mil jae mai to sajda-e-shukrana chahiye

mil jae mai to sajda-e-shukrana chahiye
pite hi ek laghzish-e-mastana chahiye
han ehtiram-e-kaba-o-but-khana chahiye
mazhab ki pochhiye to judagana chahiye
rindan-e-mai-parast siya-mast hi sahi
ai shaikh guftugu to sharifana chahiye
diwangi hai aql nahin hai ki kham ho
diwana har lihaz se diwana chahiye
is zindagi ko chahiye saman-e-zindagi
kuchh bhi na ho to shisha-o-paimana chahiye
o nang-e-eatibar dua par na rakh madar
o bewaquf himmat-e-mardana chahiye
rahne de jam-e-jam mujhe anjam-e-jam suna
khul jae jis se aankh wo afsana chahiye

aa hi gaya wo mujhko lahad mein utarne

aa hi gaya wo mujh ko lahad mein utarne
ghaflat zara na ki mere ghaflat-shiar ne
o be-nasib din ke tasawwur se khush na ho
chola badal liya hai shab-e-intizar ne
ab tak asir-e-dam-e-fareb-e-hayat hun
mujh ko bhula diya mere parwardigar ne
nauhagaron ko bhi hai gala baithne ki fikr
jata hun aap apni ajal ko pukarne
dekha na karobar-e-mohabbat kabhi 'hafiz'
fursat ka waqt hi na diya karobar ne