chhanw ki shakl dhup ki rangat badal gai

By

chhanw ki shakl dhup ki rangat badal gai
ab ke wo lu chali hai ki surat badal gai
hansna hansana apna mashini amal hua
badli hawa-e-shahr to aadat badal gai
achchha sa suit jism par apne saja ke wo
khush hai ki jaise ghar ki bhi haalat badal gai
sar ko chhupaya panw bhi khulne nahin diya
khwahish badhi to apni zarurat badal gai
nazzara-e-nigah hai ye jalta-bujhta din
kuchh gham nahin jo raat ki dawat badal gai
ab guftugu mein beach se ghaeb hai aadmi
hum tak to aate aate riwayat badal gai

bahut dhoka kiya KHud ko magar kya kar liya maine

By

bahut dhoka kiya khud ko magar kya kar liya main ne
tamasha mujh ko karna tha tamasha kar liya main ne
yahan bhi ab nai aabaadiyon ka shor sunta hun
yahan se bhi nikalne ka irada kar liya main ne
safar mein dhup ki shiddat kahan tak jhelta aakhir
teri yaadon ko odha aur saya kar liya main ne
koi achchha nahin sab log ek jaise hain basti mein
natija ye hua khud ko akela kar liya main ne
koi mausam ho kaisi hi faza ho gham nahin hota
zamane wala har ek rang paida kar liya main ne
ye duniya apne dhab ki thi na duniya wale achchhe the
magar kya kijiye phir bhi guzara kar liya main ne

apni pahchan koi zamane mein rakh

By

apni pahchan koi zamane mein rakh
khud ko zaea na kar kuchh khazane mein rakh
raat ki be-libasi pe mazmun likh
sham ke phul chun ke lifafe mein rakh
raushni ki zarurat padegi tujhe
aag mahfuz kuchh aashiyane mein rakh
jaanta hun mera koi masraf nahin
ek fashion samajh ke hawale mein rakh
sare tiron ko ek sath zaea na kar
farq kuchh to andhere ujale mein rakh

wo alag chup hai KHud se sharma kar

By

wo alag chup hai khud se sharma kar
kya kiya main ne hath phaila kar
phal har ek dal par nahin hote
sang har dal par na phenka kar
taza rakhne ki koi surat soch
sukhe lab par zaban na phera kar
dasht-e-suraj mein kya mila hum ko
rah gaya rang apna sanwla kar
mit na jae kahin wajud tera
khud ko fursat mein chhu ke dekha kar
aaina ho chala hai suraj ab
hai yahi waqt sab ko andha kar
ek hon do kinare dariya ke
koi aisi sabil paida kar
kaise darwaze par qadam rakhkhun
koi leta hai panw phaila kar
suraten zehn se na mit jaen
bhule-bhatke idhar bhi nikla kar
sarsari taur par jo baat hui
us ne puchha usi ko dohra kar
thahre pani mein phenk kar patthar
apne sae ko tu na ruswa kar

phulon ko waise bhi murjhana hai murjhaenge

By

phulon ko waise bhi murjhana hai murjhaenge
khidkiyan kholin to sannate chale aaenge
lakh hum ujli rakhen shahr ki diwaron ko
shahr-name to bahar-haal likkhe jaenge
rakh rah jaegi rudad sunane ke liye
ye to mehman parinde hain chale jaenge
apni laghzish ko to ilzam na dega koi
log thak-haar ke mujrim hamein thahraenge
aaj jin jaghon ki tafrih se mahfuz hun main
mere haalat mujhe kal wahan pahunchaenge
raste sham ko ghar le ke nahin lautenge
hum tabarruk ki tarah rahon mein bat jaenge
din kisi tarah se kat jaega sadkon pe 'shafaq'
sham phir aaegi hum sham se ghabraenge

khiDkiyon par malgaje sae se lahrane lage

By

khidkiyon par malgaje sae se lahrane lage
sham aai phir gharon mein log ghabrane lage
shahr ka manzar hamare ghar ke pas-e-manzar mein hai
ab udhar bhi ajnabi chehre nazar aane lage
dhup ki qashen hare makhmal pe zau dene lagin
sae kamron se nikal kar sehn mein aane lage
jugnuon se saj gain rahen kisi ki yaad ki
din ki chaukhat par musafir sham ke aane lage
bundiyan barsin hawa ke baadban bhi khul gae
nile pile pairahan sadkon pe lahrane lage
sochte hain kat den aangan ke pedon ko 'shafaq'
ghar ki baaten ye gali-kuche mein phailane lage