tasawwur mein koi aaya sukun-e-qalb-o-jaan ho kar

tasawwur mein koi aaya sukun-e-qalb-o-jaan ho kar
mohabbat muskuraati hai bahaar-e-jawedan ho kar
chaman mein jab kabhi jata hun un ki yaad aati hai
tamanna chutkiyan leti hai pahlu mein jawan ho kar
dil-e-wahshat-asar ko hosh jab aaya to dekha hai
hawa ke dosh par udta hai daman dhajjiyan ho kar
sanobar sa hai qad nargis si aankhen phul sa chehra
wo mere samne phirte hain aksar gulistan ho kar
sharab-o-sher-o-naghma ke siwa kya chahiye 'faizi'
bala se zindagi jae mata-e-raegan ho kar

phir zaban-e-ishq chashm-e-KHunfishan hone lagi

phir zaban-e-ishq chashm-e-khunfishan hone lagi
phir hadis-e-dil sar-e-mahfil bayan hone lagi
phir kisi ki shokh nazron ne kiya jhuk kar salam
phir mohabbat saz-e-dil pe naghma-khwan hone lagi
phir kisi ki yaad aai phir hue aansu rawan
phir sitaron ki chamak dil par garan hone lagi
phir tasawwur mein koi aane laga hai bar-bar
phir meri ummid ki duniya jawan hone lagi
phir chaman mein ghuncha-e-nauras ne lin angdaiyan
phir surud-afza bahaar-e-gulistan hone lagi
phir pukara chand-taron ne mujhe sham-e-firaq
phir nigah-e-shauq nazr-e-asman hone lagi
phir kisi ka daman-e-rangin hai mera hath hai
phir dil-e-pur-shauq ki hasrat ayan hone lagi
phir samaya hai meri nazron mein wo mah-e-mubin
phir nigah-e-dil jawab-e-asman hone lagi
phir ghata uthne lagi tauba ke phir lale pade
phir khushamad teri ai pir-e-mughan hone lagi
phir chala diwana 'faizi' ku-e-jaanan ki taraf
phir junun-e-ishq ki haalat ayan hone lagi

kuchh zindagi mein lutf ka saman nahin raha

kuchh zindagi mein lutf ka saman nahin raha
dil aisa bujh gaya koi arman nahin raha
wo josh-e-be-khudi ka hai aalam ki aaj-kal
zindan mein hum nahin hain ki zindan nahin raha
wo dil hi kya khalish hi na ho jis mein dard ki
wo gul hi kya jo zinat-e-daman nahin raha
har inqalab waqt ke sanche mein dhal gaya
markaz pe apne ab koi insan nahin raha
har ek apna khun piye ja raha hai aaj
insan is zamane mein insan nahin raha
hoti hai ab tarannum-e-dilkash pe wah wah
bazm-e-sukhan mein koi sukhan-dan nahin raha
laya hai us ko khinch ke shauq-e-adab yahan
'faizi' kabhi bhi dad ka khwahan nahin raha

koi tasawwur mein jalwa-gar hai bahaar dil mein sama rahi hai

koi tasawwur mein jalwa-gar hai bahaar dil mein sama rahi hai
nafas nafas gunguna raha hai nazar nazar muskura rahi hai
jhuki jhuki si nigah-e-qatil hazar ghamze dikha rahi hai
na jaane jaga hai bakht kis ka ye kis ko bismil bana rahi hai
nahin hai ab tab-e-zabt baqi kahin main tauba na tod baithun
tera ishaara nahin ye saqi to kyun ghata muskura rahi hai
na puchh haalat mariz-e-gham ki ghadi mein kuchh hai ghadi mein kuchh hai
tabib tashwish mein pada hai qaza khadi muskura rahi hai
meri shab-e-gham ka puchhna kya ajib pesh-e-nazar hai manzar
ye zindagi jhilmila rahi hai ki nind taron ko aa rahi hai
ye har ada paemal ho kar bhi dil ko hai zauq-e-paemali
qadam qadam par teri jawani ajib fitne jaga rahi hai
hawa kuchh aisi chali hai 'faizi' tamiz apnon ki ab hai mushkil
meri tamanna bhi kuchh khafa hai wafa bhi daman chhuda rahi hai

gulon ke chehra-e-rangin pe wo nikhaar nahin

gulon ke chehra-e-rangin pe wo nikhaar nahin
bahaar aai magar aalam-e-bahaar nahin
jo hath aata hai daman to chhod deta hun
junun-nawaz abhi mausam-e-bahaar nahin
kisi ki yaad ka aalam na puchhiye mujh se
kabhi qarar hai dil ko kabhi qarar nahin
ye bankpan ye ada ye shabab ka aalam
tum aa gae to kisi ka ab intizar nahin
bahaar par bhi khizan hi ka rang ghaalib hai
hawa zamane ki gulshan ko sazgar nahin
hamare samne wo hain kahin ye khwab na ho
ab apni aankhon pe bhi hum ko eatibar nahin
khud aa gae hain simat kar nigah mein jalwe
visal-e-dost hai ye ranj-e-intizar nahin
mera mazaq udata hai aaina lekin
meri haqiqat-e-gham us pe aashkar nahin
hamari aabla-pai ka faiz kya kahiye
wo kaun sa hai bayaban jo lala-zar nahin
buton ko puj raha hai tere tasawwur mein
gunah kar ke bhi 'faizi' gunahgar nahin