tumhein KHabar bhi hai ye tumne kis se kya manga

By

tumhein khabar bhi hai ye tum ne kis se kya manga
bhanwar mein dubne walon se aasra manga
sune jo mere azaem to aazmane ko
hawa se barq ne ghar ka mere pata manga
khud apni rah banata gaya pahadon mein
kabhi kahan kisi dariya ne rasta manga
jo aap apne andheron se bad-hawas hui
shab-e-siyah ne ghabra ke ek diya manga
kahin bhi ho koi neki barae neki ho
wahin pe ho gai zaea agar sila manga
khuda ki den ke mohtaj-e-bandagan-e-khuda
ye kya ki mangne walon se ja-ba-ja manga
hamein jo ishq mein hona tha surkh-ru 'ejaz'
to hum ne jaan-e-hazin qalb-e-mubtala manga

tir jaise kaman se nikla

By

tir jaise kaman se nikla
harf-e-haq tha zaban se nikla
qaid-e-hasti se chhutne wala
waqt ke imtihan se nikla
tik na paya hawa ke jhonkon mein
par shikasta udan se nikla
sher aaya kachhaar se bahar
aur shoala machan se nikla
gham wo kanta ki aakhiri dam tak
dil ko chhoda na jaan se nikla
jab ajal jhankti phiri ghar ghar
kaun zinda makan se nikla
zulmaton ka safir tha kya tha
saya ek saeban se nikla
maslahat rokti rahi 'ejaz'
tha jo dil mein zaban se nikla

thakan ghaalib hai dam TuTe hue hain

By

thakan ghaalib hai dam tute hue hain
safar jari qadam tute hue hain
ba-zahir to hain salim jism-o-jaan se
magar andar se hum tute hue hain
adhure hain yahan sare ke sare
sabhi to besh-o-kam tute hue hain
bura ho e'timad-e-bahami ka
ki sab qaul-o-qasam tute hue hain
talluq tutne ko hai jahan se
chalo ki band-e-gham tute hue hain
khuda ka ghar na bakhsha zalimon ne
kai dair-o-haram tute hue hain
unhen munsif nahin qatil kaho tum
ki sab un ke qalam tute hue hain

koi hamrah nahin rah ki mushkil ke siwa

By

koi hamrah nahin rah ki mushkil ke siwa
hasil-e-umr bhi kya hai gham-e-hasil ke siwa
ek sannata musallat tha guzargahon par
zindagi thi bhi kahan kucha-e-qatil ke siwa
har qadam hadse har gam marahil the yahan
apne qadmon mein har ek shai rahi manzil ke siwa
tha misali jo zamane mein samundar ka sukut
kaun tufan uthata raha sahil ke siwa
apne markaz se har ek chiz gurezan nikli
laila har bazm mein thi khalwat-e-mahmil ke siwa
apni rahon mein to khud boe hain kante us ne
dushman-e-dil ki nahin aur koi dil ke siwa
apni taqdir tha barbaad-e-mohabbat hona
mahfilen aur bhi thin aap ki mahfil ke siwa

KHwahishen apni sarabon mein na rakkhe koi

By

khwahishen apni sarabon mein na rakkhe koi
in hawaon ko hababon mein na rakkhe koi
chand lamhon ka ye jina hai ghanimat jaano
zindagi apni azabon mein na rakkhe koi
aaj har fard hai ek hasrat-e-tabir liye
ab khayalat ko khwabon mein na rakkhe koi
kaam tahqiq ke unwan pe badhega kaise
gar sawalon ko jawabon mein na rakkhe koi
ye bhi kya zid hai ki kanton ko mahakne dije
yani khushbu ko gulabon mein na rakkhe koi
nekiyan kitni hain 'ejaz' hisar-e-dil mein
khubiyan hon to kharabon mein na rakkhe koi

junun mein der se KHud ko pukarta hun main

By

junun mein der se khud ko pukarta hun main
jo gham hai daman-e-sahra mein wo sada hun main
badal gaya hai zamana badal gaya hun main
ab apni samt bhi hairat se dekhta hun main
hayat ek saza hai bhagat raha hun main
dar-e-qubul se lauti hui dua hun main
jise khud aap hi apne pe pyar aa jae
jafa ke daur mein wo laghzish-e-wafa hun main
jamal-e-yar ki ranaiyan maaz-allah
nigah ban ke nazaron mein kho gaya hun main
bas ek jumbish-e-lab tak wajud hai jis ka
zaban-e-shauq pe wo harf-e-muddaa hun main
agar hai jurm mohabbat to phir takalluf kya
madar-e-jurm hun taqsir hun khata hun main
rafaqaton ke ye fanus ta-ba-kai 'ejaz'
hawa ki zad pe larazta hua diya hun main