jin ki zindagi daman tak hai bechaare farzane hain

jin ki zindagi daman tak hai bechaare farzane hain
khak udate phirte hain jo diwane diwane hain
wahdat-e-insan apne ko shair se manwa leti hai
kya anjaane kya begane sab jaane-pahchane hain
mujh ko shair kahne walo main kya meri ghazlen kya
main ne to bas sarkar-e-ishq mein kuchh parche guzrane hain
bhole-bhaale mahbubon se danw-pech kuchh chal na saka
hum ye samajhte rahe abhi tak hum bhi kitne siyane hain
hosh-o-khirad kya josh-e-junun kya ulti ganga bahti hai
kya farzane kaise siyane yaro sab diwane hain
jal-bujhne ki bhi taufiq kahan ushshaq ki qismat mein
ek an-dekhi sham-e-bazm ke dil wale parwane hain
shair se hamdardi sikho duniya ke gham-khane mein
jitne gham hain duniya bhar mein is ke mane-jaane hain
shahr-e-nigaran shahr-e-nigaran kaun batae kaisa hai
puchhte ho kya hum se yaro hum bhi to begane hain
bas wo unhi se fitrat ko khalon ke libas pahnata hai
shair ke palle kya hai giton ke tane-bane hain
kitne begane hote hain ye jaane-pahchane log
jaane hue bhi ba-qaul hamare anjaane begane hain
aaj se pahle kab the watan mein be-watani ke ye lachchhan
logon ko ye kahte suna hai ghar bhi ghurbat-khane hain
kuchh nahin khulta kis ki zad mein ye hasti-e-gurezan hai
hum jo itne bache phirte hain kin tiron ke nishane hain
is gum-karda-e-dida-o-dil ko kal tak kitne jaante the
ab to 'firaq'-e-be-khud ke aalam aalam afsane hain

jise log kahte hain tirgi wahi shab hijab-e-sahar bhi hai

jise log kahte hain tirgi wahi shab hijab-e-sahar bhi hai
jinhen be-khudi-e-fana mili unhen zindagi ki khabar bhi hai
tere ahl-e-did ko dekh ke kabhi khul saka hai ye raaz bhi
unhen jis ne ahl-e-nazar kiya wo tera kharab-e-nazar bhi hai
ye visal-o-hijr ki bahs kya ki ajib chiz hai ishq bhi
tujhe pa ke hai wahi dard-e-dil wahi rang-e-zakhm-e-jigar bhi hai
ye nasib-e-ishq ki gardishen ki zaman makan se guzar ke bhi
wahi aasman wahi sham-e-gham wahi sham-e-gham ki sahar bhi hai
tere kaif-e-husn ki jaan hai meri be-dili-o-fasurdagi
jise kahte hain gham-e-raegan wo liye hue kuchh asar bhi hai
na raha hayat ki manzilon mein wo farq-e-naz-o-niyaz bhi
ki jahan hai ishq barahna-pa wahin husn khak-basar bhi hai
wo gham-e-firaq bhi kat gaya wo malal ishq bhi mit gaya
magar aaj bhi tere hath mein wahi aastin hai ki tar bhi hai
dam-e-hashr azal ki bhi yaad kar ye zaban kya ye nigah kya
jo kisi se aaj na ho saka wo sawal bar-e-digar bhi hai
jo visal-o-hijr se dur hai jo karam sitam se hai be-khabar
kuchh utha hua hai wo dard bhi kuchh uthi hui wo nazar bhi hai
ye pata hai us ki inayaton ne kharab kitnon ko kar diya
ye khabar hai nargis-e-nim-wa ki girah mein fitna-e-shar bhi hai
usi sham-e-marg ki tirgi mein hain jalwa-ha-e-hayat bhi
unhin zulmaton ke hijab mein ye chamak ye raqs-e-sharar bhi hai
wahi dard bhi hai dawa bhi hai wahi maut bhi hai hayat bhi
wahi ishq nawak-e-naz hai wahi ishq sina-sipar bhi hai
tu zaman makan se guzar bhi ja tu rah-e-adam ko bhi kat le
wo sawab ho ki azab ho kahin zindagi se mafar bhi hai
jo gale tak aa ke atak gaya jise talkh-kaam na pi sake
wo lahu ka ghunt utar gaya to suna hai shir-o-shakar bhi hai
koi ahl-e-dil ko kami nahin magar ahl-e-dil ka ye qaul hai
abhi maut bhi nahin mil saki abhi zindagi mein kasar bhi hai
badi chiz daulat-o-jah hai badi wusaten hain nasib use
magar ahl-e-daulat-o-jah mein kahin aadmi ka guzar bhi hai
ye shab-e-daraaz bhi kat gai wo sitare dube wo pau phati
sar-e-rah ghaflat-e-khwab se ab utho ki waqt-e-sahar bhi hai
jo ulat chuke hain bisat-e-dahr ko agle waqton mein barha
wahi aaj gardish-e-bakht hai wahi rang-e-daur-e-qamar bhi hai
na gham-e-azab-o-sawab se kabhi chhed fitrat-e-ishq ko
jo azal se mast-nigah hai use nek-o-bad ki khabar bhi hai
wo tamam shukr-o-raza sahi wo tamam sabr-o-sukun sahi
tu hai jis se mail-e-imtihan wo farishta hai to bashar bhi hai
na kaho taghaful-e-husn se koi kar-sazi-e-gham kare
ki jo aaj gham se nikal gai wo dua kharab asar bhi hai
tere gham ki umr-e-daraaz mein kai inqalab hue magar
wahi tul-e-sham-e-'firaq' hai wahi intizar-e-sahar bhi hai

gham tera jalwa-gah-e-kaun-o-makan hai ki jo tha

gham tera jalwa-gah-e-kaun-o-makan hai ki jo tha
yani insan wahi shoala-ba-jaan hai ki jo tha
phir wahi rang-e-takallum nigah-e-naz mein hai
wahi andaz wahi husn-e-bayan hai ki jo tha
kab hai inkar tere lutf-o-karam se lekin
tu wahi dushman-e-dil dushman-e-jaan hai ki jo tha
ishq afsurda nahin aaj bhi afsurda bahut
wahi kam kam asr-e-soz-e-nihan hai ki jo tha
qurb hi kam hai na duri hi ziyaada lekin
aaj wo rabt ka ehsas kahan hai ki jo tha
nazar aa jate hain tum ko to bahut nazuk baal
dil mera kya wahi ai shisha-giran hai ki jo tha
jaan de baithe the ek bar hawas wale bhi
phir wahi marhala-e-sud-o-ziyan hai ki jo tha
husn ko khinch to leta hai abhi tak lekin
wo asar jazb-e-mohabbat mein kahan hai ki jo tha
aaj bhi said-gah-e-ishq mein husan-e-saffak
liye abru ki lachakti si kaman hai ki jo tha
phir teri chashm-e-sukhan-sanj ne chhedi koi baat
wahi jadu hai wahi husn-e-bayan hai ki jo tha
phir sar-e-mai-kada-e-ishq hai ek barish-e-nur
chhalke jamon se charaghan ka saman hai ki jo tha
phir wahi khair-nigahi hai tere jalwon se
wahi aalam tera ai barq-e-daman hai ki jo tha
aaj bhi aag dabi hai dil-e-insan mein 'firaq'
aaj bhi sinon se uthta wo dhuan hai ki jo tha

didar mein ik-tarfa didar nazar aaya

didar mein ik-tarfa didar nazar aaya
har bar chhupa koi har bar nazar aaya
chhaalon ko bayaban bhi gulzar nazar aaya
jab chhed par aamada har khar nazar aaya
subh-e-shab-e-hijran ki wo chaak-garebani
ek aalam-e-nairangi har tar nazar aaya
ho sabr ki betabi ummid ki mayusi
nairang-e-mohabbat bhi be-kar nazar aaya
jab chashm-e-siyah teri thi chhai hui dil par
is mulk ka har khitta tatar nazar aaya
tu ne bhi to dekhi thi wo jati hui duniya
kya aakhri lamhon mein bimar nazar aaya
ghash kha ke gire musa allah-ri mayusi
halka sa wo parda bhi diwar nazar aaya
zarra ho ki qatra ho khum-khana-e-hasti mein
makhmur nazar aaya sarshaar nazar aaya
kya kuchh na hua gham se kya kuchh na kiya gham ne
aur yun to hua jo kuchh be-kar nazar aaya
ai ishq qasam tujh ko mamura-e-alam ki
koi gham-e-furqat mein gham-khwar nazar aaya
shab kat gai furqat ki dekha na 'firaq' aakhir
tul-e-gham-e-hijran bhi be-kar nazar aaya

ab daur-e-asman hai na daur-e-hayat hai

ab daur-e-asman hai na daur-e-hayat hai
ai dard-e-hijr tu hi bata kitni raat hai
har kaenat se ye alag kaenat hai
hairat-sara-e-ishq mein din hai na raat hai
jina jo aa gaya to ajal bhi hayat hai
aur yun to umr-e-khizr bhi kya be-sabaat hai
kyun intiha-e-hosh ko kahte hain be-khudi
khurshid hi ki aakhiri manzil to raat hai
hasti ko jis ne zalzala-saman bana diya
wo dil qarar pae muqaddar ki baat hai
ye mushagafiyan hain giran tab-e-ishq par
kis ko dimagh-e-kawish-e-zat-o-sifat hai
toda hai la-makan ki hadon ko bhi ishq ne
zindan-e-aql teri to kya kaenat hai
gardun sharar-e-barq-e-dil-e-be-qarar dekh
jin se ye teri taron bhari raat raat hai
gum ho ke har jagah hain za-khud raftagan-e-ishq
un ki bhi ahl-e-kashf-o-karamat zat hai
hasti ba-juz fana-e-musalsal ke kuchh nahin
phir kis liye ye fikr-e-qarar-o-sabaat hai
us jaan-e-dosti ka khulus-e-nihan na puchh
jis ka sitam bhi ghairat-e-sad-iltifat hai
yun to hazar dard se rote hain bad-nasib
tum dil dukhao waqt-e-musibat to baat hai
unwan ghaflaton ke hain qurbat ho ya visal
bas fursat-e-hayat 'firaq' ek raat hai

ab aksar chup chup se rahen hain yunhi kabhu lab kholen hain

ab aksar chup chup se rahen hain yunhi kabhu lab kholen hain
pahle 'firaq' ko dekha hota ab to bahut kam bolen hain
din mein hum ko dekhne walo apne apne hain auqat
jao na tum in khushk aankhon par hum raaton ko ro len hain
fitrat meri ishq-o-mohabbat qismat meri tanhai
kahne ki naubat hi na aai hum bhi kisu ke ho len hain
khunuk siyah mahke hue sae phail jaen hain jal-thal par
kin jatanon se meri ghazlen raat ka juda kholen hain
bagh mein wo khwab-awar aalam mauj-e-saba ke ishaaron par
dali dali nauras patte sahj sahj jab dolen hain
uf wo labon par mauj-e-tabassum jaise karwaten len kaunde
hae wo aalam-e-jumbish-e-mizhgan jab fitne par taulen hain
naqsh-o-nigar-e-ghazal mein jo tum ye shadabi pao ho
hum ashkon mein kaenat ke nok-e-qalam ko dubo len hain
in raaton ko harim-e-naz ka ek aalam hue hai nadim
khalwat mein wo narm ungliyan band-e-qaba jab kholen hain
gham ka fasana sunne walo aakhir-e-shab aaram karo
kal ye kahani phir chhedenge hum bhi zara ab so len hain
hum log ab to ajnabi se hain kuchh to batao haal-e-'firaq'
ab to tumhin ko pyar karen hain ab to tumhin se bolen hain