zaban kya hai mohabbat ki guftugu kya hai

By

zaban kya hai mohabbat ki guftugu kya hai
ba-juz nigah ke paigham-e-arzu kya hai
ye jaan-e-husn-e-mohabbat hai aarzu kya hai
na ho ye dil mein to main kya hun aur tu kya hai
lahu jo garm na kar de wo aarzu kya hai
jo aarzu se na garmae wo lahu kya hai
khuda kare na kare husn se tajawuz-e-ishq
abhi to mujh se wahi kah rahe hain tu kya hai
tujhe bhi bhul gae tere dhundne wale
ye hosh bhi to nahin hai ki justuju kya hai
baja ki khun ki garmi ka nam hai insan
na ho jo garm-e-mohabbat se wo lahu kya hai
ghalat samajh ke nahin dekhta hun teri taraf
ye dekhta hun ki andaz-e-guftugu kya hai
jinhen hai tujh se mohabbat wo jaante bhi nahin
ki rashk kahte hain kis chiz ko adu kya hai
rahe ilahi mere dil ki aabru qaem
sadaf mein hai ye guhar dil mein aarzu kya hai
hai un ki jumbish-e-abru pe aabru ka madar
jo jaante bhi nahin hain ki aabru kya hai
siwae zauq-e-nazar aur kuchh nahin 'bismil'
ye phul kya hain ye phulon mein rang-o-bu kya hai

ye umr musibat ki basar ho ke rahegi

By

ye umr musibat ki basar ho ke rahegi
jab sham hui hai to sahar ho ke rahegi
afsurdagi-e-dil gul-e-tar ho ke rahegi
aah-e-sahari baad-e-sahar ho ke rahegi
khud un ke taghaful ki inayat se kisi din
un ko meri haalat ki khabar ho ke rahegi
wo barq-e-tajalli jo abhi kaba-e-dil hai
ek rose wo masjud-e-nazar ho ke rahegi
ya qabil-e-sajda hi rahega na dar-e-husn
ya meri jabin qabil-e-dar ho ke rahegi
sairab nazar hogi meri ya gul-e-tar se
ya khatm bahaar-e-gul-e-tar ho ke rahegi
ab un ki jafaen nazar-andaz na hongi
ab meri wafa madd-e-nazar ho ke rahegi
jo ghaflat-e-azadi-e-gulshan mein kategi
us raat ki zindan mein sahar ho ke rahegi

ye main hun tujh mein ab ya mujh mein tu hai

By

ye main hun tujh mein ab ya mujh mein tu hai
ye kaun ab aaine mein ru-ba-ru hai
ye dil hai aur hai tera tasawwur
zaban hai aur teri guftugu hai
unhin ka hai ye dil bhi aarzu bhi
na dil mera na meri aarzu hai
raha karta hun kuchh khoya hua sa
khuda jaane mujhe kya justuju hai
hua hun main fana-fil-ishq 'bismil'
na ab dil hai na dil ki aarzu hai

wo bhi kya din the ki jab us ka mera yarana tha

By

wo bhi kya din the ki jab us ka mera yarana tha
aap se begana wo tha khud se main begana tha
rabt-o-zabt-e-bahami ke hae wo raaz-o-niyaz
aashiqana husn tha aur ishq mashuqana tha
main agar gul tha to wo tha bulbul-e-shaida mera
aur agar wo shama tha to is ka main parwana tha
wo kabhi diwana tha mere liye laila kabhi
main kabhi us ke liye laila kabhi diwana tha
us ko tha didar hasil mujh ko nazzara nasib
mere us ke darmiyan ek jalwa-e-jaanana tha
mere kufr-e-ishq mein thi ek imani ada
us ke kafir husn mein ek ishwa-e-turkana tha
sajid-o-masjud hum baham the hum donon ka dil
kabe ka kaba tha aur but-khane ka but-khana tha
mere ashk-e-shauq-e-paiham mein thi us ki dastan
us ke andaz-e-tabassum mein mera afsana tha
jhum bhi utthi udhar kaif-e-tarb se ruh-e-naz
aur idhar honton hi par mere abhi paimana tha
hae wo shahba-e-zulf-o-kakul-o-gesu ki jab
aaftab-e-subh bhi ek sham-e-ishrat-khana tha
shamil-e-anfas the naghmat-e-aish-o-imbisat
zindagi ke saz ka har zer-o-bam shahana tha
aankh se dil mein sama jate the dil se ruh mein
zindagi-e-shauq ka har haal betabana tha
hae wo mai-khwari-e-baham ka aalam aah jab
ehtimam-e-mai baghair-e-shisha-o-paimana tha
jab milin aankhon se aankhen jab mile honton se hont
har nazar paimana thi aur har-nafas mai-khana tha
uf wo rabt-o-zabt sharm-o-shauq jab ba-hamd-digar
ek jazba mushtarak tha aur bebakana tha
wo taqaddum sharm ka ho ya tajawuz shauq ka
dakhil-e-mustasniyat-e-laghzish-e-mastana tha
uf wo fart-e-shauq jis ka nam tha ranjidagi
aalam-e-ranjidagi kis darja mahbubana tha
barhami par hae wo jurmana-ha-e-jurm-e-shauq
wajh-e-afzuni-e-shauq-e-jurm har jurmana tha
ho rahe the yun basar roz-o-shab umr-e-nashat
mehr-o-mah se ehtimam-e-zinat-e-kashana tha
be-talluq zindagi hone ka tha imkan hi kya
zindagi zulf-e-talluq thi muqaddar shana tha
runuma lekin muqaddar se hua wo ishq ke
jo talawwun husn ki fitrat mein mahbubana tha
husn to hai ek tajalli sham-e-har-mahfil-sifat
wo to kah dega ye ek andaz-e-mashuqana tha
han magar kal ishq ko dekha ki wo shorida-bakht
badh chuka tha zindagi mein maut se diwana tha
ja raha tha be-irada be-khayal-e-samt-o-rah
aur zaban par nala-e-mauzun ye mazlumana tha
chashm hai mahrum-e-surat gosh mayus-e-sada
khwab tha jo kuchh ki dekha jo suna afsana tha

wo aarzu wo tamanna wo iztirab nahin

By

wo aarzu wo tamanna wo iztirab nahin
main ab wahan hun jahan koi baryab nahin
teri nazar hai jise inqalab kahte hain
teri nazar ke siwa koi inqalab nahin
teri nigah ki shauq-afriniyan tauba
jo kaamyab hai wo bhi to kaamyab nahin
gham-e-firaq ki be-kaifiyan khuda ki panah
sharab mein bhi to kaifiyyat-e-sharab nahin
mujhe pukar rahe hain sanam-kade wale
meri duaen jo kabe mein mustajab nahin
sab inqalab the un ki nigah phirne tak
ab aasman ki gardish mein inqalab nahin
jab iltifat na tha ishtiyaq rahta tha
ab iltifat hua hai to dil ko tab nahin
wahin se uthte hain har inqalab ke baadal
wo mai-kada ki jahan koi inqalab nahin
meri nazar ko na thi tab un ke jalwon ki
ab un ke jalwon ko meri nazar ki tab nahin
badal gae hain shab-o-roz-e-zindagi 'bismil'
wo mahtab nahin ab wo aaftab nahin

waqf kar ke zindagi ki saaten tere liye

By

waqf kar ke zindagi ki saaten tere liye
apne sar lin main ne kya kya aafaten tere liye
kar liya nazzara-e-husn apni aankhon par haram
main ne radd kar din nazar ki dawaten tere liye
tere milne ke liye mumkin thin jitni suraten
main ne kar dalin wo sari suraten tere liye
dushmanon ki phabtiyan aur doston ki lan-tan
odh lin duniya ki sari lanten tere liye
baith kar teri gali mein baithne walon ke pas
khak kar lin apni shakhsi azmaten tere liye
apni izzat aap karne ka bhi jin ko haq nahin
main ne un logon ki ki hain izzaten tere liye
apni khidmat jin se lene main sharafat ko ho aar
ki hain un logon ki main ne khidmaten tere liye
kal jo meri minnaten karte the apne waste
aaj main karta hun un ki minnaten tere liye
tere qadmon ke siwa un ki talafi hi nahin
main jo bardasht ki hain zillaten tere liye
mujh ko jin ki qismaton ne kar rakha tha paemal
raund dalin main ne un ki qismaten tere liye
jin mazaron par khuda ke manne wale na jaen
main ne un par ja ke manin minnaten tere liye
kufr sharmata hai jin se jhenpta hai jin se shirk
main ne ki hain kaisi kaisi bidaten tere liye
aamilon ne farz padhwa din namazen saikdon
do ki chaar aur chaar ki do rakaten tere liye
rahat-e-darain mein bhi wo khushi mafqud hai
jis khushi se main ne jhelin aafaten tere liye
jin mein hota tha mere dil par nuzul-e-wahi-e-sher
waqf-e-ah-o-nala hain wo saaten tere liye
kash tu likkhe ki 'bismil' kuchh khabar bhi hai tujhe
kis qadar ghamgin hain meri khalwaten tere liye