surKH mausam ki kahani hai purani ho na ho

By

surkh mausam ki kahani hai purani ho na ho
aasman ka rang aage aasmani ho na ho
khwab mein mujh ko nazar aati hain bhigi sipiyan
aankh khulne par teri aankhon mein pani ho na ho
sath hoti hai mere har gam par sanjidgi
ho rahi hai dur ab mujh se jawani ho na ho
har jagah niklegi teri baat mujh ko dekh kar
tazkira tera kahin meri zabani ho na ho
raushni dete rahenge mujh ko zakhmon ke charag
ab andhere mein kahin se zau-fishani ho na ho
ek taraf meri ana hai ek taraf teri khushi
aa gaya mere liye pal imtihani ho na ho
zahr ka pani mein hona tai-shuda hai 'ehtiram'
aagahi ke ghat par dariya mein pani ho na ho

ghaiz ka suraj tha sar par sach ko sach kahta to kaun

By

ghaiz ka suraj tha sar par sach ko sach kahta to kaun
ras aata kis ko mahshar sach ko sach kahta to kaun
sab ne padh rakkha tha sach ki jit hoti hai magar
tha bharosa kis ko sach par sach ko sach kahta to kaun
man rakhta kaun wish ka kaun apnata salib
koi aisa tha na shankar sach ko sach kahta to kaun
tha kisi ka bhi na maqsad sach ko jhutlana magar
munh mein rakh kar luqma-e-tar sach ko sach kahta to kaun
aadmi to khair se basti mein milte hi na the
dewta the so the patthar sach ko sach kahta to kaun
jab haqiqat mein ubharta sach bhi sach lagta na tha
khwab mein hote ujagar sach ko sach kahta to kaun
yaad tha suqraat ka qissa sabhi ko ehtiram
sochiye aise mein badh kar sach ko sach kahta to kaun

bazm-e-tanhai mein aks-e-shoala-paikar tha koi

By

bazm-e-tanhai mein aks-e-shoala-paikar tha koi
ya hamare samne yaadon ka lashkar tha koi
qurbaton ke ghat par sukhi nadi sabit hua
faslon ke dasht mein gahra samundar tha koi
us ki sari iltijaen hukm thahrai gain
jis ghadi dekha gaya jame se bahar tha koi
dewta hai ab wahi mandir ke aasan par jama
thokaren khata hua raste ka patthar tha koi
us ki khwahish thi ki sath-e-ab par chal kar dikhae
kya muqaddar tha ki dariya ka muqaddar tha koi
karb apne baune-pan ka jhelta hun aaj tak
soch ubhri thi bujhi mere barabar tha koi
samne us ke agar suraj nahin tha 'ehtiram'
pani pani aakhirash kyun shoala-paikar tha koi