ye kya bataen ki kis rahguzar ki gard hue

ye kya bataen ki kis rahguzar ki gard hue
hum aise log khud apne safar ki gard hue
najat yun bhi bikharne ke karb se na mili
hue jo aaina sab ki nazar ki gard hue
ye kin dukhon ne cham-o-kham tamam chhin liya
shua-e-mahr se hum bhi sharar ki gard hue
sab apne apne ufuq par chamak ke thodi der
mujhe to daman-e-sham-o-sahar ki gard hue
pukaro kah ke hamein chhanw ji na bahlega
bache jo dhup se pa-e-shajar ki gard hue
hamein bhi bolna aata hai phir bhi hain khamosh
ki hum tere sukhan-e-mukhtasar ki gard hue
dhula sa chehra bhi kuchh mand pad gaya aakhir
hue na ashk teri chashm-e-tar ki gard hue
sharir-o-tund hawa thi ki rau maani ki
tamam lafz lab-e-mo'tabar ki gard hue
ye rah kitni pur-ashob hai 'faza' na kaho
qalam ki rah chale hum hunar ki gard hue

na damanon mein yahan KHak-e-rahguzar bandho

na damanon mein yahan khak-e-rahguzar bandho
misal nikhat-e-gul mahmil-e-safar bandho
is aaine mein koi aks yun na ubhrega
nazar se silsila-e-danish-e-nazar bandho
jo sahiban-e-basirat the be-libas hue
fazilaton ki ye dastar kis ke sar bandho
safir-e-jaan hun hisar-e-badan mein kya thahrun
chaman-parasto na khushbu ke baal-o-par bandho
na tut jae ki nazuk hai rishta-e-anfas
tanab-e-khema-e-hasti sambhaal kar bandho
kahan har ek shanawar guhar ba-kaf nikla
samundaron se tawaqqo na is qadar bandho
har ek hath mein hai sang sad-hazar-ashob
phir aise waqt mein shakhon se kyun samar bandho
namak chhidakte raho ye bhi hai masihai
ye kya zaruri ki marham hi zakhm par bandho
phire hai kab se pareshan ye zakhm-khurda hiran
junun ko dasht se le ja ke apne ghar bandho
gaya wo daur ki jab barf barf the alfaz
girah mein ab ye dahakte hue sharar bandho
adab nahin hai rayazi ka masala yaro
har ek shakhs pe kyun tohmat-e-hunar bandho
ye sinf aabru-e-fann-e-shairi hai 'faza'
ghazal kaho to mazamin mo'atabar bandho

chand sansen hain mera raKHt-e-safar hi kitna

chand sansen hain mera rakht-e-safar hi kitna
chahiye zindagi karne ko hunar hi kitna
chalo achchha hi hua muft luta di ye jins
hum ko milta sila-e-husn-e-nazar hi kitna
kya pighalta jo rag-o-pai mein tha yakh-basta lahu
waqt ke jam mein tha shola-e-tar hi kitna
kis khata par ye uthana padi raaton ki salib
hum ne dekha tha abhi khwab-e-sahar hi kitna
hum bhi kuchh der ko chamke the ki bas rakh hue
sach to ye hai ki ram-o-raqs-e-sharar hi kitna
tarz-e-ehsas mein nudrat thi udhar hi kitni
fikr-o-jazabe mein tawazun hai idhar hi kitna
de diye khusraw-o-shirin ne use mod kai
warna yun fasla-e-tisha-o-sar hi kitna
tera irfan tu kya khud ko na pahchan saka
tha mera dara-e-ilm-o-khabar hi kitna
yak qadam besh nahin shab ki masafat lekin
ek tute hue tare ka safar hi kitna
ai 'faza' daman-e-alfaz hai ab bhi khali
tha yahan shakh-e-maani pe samar hi kitna

fuzul shai hun mera ehtiram mat karna

fuzul shai hun mera ehtiram mat karna
faqat dua mujhe dena salam mat karna
kahin ruke to na phir tum ko rasta degi
ye zindagi bhi safar hai qayam mat karna
wo aashna nahin khwabon ki manawiyyat ka
hamare khwab abhi us ke nam mat karna
zaban munh mein hai tar-e-gunah ki surat
tumhaara hukm baja hai kalam mat karna
mera wajud ki hai dana-e-qanaat sa
main ek faqir parinda hun dam mat karna
ye baat sach hai yahan guftugu awam se hai
magar adab ko guzar-gah-e-am mat karna
'faza' charagh-o-shafaq donon rahzanon ki mataa
jo khair chaho to raste mein sham mat karna