ayyam sirf sham-o-sahar ho ke rah gae

By

ayyam sirf sham-o-sahar ho ke rah gae
kaise ajib log the ghar ho ke rah gae
hum ko pasand aa gaya sahil ka mashwara
kashti ki lakdiyan the shajar ho ke rah gae
mitti ke is makan ne dhoka diya hamein
sahra-naward khak-basar ho ke rah gae
aankhen jhapak ke rah gain dil ki wafat par
sailab sirf dida-e-tar ho ke rah gae
pahle to apne panw zamin se juda hue
phir yun hua ki shahr-badar ho ke rah gae

zamin ne lafz ugaya nahin bahut din se

By

zamin ne lafz ugaya nahin bahut din se
kuchh aasman se bhi aaya nahin bahut din se
bas ab rawan bhi kar aaghosh-e-yar chaak apna
ki main wajud mein aaya nahin bahut din se
ajib log hain bas raston mein milte hain
kisi ne ghar hi bulaya nahin bahut din se
tujhe bhulana to mumkin nahin magar yunhi
tera khayal hi aaya nahin bahut din se
namaz kaise padhun main baghair pak hue
ki aansoon mein nahaya nahin bahut din se
hum apni mamlikat-e-dard mein akele hain
hamari koi reaya nahin bahut din se

tarana-e-reKHta

By

sar chadh ke bolta hai urdu zaban ka jadu
hindostan ki mitti ke aasman ka jadu
hindostan ka jadu sare jahan ka jadu
sar chadh ke bolta hai urdu zaban ka jadu
jap-jap jogiyon ka nara qalandaron ka
tahzib mahfilon ki aur shor mai-kadon ka
kuche mein dilbaron ke hangama aashiqon ka
mashuq ki nigah ke tir-o-kaman ka jadu
dariya hain 'mir'-o-'ghaalib' har lab pe jo rawan hain
'faiz' o 'firaq' aur 'dagh' har dil pe hukmaran hain
aur 'kirshn-chandr' 'manto' zinda kahaniyan hain
lafzon ke aaine mein husn-e-bayan ka jadu
duniya dil-e-ghazal mein mai-khana ishq ka hai
har ruh wajd mein hai har jism mein nasha hai
mashuq bandagi hai mashuq hi khuda hai
mandir ki ghantiyon mein bole azan ka jadu
tute hue dilon ko jode rafugari se
jode tamam girhen jazbon ki sadgi se
rah jaen dost ban kar aaen jo ajnabi se
daem mohabbaton ke aab-e-rawan ka jadu
hindostan ka jadu sare jahan ka jadu
hindostan ka jadu urdu zaban ka jadu
hindostan ka jadu sare jahan ka jadu
sar chadh ke bolta hai