soz-e-firaq dil mein chhupae hue hain hum

soz-e-firaq dil mein chhupae hue hain hum
aur lab pe ek sukut sajae hue hain hum
jo aashna nahin hain mohabbat ki aanch se
kyun aas un se phir bhi lagae hue hain hum
shoale jo bujh chuke hain unhen tum hawa na do
dil mein hi ek aag lagae hue hain hum
tauba re in ki sang-dili aur shauq-e-did
kya khub haal apna banae hue hain hum
kahne ko dur hum se bahut dur wo sahi
par fasle dilon ke mitae hue hain hum
jate hain de ke wo to 'saba' rut khizaon ki
dil ke chaman to phir bhi khilae hue hain hum

KHamushi mein qayas mera hai

khamushi mein qayas mera hai
bandishen hi libas mera hai
khwab phulon ke aankh ne gundhe
phir chaman kyun udas mera hai
koi tabir-e-khwab mil jati
kya muqaddar hi yas mera hai
hasraton aaj dur hi rahna
aaj phir dil udas mera hai
tu guzar ja udhar 'saba' ban kar
ai sanam ye sipas mera hai

be-ruKHi ne uski kaisa ye ishaara kar diya

be-rukhi ne us ki kaisa ye ishaara kar diya
waqt se pahle qayamat ka nazara kar diya
lakh kahne par bhi us ne rukh pe rakkha tha naqab
ek jhalak ki aarzu ko nagawara kar diya
chal pade daman jhatak kar hum ko pichhe chhod kar
tanha aaghaz-e-safar par kyun dobara kar diya
khud hi lau ummid ki us ne jagai aur phir
tod kar ummid khud hi be-kinara kar diya
kaisi bedardi se toda us ne nata pyar ka
kyun jahan mein phir 'saba' ko be-sahaara kar diya