samajhte hain jo apne bap ki jagir miTTi ko

samajhte hain jo apne bap ki jagir mitti ko
banaunga main un ke panw ki zanjir mitti ko
hawa sath-e-zamin par ab khat-e-gulzar khinchegi
ki khush aati nahin hai abr ki tahrir mitti ko
siyah pad jaegi zarron ki rangat ek hi pal mein
agar qismat se mil jae meri taqdir mitti ko
jalali aaina ek aasman par mehr-e-taban hai
banaya hai zamin par sabr ki taswir mitti ko
bajae khak udte hain sitare meri aankhon mein
ki ho jati hai aise kaam mein takhir mitti ko
use mismar karne mein koi mushkil nahin hogi
pasand aai hai shahr-e-khwab ki tamir mitti ko
bahut raunda gaya hai khak ko aur khak-zadon ko
ata ki jaegi ab ghaib se tauqir mitti ko
kamal apna dikhaega tilismi aaina 'sajid'
ki ab darkar hai ek khwab ki tabir mitti ko

nahin ab rok paegi fasil-e-shahr pani ko

nahin ab rok paegi fasil-e-shahr pani ko
bahae ja rahi hai raushni ki lahr pani ko
mujhe bhi surkh karti hai ye mashal meri aankhon ki
ki jaise sabz karta hai ziya ka zahr pani ko
kisi be-nam sayyare pe ab bhi abr chhaya hai
tarasta hai kai din se agarche dahr pani ko
bahut itra rahi hai mauj-e-sahra apne hone par
rawan rakhti ho jaise aaj bhi ye nahr pani ko
nikalna chahta hai qaid se jaise mashiyyat ki
pasand aaya nahin hai aasmani qahr pani ko
use wo rakh karne ke liye tayyar hai 'sajid'
muqayyad hi na rakkhega faqat ye shahr pani ko

nahin aasan kisi ke waste taKHmina mera

nahin aasan kisi ke waste takhmina mera
muqarrar hai dayar-e-ghaib se rozina mera
dam-e-rukhsat agar main hausle se kaam leta
palat kar dekh sakta tha use aaina mera
hadaf ban paengi aankhen na mere dushmanon ki
muqabil hai khadang-e-khwab ke ab sina mera
pada rahta hun kunj-e-afiyat mein sar chhupa kar
guzar jata hai yun hi sabt aur aadina mera
budhapa chha raha hai mere har jazbe pe lekin
jawan hota chala jata hai phir bhi kina mera
badal sakta tha mere shahr ka aahang 'sajid'
agar tartib pa sakta kabhi sazina mera

laraz jata hai thoDi der ko tar-e-nafas mera

laraz jata hai thodi der ko tar-e-nafas mera
sar-e-maidan kabhi jab jast karta hai faras mera
main khud se dur ho jata hun us se dur hone par
rihai chahta hun aur muqaddar hai qafas mera
zara mushkil se ab pahchanta hun in manazir ko
qayam us khak-dan par tha abhi pichhle baras mera
dua karta hun milne ki tamanna kar nahin pata
bhala kya samna kar paenge ahl-e-hawas mera
nahin bhulegi meri dastan-e-ishq-e-duniya ko
ki sahra mein abhi tak nam leti hai jaras mera
numud-e-aks ki is ko zamanat kaun de 'sajid'
nahin hai jab shaguft-e-aina par koi bas mera

hudud-e-qarya-e-wahm-o-guman mein koi nahin

hudud-e-qarya-e-wahm-o-guman mein koi nahin
mere alawa mere karwan mein koi nahin
charagh jalte hain kyun raat-bhar mere dil mein
bahut dinon se agar is makan mein koi nahin
hai meri fath-o-hazimat ka kyun asar us par
sharik agar mere sud-o-ziyan mein koi nahin
thahar sake jo mere samne ghadi-do-ghadi
wo shahsawar saf-e-dushmanan mein koi nahin
bhatak raha hun hujum-e-nujum mein tanha
ki mujh sa aur kisi kahkashan mein koi nahin
ajib ek masarrat se aashna hain wo
asir-e-gham tere aashuftagan mein koi nahin
mili ho jis ko wirasat mein umr-bhar 'sajid'
wo khush-nasib kisi khak-dan mein koi nahin

hua raushan dam-e-KHurshid se phir rang pani ka

hua raushan dam-e-khurshid se phir rang pani ka
damak uttha hai mere aaine par zang pani ka
muqayyad rang khilte hon kisi billor se jaise
khula is tarah mere khwab par arzang pani ka
kisi anjaan khushbu se tabiat sair hai us ki
agarche qafiya kuchh rose se hai tang pani ka
satata hai jo dasht-e-na-muradi ke asiron ko
wo tara us hasin ke samne hai dang pani ka
bahut hi yaad aata hai koi bachhda hua mujh ko
kabhi jab samna karta hun shokh-o-shang pani ka
abhi fursat nahin hai kar-e-duniya mein ulajhne ki
magar tabdil kar sakta hun main bhi dhang pani ka
bahut din se main 'sajid' darmiyan hun apne pyaron ke
ki thanda pad chuka hai ab mahaz-e-jang pani ka