yun wo zulmat se raha dast-o-gareban yaro

By

yun wo zulmat se raha dast-o-gareban yaro
us se larzan the bahut shab ke nigahban yaro
us ne har-gam diya hausla-e-taza hamein
wo na ek pal bhi raha hum se gurezan yaro
us ne mani na kabhi tirgi-e-shab se shikast
dil andheron mein raha us ka farozan yaro
us ko har haal mein jine ki ada aati thi
wo na haalat se hota tha pareshan yaro
us ne baatil se na ta-zist kiya samjhauta
dahr mein us sa kahan sahab-e-iman yaro
us ko thi kashmakash-e-dair-o-haram se nafrat
us sa hindu na koi us sa musalman yaro
us ne sulatani-e-jamhur ke naghme likkhe
ruh shahon ki rahi us se pareshan yaro
apne ashaar ki shamon se ujala kar ke
kar gaya shab ka safar kitna wo aasan yaro
us ke giton se zamane ko sanwaren yaro
ruh-e-'sahir' ko agar karna hai shadan yaro

usne jab hans ke namaskar kiya

By

us ne jab hans ke namaskar kiya
mujh ko insan se autar kiya
dasht-e-ghurbat mein dil-e-viran ne
yaad jamuna ko kai bar kiya
pyar ki baat na puchho yaro
hum ne kis kis se nahin pyar kiya
kitni khwabida tamannaon ko
us ki aawaz ne bedar kiya
hum pujari hain buton ke 'jalib'
hum ne kabe mein bhi iqrar kiya

us raunat se wo jite hain ki marna hi nahin

By

us raunat se wo jite hain ki marna hi nahin
takht par baithe hain yun jaise utarna hi nahin
yun mah-o-anjum ki wadi mein ude phirte hain wo
khak ke zarron pe jaise panw dharna hi nahin
un ka dawa hai ki suraj bhi unhi ka hai ghulam
shab jo hum par aai hai us ko guzarna hi nahin
kya ilaj us ka agar ho muddaa un ka yahi
ehtimam rang-o-bu gulshan mein karna hi nahin
zulm se hain barsar-e-paikar aazadi-pasand
un pahadon mein jahan par koi jharna hi nahin
dil bhi un ke hain siyah khurak-e-zindan ki tarah
un se apna gham bayan ab hum ko karna hi nahin
intiha kar len sitam ki log abhi hain khwab mein
jag utthe jab log to un ko thaharna hi nahin

tu rang hai ghubar hain teri gali ke log

By

tu rang hai ghubar hain teri gali ke log
to phul hai sharar hain teri gali ke log
to raunaq-e-hayat hai to husn-e-kaenat
ujda hua dayar hain teri gali ke log
tu paikar-e-wafa hai mujassam khulus hai
badnam-e-rozgar hain teri gali ke log
raushan tere jamal se hain mehr-o-mah bhi
lekin nazar pe bar hain teri gali ke log
dekho jo ghaur se to zamin se bhi past hain
yun aasman-shikar hain teri gali ke log
phir ja raha hun tere tabassum ko lut kar
har-chand hoshiyar hain teri gali ke log
kho jaenge sahar ke ujalon mein aakhirash
shama sar-e-mazar hain teri gali ke log

shahr viran udas hain galiyan

By

shahr viran udas hain galiyan
rahguzaron se uth raha hai dhuan
aatish-e-gham mein jal rahe hain dayar
gard-alud hai rukh-e-dauran
bastiyon par ghamon ki yurish hai
qarya qarya hai waqf-e-ah-o-fughan
subh be-nur sham be-maya
lut gai daulat-e-nigah kahan
phir rahe hain tuyur aawara
barq har shakh par hai shoala-fishan
meri tanhaiyon pe surat-e-shama
ro raha hai alam-nasib saman
mere shanon se teri zulfon tak
fasla umr ka hai meri jaan