un aankhon ko nazar kya aa gaya hai

By

un aankhon ko nazar kya aa gaya hai
mizaj-e-arzu badla hua hai
na jaane haar hai ya jit kya hai
ghamon par muskurana aa gaya hai
meri haalat pe un ka muskurana
jawab-e-na-muradi aa gaya hai
nahin ek main hi nakaam-e-mohabbat
yahi pahle bhi aksar ho chuka hai
saba ki rau na ghunchon ka tabassum
chaman walo kaho kya ho gaya hai
shab-e-gham sahmi sahmi yaad un ki
andhere mein diya sa jal raha hai
nahin milta suragh-e-manzil-e-shauq
mohabbat se bhi ji ghabra gaya hai

gham mein ek mauj sarKHushi ki hai

By

gham mein ek mauj sarkhushi ki hai
ibtida si khud aagahi ki hai
kise samjhaen kaun manega
jaise mar mar ke zindagi ki hai
bujhin shamen to dil jalae hain
yun andheron mein raushni ki hai
phir jo hun us ke dar pe nasiya sa
main ne ai dil teri khushi ki hai
main kahan aur dayar-e-ishq kahan
gham-e-dauran ne rahbari ki hai
aur umde hain aankh mein aansu
jab kabhi us ne dil-dahi ki hai
qaid hai aur qaid-e-be-zanjir
zulf ne kya fusun-gari ki hai
main shikar-e-itab hi to nahin
mehrban ho ke baat bhi ki hai
bazm mein us ki bar pane ko
dushmanon se bhi dosti ki hai
un ko nazren bacha ke dekha hai
khub chhup chhup ke mai-kashi ki hai
har taqaza-e-lutf par us ne
taza rasm-e-sitamgari ki hai

gulshan-e-dil mein mile aql ke sahra mein mile

By

gulshan-e-dil mein mile aql ke sahra mein mile
jo bhi milna hai mile aur isi duniya mein mile
barhami anjuman-e-shauq ki kya puchhte ho
dost bichhde hue akasr saf-e-ada mein mile
aane walon ne mere baad gawahi di hai
kai gulzar mere naqsh-e-kaf-e-pa mein mile
yun bhi guzri hai ki chhae rahe bedari par
nind aai to wo gham khwab ki duniya mein mile
nahin malum ki kya dekhne aae the udhar
be-ajar log bahut shahr-e-tamasha mein mile
phir umidon ne yahin gad diye hain kheme
rang kuchh udte hue daman-e-sahra mein mile
faslon se na mere shauq ki manzil napo
shash-jihat said mere dam-e-tamanna mein mile

Dar Dar ke jise main sun raha hun

By

dar dar ke jise main sun raha hun
khoi hui apni hi sada hun
har lamha-e-hijr ek sadi tha
puchho na ki kab se ji raha hun
jab aankh mein aa gae hain aansu
khud bazm-e-tarab se uth gaya hun
chhatti nahin khu-e-haq-shanasi
suqraat hun zahr pi raha hun
rahbar ki nahin mujhe zarurat
har rah ka mod jaanta hun
manzil na mili to gham nahin hai
apne ko to kho ke pa gaya hun
apni hi hawas thi sar-kashida
daman se ulajh ke gir pada hun
uryani-e-fikr khul na jae
khwabon ke libas si raha hun
har manzil-e-marg-afrin mein
sar-gashta-e-zindagi raha hun
dhabbe hain bahut se tirgi ke
kin raushniyon mein ghir gaya hun