adib tha na main koi baDa sahafi tha

adib tha na main koi bada sahafi tha
zamana phir bhi mere fan ka e'tirafi tha
mujhe bhi zahr diya kyun na haq-bayani par
ki ye gunah to na-qabil-e-muafi tha
kisi se ek bhi fitrat ka raaz khul na saka
agarche daur zamane ka inkishafi tha
musibaton ne to nahaq uthain taklifen
mujhe mitane ko mera shabab kafi tha
dil-o-nazar na ulajhte to hal nikal aata
hazar masala-e-did ikhtilafi tha
wo meri rae se to muttafiq tha ai 'fazil'
zarif-kar magar us ka inhirafi tha

ai kahkashan guzar ke teri rahguzar se hum

ai kahkashan guzar ke teri rahguzar se hum
aage badhenge aur maqam-e-qamar se hum
azm-e-buland hausla-e-mustaqil liye
guzre har ek marhala-e-sakht-tar se hum
dekha to hai zamin se tujhe gumbad-e-falak
dekhenge ab zamin ko tere baam-o-dar se hum
jab se hui hai aankh shab-e-gham se aashna
na-ashna hain lazzat-e-khwab-e-sahar se hum
dil iztirab-o-dard se mahrum ho gaya
baz aae tere lutf-o-karam ki nazar se hum
har taza gham ke waste ja-e-qayam hai
tang aa gae hain wusat-e-qalb-o-jigar se hum
targhib de na ai dil-e-furqat-nasib tu
waqif hain khub aah-o-fughan ke asar se hum
'fazil' hamara haal bhi hota teri misal
rahte na hoshiyar agar rahbar se hum

ashk aaya aankh mein jalta hua

ashk aaya aankh mein jalta hua
aaj soz-e-gham ka andaza hua
zindagi guzri ummid-o-yas mein
dil kabhi gulshan kabhi sahra hua
zikr-e-zulf-e-yar rahne do abhi
masala hai zist ka uljha hua
ban gaya daman mein wo aansu guhar
jo na meri aankh ka tara hua
barha ruk ruk gai nabz-e-jahan
husn ka jadu hai kya chalta hua
gardishon se kya mujhe dega najat
jam khud gardish mein hai aaya hua
dil wo kya jo gham se ho na-ashna
gham wo kya jis ka ki andaza hua
hum pareshan-haal 'fazil' se mile
hai tabiat ka bahut suljha hua

bashar ki zat mein shar ke siwa kuchh aur nahin

bashar ki zat mein shar ke siwa kuchh aur nahin
ye baat naqs-e-nazar ke siwa kuchh aur nahin
hayat ki shab-e-tarik khatm hoti hai
qaza tulu-e-sahar ke siwa kuchh aur nahin
jo dekhiye to kaf-e-gul-farosh bhi hai hayat
ghalat ki daman-e-tar ke siwa kuchh aur nahin
guzar ke had se har ek shai bar-aks hoti hai
kamal-e-aib-e-hunar ke siwa kuchh aur nahin
ye rang jo nazar aata hai chehra-e-gul par
hamare khun-e-jigar ke siwa kuchh aur nahin
bashar hai jauhar-e-kirdar se garan-maya
guhar mein aab-e-guhar ke siwa kuchh aur nahin
nazar-fareb nazare jahan ke ai 'fazil'
fareb-e-husn-e-nazar ke siwa kuchh aur nahin

bata ai zindagi tere parastaron ne kya paya

bata ai zindagi tere parastaron ne kya paya
utha kar naz tere naz-bardaron ne kya paya
wo kante hi sahi kuchh to diya hum ko bayaban ne
magar gulshan se phulon ke talab-garon ne kya paya
zara malum to kije khirad par marne walon se
ki thukra kar junun ko in ziyan-karon ne kya paya
kaleja tera phat jaega waiz fart-e-hairat se
bata dun main agar tujh ko gunahgaron ne kya paya
bayaban gham na kar be-faizi-e-abr-e-bahaaran ka
tera daman hai gar khali to gulzaron ne kya paya
gham-e-hasti gham-e-jaanan gham-e-duniya gham-e-dauran
mita kar mujh ko 'fazil' in sitam-garon ne kya paya

chamak sitaron ki nazron pe bar guzri hai

chamak sitaron ki nazron pe bar guzri hai
na puchh kaise shab-e-intizar guzri hai
jo aansuon ki nadi khushk thi kai din se
wo sath apne liye aabshaar guzri hai
main ek dhuan tha ki uthta gaya har ek dil se
jidhar se wo nigah-e-barq-bar guzri hai
wahan se sath mera sathiyon ne chhod diya
jahan se rahguzar kharzar guzri hai
khuda ka shukr hai 'fazil' ki zindagi apni
ghamon ke sath bahut khush-gawar guzri hai