mohabbat ki bhi koi umr hoti hai

mohabbat ki hararat
dil ko pighlae bina rah hi nahin sakti
kisi ki ghatti badhti umr ka us se talluq kya
mohabbat ka na koi waqt hota hai
na us ki umr hoti hai
ye jab chahe jise chahe
jakad leti apne sehr mein ek-dam
mohabbat ki bhi koi umr hoti
na-jaane kis ne tum se kah diya kis shai ke nashshe mein
main us se jab mila mujh ko hansi aai thi ye sun kar
mohabbat ke nae mafhum se waqif na hone par
mujhe apni jahaalat par
mohabbat ki bhi koi umr hoti hai
main khud se puchhta hun
aur phir khud hi jawab aane se pahle
main simat jata hun apni zat ke
barson purane khol ke andar
usi thithure hue
mahaul ke andar

lauh-e-mahfuz

mohalle ka jo rakhwala tha
us ne aadatan lathi baja kar
balghami aawaz se nara lagaya
jagte rahna
mere akhbar wale ne idhar
mamul se hat kar
mujhe aawaz de kar roz ka akhbar dala
yahi kuchh dudh wale ne kiya
aur pheri wale ne main sau kar subh jab utha to un masum logon ne
ishaaron aur kinayon se mujhe chaha batana aur samjhana jo shayad ek zamane ko pata tha ma-siwa mere
ki mere nam ki takhti se
mera nam ghaeb hai
ba-zahir faisla saib hai
in taza khudaon ka hamare na-khudaon ka
magar ye bhi unhen malum to hoga
jo khaliq hai zamin-o-asman ka
wo jo malik hai
raqam taqdir karta hai
wahi tahrir karta hai
nahin mumkin mitana
meri jaisi aajiz-o-majbur hasti ke liye jo kuchh bhi wo tahrir karta hai
jo wo taqdir karta hai
yaqin mera
mera iman hai us par
ki meri lauh par sab kuchh
usi tarah se kanda hai
mere khaliq ne mere nam ko
kal ki tarah se
aaj bhi mahfuz rakkha hai
wo mere nam ko
kal bhi yunhi mahfuz rakkhega

kisi ko yaad kab hoga

kabhi tum ne
kisi chhote se bachche ko
sisakte nind mein
bhigi hui aankhon se dekha hai
kabhi puchha hai khud se bhi
sabab is ka
kabhi socha hai tum ne
kis liye masum rota hai
kyun aankhen band apni jaan khota hai
khubi tum ne bhi apne bachpane mein
khwab boe the
kabhi sote mein roe the
tumhein bhi yaad kab hoga
sar-e-mizhgan sitaron ka chamakna aur bikhar jaana
ba-ru-e-barg-e-gul tahrir afsana

faKHta ka rang zard tha

khat badhai ki dastak par
tanawar shajar ne
kandhe jhatak kar
apni be-niyazi ka izhaar kiya
hawa ka tez jhonka
ghadi-bhar ke liye patton se uljha
phuli hui sans se kuchh kahna chaha
magar alfaz ne sath na diya
shajar ne badi be-e'tinai se
us ki taraf ek nazar dekha
magar jhonka itni der mein dur ja chuka tha
abhi use aur bhi to paigham pahunchane the
yak-bargi shajar khade qad se dagmagaya
haalanki faza bilkul sakit thi
patte anjaane khauf se
haule haule kanp rahe the
khat badhai ki dastak tez se tez-tar hoti ja rahi thi
hawa ka jhonka
wapsi mein pal ke pal thahra
magar bahut der ho chuki thi
tanawar darakht ek bar badi zor se kanpa
aur ek taraf jhukta chala gaya
us ki apni ghaflat ne
dimak ki tarah
us ke wajud ko khokhla kar diya tha
khat badhai ki dastak bhi dam tod chuki thi
aur fakhta
gire hue shajar ke upar
musalsal chakkar kat rahi thi

der-sawer to waise bhi ho jati hai

chandni-raaton ke rasiya
us raat bhi us ki rahen
dekh rahe the
mad-hoshi mein nach rahe the
waqt ki maddham hoti lau se
thande hote jismon ko ab
senk rahe the
chand us raat bhi kafi der se nikla tha
pichhli kuchh raaton se aksar
chand ko der ho jati thi
chand ka rasta takte takte
chand se chehre wali bachchi
rote rote so jati thi
chand ko bhi ehsas tha us ka
der-sawer to waise bhi ho jati hai
koi sabab to hota hoga
lekin apni dhun mein raqsan
logon ne kab socha hoga
aur kisi ne is bare mein socha hoga
to us ne is pagal-pan par
hans kar
kak udaya hoga
taza paig uthaya hoga
der-sawer to waise bhi ho jati hai
lekin chand ko
aur kahin se bhi to ho kar aana tha
kuchh raaton se
sat samundar-par jazire ke tile par baithi
tanha ek masum si ladki
der talak bas us ko takti rahti hai
takte takte ro deti hai
jaane kaisa rog laga baithi hai
chand ab roz hi is basti se guzra karta
us ko takta rahta
lekin aakhir kab tak
us ko aur bhi aage jaana hota tha
us ka rasta dekhne walon mein
wo bachchi bhi to shamil thi
jo rote rote so jati thi
aur wo sab jo chandni-raaton ke rasiya the
un ke chehre bhi jaane-pahchane the
chandni-raaton ke rasiya
us raat bhi
us ka rasta dekh rahe the
lekin chand ko us ladki ki basti bhi to jaana tha
wo ladki jo chand ke andar apne hi mahbub ka chehra takti hai
chand ko lekin kuchh raaton se wo ladki ab apni apni lagti hai
der-sawer to waise bhi ho jati hai