koi dud se ban jata hai wajud

By

aadhi raat ko phone baja
aur ubhri ek an-jaani maghlub sada
apni chikh ki dahshat se
abhi abhi wo jagi hai malum hua
baizawi chehra
be-surat
sar par mude-tude do sing
aur sine ke wast mein ek
panj-koni aankh
aankh ki putli mein mera hi aks muqayyad
aatish-fishan pahad ki gahrai se ubhar kar
khuni panje
bhench bhench kar
khurdure lahje mein wo chikha
apni marzi ki to subh bistar par
jism nahin
makdi ka jala paogi
mera hukm hai aa jao
aur barahna hote hi
mujh ko chhu kar
mere jaisi ban jao
aa jao
aa jao
aa jao

din ko na ghar se jaiye lagta hai Dar mujhe

By

din ko na ghar se jaiye lagta hai dar mujhe
is para-e-sahab ko suraj na dekh le
us hath ki mahak se mere hath shal hue
us qurb se mile mujhe sadiyon ke fasle
meri lawen bujha na sakin tez aandhiyan
jhonkon ki naram dhaar se kohsar kat gae
apni sada ko rok lo kya is se faeda
dhalwan par bhala kabhi patthar thahar sake
'hamid' ajab ada se kiya khun ne safar
palkon ko surkh kar gae panw ke aable

dekhne wale ko bahar se guman hota nahin

By

dekhne wale ko bahar se guman hota nahin
aag kuchh aise lagai hai dhuan hota nahin
apne hone ki khabar deta hai khushbu se mujhe
phailta hai chaar-su aur darmiyan hota nahin
raushni kar de tamasha-gah se dahshat mite
kohr itna hai ki pas-e-manzar ayan hota nahin
sochna chaho to zer-e-pa mile haft-asman
dekhna chaho to zine ka nishan hota nahin
muntazir rahne se 'hamid' qufl ko zarben laga
aap hi khul jae dar aisa yahan hota nahin

bhul ja mat rah kisi ki yaad mein khoya hua

By

bhul ja mat rah kisi ki yaad mein khoya hua
is andhere ghaar mein kuchh bhi nahin rakkha hua
raushni mil jae to matlab ibarat ka samajh
hai kitab-e-khak mein kalak se kuchh likkha hua
chhu ke jab dekha mujhe behad pashemani hui
wahm ka paikar tha mere samne baitha hua
is makan mein der se shayad koi rahta nahin
dar khule dalan sara kai mein duba hua
jagta hai phir bhi aankhon mein hai manzar nind ka
khwab ki surat hun us ke har taraf phaila hua
sab ke sab 'hamid' yahan gum-sum hain apne-ap mein
hun khilaunon se saje bazar mein aaya hua