wo jitne dur hain utne hi mere pas bhi hain

By

wo jitne dur hain utne hi mere pas bhi hain
ye aur baat hai khush hain magar udas bhi hain
ye dekhna hai hamein kis ka zauq kaisa hai
yahan sharab bhi hai zahr ke gilas bhi hain
unhi pe tohmat-e-diwangi lagate ho
jo ittifaq se mahfil mein ru-shanas bhi hain
jo raushni ke libaade ko odh kar aae
shab-e-siyah ke wo matami libas bhi hain
tum apne shahr mein amn-o-aman ki baat karo
jahan sukun hai wahan log bad-hawas bhi hain
ghazal ke saz hain faiz-ul-hasan-'khayal' jahan
wahan pe aah ba-lab bhi hain mahw-e-yas bhi hain

subh-e-nau lati hai har sham tumhein kya malum

By

subh-e-nau lati hai har sham tumhein kya malum
zakhm khushiyon ke hain paigham tumhein kya malum
bhul kar bhi jo kisi bazm mein aaya na gaya
sainkadon us pe hain ilzam tumhein kya malum
log gulshan mein to chalte hain sar-afraazi se
un mein kitne hain tah-e-dam tumhein kya malum
kuchh andhere bhi khatawar-e-tabahi hain magar
raushni par bhi hai ilzam tumhein kya malum
jis ko tum dhundte ho sham-e-rukh-e-naz liye
wo to arse se hai gumnam tumhein kya malum
jo rukh-e-zist pe tha harf-e-ghalat ki manind
mil raha hai use inam tumhein kya malum
jo kafan bandh ke chalte hain wafa ki rah mein
zindagi kar chuke nilam tumhein kya malum
surkh-ru kaun hua kucha-e-jaanan mein kabhi
namwar bhi hue badnam tumhein kya malum
do qadam bhi na chale rah-e-wafa mein hum log
hai abhi zauq-e-talab kham tumhein kya malum
jo jala raat ki tanhai mein us par bhi 'khayal'
bewafai ka hai ilzam tumhein kya malum

log kahte hain ki qatil ko masiha kahiye

By

log kahte hain ki qatil ko masiha kahiye
kaise mumkin hai andheron ko ujala kahiye
chehre padhna to sabhi sikh gae hain lekin
kaisi tahzib hai apnon ko paraya kahiye
jaane pahchane hue chehre nazar aate hain
waqt qatil hai yahan kis ko masiha kahiye
aap jis ped ke sae mein khade hain is ko
sehn-e-gulshan nahin jalta hua sahra kahiye
sab ke chehron pe hain akhlaq-o-murawwat ke naqab
kis ko apna yahan aur kis ko paraya kahiye
shab ke mathe pe koi saya numudar hua
us ko ab pyar ke aangan ka sawera kahiye
zahr-e-tanhai-e-gham pi ke mohabbat mein 'khayal'
kis tarah maut ko jine ka sahaara kahiye

kanch ke shahr mein patthar na uThao yaro

By

kanch ke shahr mein patthar na uthao yaro
mai-kada hai ise maqtal na banao yaro
sahn-e-maqtal mein bhi mai-khana sajao yaro
shab ke sannate mein hangama machao yaro
zindagi bikne chali aai hai bazaron mein
is janaze ke bhi kuchh dam lagao yaro
jin ki shah-e-rag ka lahu phul ki angdai tha
un ko ab haal-e-gulistan na batao yaro
phailte saya-e-shab mein na chalo ruk ruk ke
bujhti rahon ko kaf-e-pa se sajao yaro
bazm-e-yaran mein wo kuchh soch ke aaya hoga
aise diwane ko thokar na lagao yaro
raat dhal jaegi mai-khana sambhal jaega
koi naghma koi paigham sunao yaro
zindagi rengti phirti hai yahan kasa-ba-kaf
us ko ab waqt ka aaina dikhao yaro
ab dhundlakon mein bhi hai taza ujalon ka 'khayal'
shab ki diwar saliqe se girao yaro

jab tak mizaj-e-dost mein kuchh barhami rahi

By

jab tak mizaj-e-dost mein kuchh barhami rahi
goya bujhi bujhi si meri zindagi rahi
jis par nigah-e-lutf-e-karam aap ki rahi
hairat se har nigah use dekhti rahi
go main raha kashakash-e-dauran se ham-kanar
lekin mere labon pe hansi khelti rahi
laya hai ishq ne mujhe aise maqam par
khud-agahi rahi na khuda-agahi rahi
josh-e-junun ne manzil-e-maqsud pa liya
aql-e-salim dekhti hi dekhti rahi
sab kuchh mujhe 'khayal' ki duniya mein mil gaya
lekin tumhaare husn-e-nazar ki kami rahi

jaane kya soch ke usne sitam ijad kiya

By

jaane kya soch ke us ne sitam ijad kiya
khud bhi barbaad hua mujh ko bhi barbaad kiya
shama ki tarah jale hum teri mahfil mein magar
tu ne kis waqt hamein kaun si shab yaad kiya
jumbish-e-lab ki ijazat hai na izn-e-parwaz
kis liye tu ne mujhe qaid se aazad kiya
shukr hai tu ne mujhe dard ke qabil samjha
teri paiman-shikani ne mera dil shad kiya
hae us shakhs ki khatir-shikani hoti hai
jis ne apne ko teri yaad mein barbaad kiya
apni barbaadi pe nazan bhi hun hairan bhi hun
shamen raushan huin jab main ne tujhe yaad kiya
tujh ko ye naz ki to khaliq-e-naghma hai 'khayal'
mujh ko ye fakhr ki tu ne mujhe barbaad kiya