wirasat

By

dur kisi basti ki
nim-tarik kothari mein
ek tang chaarpai pe
karahat-zada kokh se
ghaib ki madad ko pukarti
aadhi chikh
pure jigar se par hui to
nannhi chalai
dil baith gae
man ufuq ke par
ja chuki thi
riwayat ki qabr mein
be-hisi ka kafan pahna ke
use tahzib se dafn kar diya gaya
aziyyat mein mubtala zehnon ko
qismat ki goli de kar
sula diya gaya
aur wo nau-maulud bachchi
apni janm-jali man se
nahin kah pai
dekh
wirasat tera khun pine ke baad
meri ek aur man
khojne nikal padi hai

mazhabi peshwa

By

khuda aur us ke insaf se darne wale
khata-posh kamzor dil
wajud aur na-wajud ka
munazra karne wale
shikariyon se behtar hain
ki un ke pas
khauf-zada hone ke liye
koi khuda
maujud nahin hota
wo mazhab ki musawat
tohfon se zarb de kar
maslahaton mein taqsim karte hain
aur farz kiye gae khuda ko
bhuk ka kulliya laga kar
sikke ke barabar le aate hain

mazdur

By

ek mazdur
ki jis ke badan ne
kai dinon ki an-thak riyazat
cement ret aur bajri ke bich kati thi
ek pyali chae ki talab
belche ki mitti ke sath uchhaali thi
fikr-e-ayal ko
lohe ki redhi pe
inton ke sath dhakela tha
chand lamhe
sustane ki khwahish ko
sabr ke hathaude se kut dala tha
tab ja kar kahin
aakhir kar
aaj apni dawat manani thi
ghar mein murghi pakani thi
magar chamakti kirola ki
damakti makhluq ko kya khabar
beach sadak mein
jis ka shaper phata tha
jo la-waris lash ki surat pada tha
aaj us ne
apni dawat manani thi
ghar mein murghi pakani thi

kachre ka Dher

By

kandhe par qad se lambi bori latkae
ek bachcha
kachre ke us dher ki jaanib lapakta hai
jahan se
nak band kar ke guzarna bhi dushwar lagta hai
sham tak
ghalazat ke us pahad se
wo badbu-dar
dabbe botalen aur bosida kaghaz chunega
din dhale
apni khwari ki
sasti mazduri jab paega
ghar jate hue wo
khushi ka rag gaega
magar
us ki nili shaffaf aankhon ka
siyah khwab
taza kachre ka dher
koi nahin sochega
us ki dudhiya jild ki tah mein
utarti zahrili mail
koi nahin dhoega
wo masum bachcha
kya hamein
kabhi nazar nahin aaega

Dhol wala

By

us ne ghurbat ke badan pe
basanti chola pili pagdi
aur sunahri jacket sajai hai
wo tuti kursi pe
bosida dhol se pair tikae
udhda waqt
sabr ke dhage se sita hai
saji-sanwari gadi
pas se guzre to
aas aankh mein chamakti hai
us ki bhuk lapakti hai
apni khushiyon ke aangan mein
dhol ki thap par
us ke gham ko nachta dekh rahi hun
main soch rahi hun
us ki dukan ka mahnga sauda
kitne saste dam bika hai

dard harf chunne lage

By

us ki mardangi ko
mere aansuon ki hajat thi
wo meri ruh ko
is waqt tak daghta raha
jab tak us ki poron mein
mard hone ka ehsas nahin itraya
us ke mitti wajud ko
main ne khaare pani se gundh kar
be-hisi ki bhatti mein dal diya
wo patthar ka ho gaya
main bain karne lagi
hosh aaya to
usi but ke aage
bachi-khuchi tamannaen bhent kin
aur sajda-rez ho gai
tapasya amar hui to
dard harf chunne lage
aur main nazmen gungunane lagi