man

By

pahli bar mein kab takiye par
sar ko rakh kar soi thi
un ke badan ko dhunda tha aur roi thi
do hathon ne bhinch liya tha
garm aaghosh ki rahat mein
kaisi gahri nind mujhe tab aai thi
kab dur hui thi pahli bar
apne pairon par chal kar
bistar se alag phir ghar se alag
ek lambe safar par nikli thi
apni ungli ko thame
dhire dhire dur hui kab
naram badan ki garmi se
us mithi nind ki rahat se
ab sochti hun aur roti hun

achchha lagta hai

By

mujhe phulon ka mausam
ped paude aur parinde aur bachche
achchhe lagte hain
mujhe ek dur tak jati sadak par
chalte rahna achchha lagta hai
mujhe pani pe machhli ka uchhalna achchha lagta hai
mujhe titli ka phulon par bhatakna achchha lagta hai
mujhe barsat mein phaili
dhanak bhi achchhi lagti hai
mujhe hathon mein chudi ki khanak bhi
achchhi lagti hai
mujhe tum achchhe lagte ho

KHwab girwi rakh diye aankhon ka sauda kar diya

By

khwab girwi rakh diye aankhon ka sauda kar diya
qarz-e-dil kya qarz-e-jaan bhi aaj chukta kar diya
ghair ko ilzam kyun den dost se shikwa nahin
apne hi hathon kiya jo kuchh bhi jaisa kar diya
kuchh khabar bhi ho na pai is dayar-e-ishq mein
kaun yusuf ho gaya kis ko zulekha kar diya
dil ke darwaze pe yaaden shor jab banne lagin
dhadkanon ka nam de kar bojh halka kar diya
kitne achchhe log the kya raunaqen thin un ke sath
jin ki rukhsat ne hamara shahr suna kar diya
apne pyaron ko bachaya dard ki har mauj se
aankh mein sailab roka dil ko dariya kar diya
phul, paude, ped, bachche ghar ka aangan aur tum
khwahishon ke nam par in sab ko yakja kar diya
gham nahin la-hasili ka ishq ka hasil hai ye
ai hisab-e-zindagi tujh ko to pura kar diya
hijr se hijrat talak har dukh se samjhauta kiya
bhid mein rah ke bhi main ne khud ko tanha kar diya
ye zamin 'hasrat' ki hai is par qadam rakkha to phir
itni jurat ho gai arz-e-tamanna kar diya