shikan-andar-shikan yaad aa gaya hai

By

shikan-andar-shikan yaad aa gaya hai
visal-e-tishna-tan yaad aa gaya hai
ye dasht-e-arzu ki be-panahi
ghane sapnon ka ban yaad aa gaya hai
mere raste mein chattanen bahut hain
mujhe ab kohkan yaad aa gaya hai
charagh-e-uryan tan ko bhi bil-akhir
hawa ka pairahan yaad aa gaya hai
barasti ja rahin be-tahasha
in aankhon ko watan yaad aa gaya hai
ye kaisa khwab hai aankhon mein 'bushra'
ye kya diwana-pan yaad aa gaya hai

sawad-e-sham se Darta hua nazar aaya

By

sawad-e-sham se darta hua nazar aaya
farogh-e-mehr bhi marta hua nazar aaya
nasim-e-subh chali aur fishaar-e-rang-o-bu
kahin qarar na karta hua nazar aaya
zamin pe rakh udi jab bhi khema-gahon ki
ufuq pe khun bikharta hua nazar aaya
har ek phul dikhai diya kaman-ba-dast
har ek khar nikharta hua nazar aaya
na nind aai na koi sitara-e-kam-khwab
bulandiyon se utarta hua nazar aaya
kabhi kabhi to meri jalwa-gah-e-hairat mein
khud aaina bhi sanwarta hua nazar aaya
charagh bujhne lage aur meri aankhon ko
badan mein koi utarta hua nazar aaya

ab ke baras bhi mahka mahka KHwab daricha lagta hai

By

ab ke baras bhi mahka mahka khwab daricha lagta hai
duniya chand nazar aati hai sab kuchh achchha lagta hai
kya jaen ye kaisi duaen in aankhon ne mangi thin
mujh ko apne kandhon par bhi us ka chehra lagta hai
us ko bichhde muddat guzri sara jiwan bit gaya
wo aaega kuchh puchhega ab bhi aisa lagta hai
ab bhi sune man-angan mein yaad ke panchhi udte hain
ab bhi shamen sajti hain yan ab bhi mela lagta hai
jab mamta ki aankhon se main duniya dekha karti hun
apna budha bap bhi mujh ko nanha bachcha lagta hai
apni har takhliq hai mujh ko is duniya mein sab se aziz
har ek man ko apna beta chand ka tukda lagta hai
'bushra' aao laut chalen aur khwab-nagar mein kho jaen
duniya mein to sab kuchh apna dekha-bhaala lagta hai