yaad rakhte kis tarah qisse kahani log the

By

yaad rakhte kis tarah qisse kahani log the
wo yahan ke the nahin wo aasmani log the
sukhe pedon ki qataren roktin kab tak unhen
ud gae karte bhi kya barg-e-khizani log the
zindagi aankhon pe rakh kar hath pichhe chhup gai
darmiyan rah kar bhi sab ke aan-jahani log the
kal yahin par lahlahati thin hansi ki khetiyan
kal yahin par kaise kaise zafrani log the
tut kar bikhre hue hain qurbaton ke silsile
chhup gae jaane kahan jo darmiyani log the
khushk mitti ban gae to bundiyan nahla gain
aur hamein kya chahiye tha aag pani log the

ujDe nagar mein sham kabhi kar liya karen

By

ujde nagar mein sham kabhi kar liya karen
mujh se dua salam kabhi kar liya karen
jangal ke phul hi sahi lekin hain kaam ke
sath un ke bhi qayam kabhi kar liya karen
har rah saf sidhi nahin pur-khatar bhi hai
suraj chhupe to sham kabhi kar liya karen
mausam hai khush-gawar to shakhen bhi sar pe hain
un ka bhi ehtiram kabhi kar liya karen
katta hai waqt kaise kisi ko giraya jae
kuchh kaam ka bhi kaam kabhi kar liya karen
shirkat tamam dawaton mein lazmi nahin
lekin kahin to nam kabhi kar liya karen
ye sach hai aage pichhe 'shafaq' dost hi to hain
talwar be-niyam kabhi kar liya karen

raat kafi lambi thi dur tak tha tanha main

By

raat kafi lambi thi dur tak tha tanha main
ek zara se roghan par kitna jalta-bujhta main
sab nishan qadmon ke mit gae the sahil se
kis ke waste aakhir dubta ubharta main
mera hi badan lekin bund bund ko tarsa
dast aur sahra par abr ban ke barsa main
adh-jale se kaghaz par jaise harf raushan hon
us ki koshishon par bhi zehn se na utra main
donon shaklon mein apne hath kuchh nahin aaya
kitni bar simta main kitni bar phaila main
zindagi ke aangan mein dhup hi nahin utri
apne sard kamre se kitni bar nikla main
aaj tak koi kashti is taraf nahin aai
paniyon ke ghere mein aisa hun jazira main
katta tha har manzar dusre manazir ko
koi manzar aankhon mein kis tarah se bharta main

pau phaTi ek taza kahani mili

By

pau phati ek taza kahani mili
khairiyat us ki din ki zabani mili
koi rahat na hum ko zamini mili
jo bhi saughat thi aasmani mili
qaid-e-diwar-o-dar se jo mahfuz hai
aise ghar ki hamein pasbani mili
koi patta na khadka kahin raat-bhar
har taraf khauf ki hukmarani mili
aur bhi log the shahr-e-bimar mein
ek hamin ko magar tarjumani mili

manzar ajab tha ashkon ko roka nahin gaya

By

manzar ajab tha ashkon ko roka nahin gaya
hansta hua jo aaya tha hansta nahin gaya
ek bar yun hi dekh liya tha use kahin
phir us ke baad shahr mein dekha nahin gaya
thi jis ke dam se raunaq-e-mahfil hama-hami
dawat mein us gharib ko puchha nahin gaya
sari khudai khud hi khinchi jati thi udhar
main khud wahan gaya mujhe bheja nahin gaya
jo kuchh na dekhta tha 'shafaq' dekhna pada
ghar le ke mujh ko sham ko rasta nahin gaya

din ko the hum ek tasawwur raat ko ek KHwab the

By

din ko the hum ek tasawwur raat ko ek khwab the
hum samundar ho ke bhi is ke liye payab the
sard se marmar pe shab ko jo ubhaare the nuqush
subh ko dekha to sab aks-e-hunar nayab the
wo ilaqe zindagi-bhar jo nami manga kiye
kal ghataen chhain to dekha ki zer-e-ab the
ek kiran bhi ahd mein un ke na bhule se mili
din ke jo suraj the apne raat ke mahtab the
aaj un pedon pe suraj ki kiran rukti nahin
kal yahi the bar-awar kal yahi shadab the
ab khula ki bundiyan moti hain dhalti thin kahan
hum jo dube hath apne gauhar-e-nayab the
koi apni bhi haqiqat mil ke dariya se 'shafaq'
chhote chhote apne nale kis qadar betab the