izhaar-e-aqidat mein kahan tak nikal aae

izhaar-e-aqidat mein kahan tak nikal aae
hum ahl-e-yaqin wahm-o-guman tak nikal aae
shadab bahaaron ke tamannai kahan hain
mausam ke qadam zakhm-e-khizan tak nikal aae
ye kaisa alam hai ki gareban ho salamat
aur aankhon se khun bhi rag-e-jaan tak nikal aae
kab niklegi diwanon ki baraat gharon se
sinon mein baghawat ke nishan tak nikal aae
maqtal mein bahattar bhi nahin nikle hain ab ke
dargahon mein sab pir-o-jawan tak nikal aae
ab to na karo rah-numaon ki shikayat
akhbaron mein ab un ke bayan tak nikal aae
ab kaun sar-e-dar nazar aaega 'farigh'
jab ahl-e-junun sud-o-ziyan tak nikal aae

yahi hai daur-e-gham-e-ashiqi to kya hoga

yahi hai daur-e-gham-e-ashiqi to kya hoga
isi tarah se kati zindagi to kya hoga
abhi to ham-nafason ko hai wahm-e-chaaragari
hui na dard mein phir bhi kami to kya hoga
ye tirgi to bahar-e-haal chhat hi jaegi
na ras aai hamein raushni to kya hoga
umid hai ki kabhi to labon pe aaegi
kabhi na aai labon par hansi to kya hoga
nafas nafas mein fughan hai nazar nazar mein hiras
kuchh aur din yahi haalat rahi to kya hoga

chandni ne raat ka mausam jawan jaise kiya

chandni ne raat ka mausam jawan jaise kiya
hum ne bhi chehra farozan shisha-e-mai se kiya
pas-e-khuddari to hai lekin wafa-dushman nahin
tum ne hum par tark-e-ulfat ka guman kaise kiya
hum gunahon ki shariat se hue jab aashna
jism ne jo faisla jaise diya waise kiya
is liye ab dubne ke khauf se hain be-niyaz
hum ne aaghaz-e-safar dariyaon ki tah se kiya
raushni apni lutai hum ne suraj ki tarah
andhi raaton mein ujala mashal-e-lai se kiya
jab shuur aaya to 'farigh' wusat-fan ke liye
istifada hum ne duniya ki har ek shai se kiya