kya tasir hoti hai

By

sharab-e-ishq mein kya jaane kya tasir hoti hai
kahin ye zahar hoti hai kahin iksir hoti hai
na mafhum us ka furqat hai na mansha wasl hai us ka
mohabbat asl mein ek khwab-e-khud-tabir hoti hai
juda ho kar isi mein jazb ho jati hai phir ek din
mohabbat aaftab-e-husn ki tanwir hoti hai
mera zauq-e-nazar ho ya tera faiz-e-tasawwur ho
mere aaine mein aksar teri taswir hoti hai
shikayat bhi mohabbat hi mein dakhil hai magar 'bismil'
mohabbat be-niyaz-e-shikwa-e-shikwa-e-taqdir hoti hai

shab-e-gham aish ka muzhda sunane kaun aata hai

By

shab-e-gham aish ka muzhda sunane kaun aata hai
ye mere aansuon mein muskurane kaun aata hai
thahar sakta nahin sine mein jab dil muztarib ho kar
sukun ban kar mere pahlu mein jaane kaun aata hai
kuchal deti hai jab ehsas ko sanjidgi gham ki
shararat se mera dil gudgudane kaun aata hai
bhayanak tirgi mein gham ki jab dam ghutne lagta hai
charagh-e-kushta-e-ishrat jalane kaun aata hai
shab-e-gham dil pe chha jata hai jab ek huzn-e-be-khwabi
nashat-e-ruh ban ban kar sulane kaun aata hai
wafur-e-yas kar deta hai jab labrez-e-gham dil ko
khushi ban kar mere dil mein samane kaun aata hai
ajal ke tez qadmon ki jab aahat aane lagti hai
ba-andaz-e-masihai sirhane kaun aata hai
mera dil dubne lagta hai jab gham ke samundar mein
meri kashti ko sahil se lagane kaun aata hai
nazar aata hai jis mein ishrat-e-mazi ka mustaqbil
mujhe is khwab-e-ghamgin se jagane kaun aata hai

saqi ke nam-lewa maiKHane rah gae hain

By

saqi ke nam-lewa maikhane rah gae hain
mai-khanon mein bhi khali paimane rah gae hain
be-maqsad-e-junun hain majnun jo dasht mein hain
laila nahin rahi hai diwane rah gae hain
ban kar jo ek haqiqat duniya pe chha gae the
duniya mein aaj un ke afsane rah gae hain
mahfil rahe tumhaari mahfil mein tum raho ab
wo kya rahen jo ho kar begane rah gae hain
pahchanna ab un ko dushwar ho gaya hai
jo log apne jaane-pahchane rah gae hain
qabron mein sone walo tum ko pukarte hain
ishrat-kade jo ban kar gham-khane rah gae hain
dekh ai nigah-e-ibrat aasar-e-ahd-e-mazi
aabaadiyon ke ho kar virane rah gae hain
ai gosh-e-ibrat un ko tu sun sake to sun le
ye kuchh haqiqaton ke afsane rah gae hain
ai sham-e-subh-e-mahfil un ko jala ke bujhna
do-chaar aur tere parwane rah gae hain
diwanon ko jo 'bismil' badnam kar rahe hain
diwanon mein abhi kuchh farzane rah gae hain

rahne ko hum qafas mein rahe aashiyan se dur

By

rahne ko hum qafas mein rahe aashiyan se dur
lekin chaman mein thi ye jagah aasman se dur
is qurb se jo sajdon mein tujh se hua mujhe
sajde bhi hain muqablatan aastan se dur
jitna main aashiyan mein qafas se qarib tha
utna hi ab qafas mein hun main aashiyan se dur
hasil na jis ki ruh ko ho qurb-e-mai-kada
wo na-murad rahmat-e-pir-e-mughan se dur
tujh se bhi dur tak koi aisi jagah nahin
mahfil mein apni to nazar aae jahan se dur
is na-murad se jo tere aastan pe hai
achchha hai bad-nasib jo hai aastan se dur
ab tak koi bata na saka rah-e-ishq mein
manzil kahan se pas hai 'bismil' kahan se dur