nibhegi kis tarah dil sochta hai

By

nibhegi kis tarah dil sochta hai
ajab ladki hai jab dekho khafa hai
ba-zahir hai use bhi pyar waise
dilon ke bhed se waqif khuda hai
ye tanhai ka kala sard patthar
isi se umr-bhar sar phodna hai
magar ek baat donon jaante hain
na kuchh us ne na kuchh hum ne kaha hai
nahin mumkin agar sath umr-bhar ka
ye pal-do-pal ka milna kya bura hai
ghane jangal mein jaise sham utre
koi yun 'jafari' yaad aa raha hai

lafzon ka saeban bana lene dijiye

By

lafzon ka saeban bana lene dijiye
sayon ko taq-e-dil mein saja lene dijiye
gahre samundaron ki tahen mat khangaliye
dil ko khuli hawa ka maza lene dijiye
sochega zehan sare masail ke hal magar
pahle badan ki aag bujha lene dijiye
kab tak misal-e-dasht sahen mausamon ka jabr
khwabon ka koi shahr basa lene dijiye
yaadon ke khet sukh chale ab to 'jafari'
taza ghamon ki fasl uga lene dijiye

kaisa makan saya-e-diwar bhi nahin

By

kaisa makan saya-e-diwar bhi nahin
jite hain zindagi se magar pyar bhi nahin
uthti nahin hai hum pe koi mehrban nigah
kahne ko shahr mahfil-e-aghyar bhi nahin
guzri hai yun to dasht mein tanhaiyon ke umr
dil be-niyaz-e-kucha-o-bazar bhi nahin
ruk ruk ke chal rahe hain ki manzil nahin koi
har kucha warna kucha-e-dildar bhi nahin
aage badhaiye to qadam aap 'jafari'
duniya ab aisi wadi-e-pur-khar bhi nahin