KHalwat-e-jaan mein tera dard basana chahe

By

khalwat-e-jaan mein tera dard basana chahe
dil samundar mein bhi diwar uthana chahe
parda-dari ye mohabbat ko nibhana chahe
dil mein chhup kar wo kahan samne aana chahe
us ke daman pe bikhar jae sitaron ki tarah
khamushi haal agar apna suna chahe
us se kya koi kare aag bujhane ka sawal
wo to jazbaat mein bas aag lagana chahe
husn barham ki manane ko hai sadiyan darkar
rose ek tark-e-talluq ka bahana chahe
ishq ko farsh bhi kanton ka gawara hai magar
husn har haal mein ek aaina-khana chahe
ban gaya meri mohabbat ka harif ai 'akhgar'
main jise chahun usi ko ye zamana chahe

wo dil mein aur qarib-e-rag-e-gulu bhi mile

By

wo dil mein aur qarib-e-rag-e-gulu bhi mile
zara sa lutf magar hum se ru-ba-ru bhi mile
jo koi waqif-e-adab-e-rang-o-bu bhi mile
to ashk-e-khun mein bu-e-zakhm-e-arzu bhi mile
hazar zakhm ko kya be-shumar zakhm lage
usi ke sath magar fursat-e-rafu bhi mile
ye but-kada na sahi phir bhi mai-kada to nahin
yahan to hum ko kai rind be-wuzu bhi mile
hamein to aarzu-e-izn-e-haziri hai bahut
zahe-nasib agar izn-e-guftugu bhi mile
wo is ko kaise khamoshi qarar de aakhir
mere sukut mein jab jurm-e-guftugu bhi mile
mile jahan bhi payam-e-hayat-e-nau mujh ko
maza to jab hai wahin mere yar tu bhi mile
wo ek aap hi apni misal hai 'akhgar'
aur aap jaise kai us ko hu-ba-hu bhi mile

itna sukun to gham-e-pinhan mein aa gaya

By

itna sukun to gham-e-pinhan mein aa gaya
aaghosh-e-dil se daman-e-mizhgan mein aa gaya
dil ashk ban ke dida-e-giryan mein aa gaya
khurshid jaise rauzan-e-zindan mein aa gaya
mujh ko to rang-o-bu mein ulajhne se tha gurez
main ne ye kya kiya ki gulistan mein aa gaya
aks-e-jamal-e-yar ba-tadrij-e-zauq-e-did
aankhon se dil mein dil se rag-e-jaan mein aa gaya
phir mere apne aap mein rahne ka kya sawal
jab wo mere harim-e-dil-o-jaan mein aa gaya
marham ka nam le ke na zakhmon ko chhediye
marham bhala kahan se namak-dan mein aa gaya
wahshat-asar faza hai na diwar-o-dar yahan
be-kar hi main ghar se bayaban mein aa gaya
'akhgar' junun-e-ishq-e-nawardi kidhar gaya
majnun to mere khana-e-viran mein aa gaya