yahi samjha hun bas itni hui hai aagahi mujhko

yahi samjha hun bas itni hui hai aagahi mujh ko
na ras aaegi shayad zindagi-bhar zindagi mujh ko
mila ranj-o-alam mein bhi surur-o-zindagi mujh ko
nazar aati hai aksar tirgi mein raushni mujh ko
na ab ehsas-e-ranj-o-gham na ehsas-e-khushi mujh ko
ye kis markaz pe le aai meri diwangi mujh ko
chhalak aae hain aansu jab bhi aai hai hansi mujh ko
sunati hi rahi paigham-e-gham meri khushi mujh ko
na dena tha agar kuchh ikhtiyar-e-zindagi mujh ko
to kyun ai khaliq-e-alam banaya aadmi mujh ko
siyah-bakhti hui hai saya-afgan is qadar mujh par
nazar aati hai har-su tirgi hi tirgi mujh ko
'jalis' ehsan kya kam hai ye meri bad-nasibi ka
tamiz apne parae ki to aakhir ho gai mujh ko

zau-bar isi samt hue shams-o-qamar bhi

zau-bar isi samt hue shams-o-qamar bhi
us shokh ne phera rukh-e-pur-nur jidhar bhi
mitti hai kahin dil se shab-e-gham ki siyahi
hoti hai kahin hijr ke maron ki sahar bhi
hain donon jahan ek hi tanwir ke partaw
hai ek hi jalwa jo idhar bhi hai udhar bhi
nikli thi tere jalwa-e-rangin ki khabar ko
gum ho ke wahin rah gai kambakht nazar bhi
hoti hi nahin subh nikharta hi nahin nur
hai dubi hui shab ki siyahi mein sahar bhi
kuchh un ki hasin yaad ki shamen thin farozan
kuchh nur-fishan dil mein raha dagh-e-jigar bhi
samjhen na 'jalis' aap hamein hech ki hum mein
hain aib hazaron to hazaron hain hunar bhi

tujhse tasawwuraat mein ai jaan-e-arzu

tujh se tasawwuraat mein ai jaan-e-arzu
bandhe hain hum ne sainkadon paiman-e-arzu
ai rashk-e-nau-bahaar tere intizar mein
kya kya khilae hum ne gulistan-e-arzu
phir dil mein dagh-ha-e-tamanna hain zau-fishan
phir kar raha hun jashn-e-charaghan-e-arzu
dekhe koi ye rabt ki marne ke baad bhi
chhuta na dast-e-shauq se daman-e-arzu
ab dekhiye guzarti hai kya us ki jaan par
ek dil hai aur sainkadon tufan-e-arzu
tera khayal tere nazare tera jamal
kitne charagh hain tah-daman-e-arzu
samjho na hum ko be-sar-o-saman ki hum 'jalis'
rakhte hain dil mein ganj-e-farawan-e-arzu

puchhte hain bazm mein sun kar wo afsana mera

puchhte hain bazm mein sun kar wo afsana mera
aap hain kahti hai duniya jis ko diwana mera
bas yahi hai mukhtasar tashrih husn-o-ishq ki
wo tumhaari dastan hai ye hai afsana mera
hain tasawwur mein tere jalwe teri ranaiyan
raunaq-e-sad-anjuman hai aaj virana mera
khud mere aansu hi us ke haq mein shoale ban gae
barq-o-baran se to tha mahfuz kashana mera
khil raha hai mere chehre se mera ahwal-e-gham
kah rahi hai meri khamoshi hi afsana mera
main nahin qail kisi taqlid ka ai rahbaro
har qadam uthta hai manzil mein harifana mera
maujzan hai khun-e-dil ab chashm-e-tar mein ai 'jalis'
baada-e-gul-gun se hai labrez paimana mera

masarrat ko masarrat gham ko jo bas gham samajhte hain

masarrat ko masarrat gham ko jo bas gham samajhte hain
wo nadan zindagi ka raaz aksar kam samajhte hain
haqiqat mein wahi raaz-e-haqiqat se hain na-waqif
jinhen dawa hai ye raaz-e-haqiqat hum samajhte hain
nahin hajat hamein ai chaarasazo chaara-sazi ki
hum apne dard hi ko dard ka marham samajhte hain
hamari sada-lauhi us se badh kar aur kya hogi
ki hum na-ashna ko aashna-e-gham samajhte hain
ye kaisa raaz hai un ke hamare darmiyan yarab
na jis ko wo samajhte hain na jis ko hum samajhte hain
main un ke ranj ke qurban main un ke dard ke sadqe
jo har insan ke gham ko khud apna gham samajhte hain
samajhte hain 'jalis' ab aap to aalam ko begana
magar hum aap ko be-gana-e-alam samajhte hain

hoti nahin rasai-e-barq-e-tapan kahan

hoti nahin rasai-e-barq-e-tapan kahan
ai ham-nashin banaiye ab aashiyan kahan
thahre misal teri gul-e-arghawan kahan
ai mah-jabin zamin kahan aasman kahan
chhana kiya main khak-e-do-alam tamam umr
apni talash le gai mujh ko kahan kahan
chhutta hujum-e-gham se mera sath kis tarah
jata bichhad ke mujh se mera karwan kahan
mahdud jin ki dair-o-haram tak thi justuju
hota nasib un ko tera aastan kahan
har manzil-e-hayat ki had par ho chuki
le jaegi ab aur ai umr-e-rawan kahan
sayyaad ne bhi mujh ko riha kar diya 'jalis'
qismat mein ab qafas bhi nahin aashiyan kahan