naqsh-e-kuhan sab dil ke miTao

By

naqsh-e-kuhan sab dil ke mitao
phir koi taswir banao
basti basti khun-kharaba
aql ke maro hosh mein aao
patthar ban kar jina kya
phulon ki tahni ban jao
masnui kirdar ke logo
sachchai ke rup dikhao
raat andheri sar par tufan
soch samajh kar qadam badhao
apnon ko tum chhod ke 'rahbar'
kahan chale ye raaz batao

kise hum apna kahen koi gham-gusar nahin

By

kise hum apna kahen koi gham-gusar nahin
hamein jab apne parae pe e'tibar nahin
hum apne daur ki sachchaiyon ko likhte hain
qalam hamara kisi ka to mustaar nahin
jo be-wafa the wahi log pa gae eazaz
meri wafaon ka ab tak kahin shumar nahin
hamare sar pe baras jaenge kahan patthar
tunak-mizaji-e-mausam ka e'tibar nahin
duaen de ke jo bachchon ko shahr bhejenge
ab aise ganw mein koi buzurgwar nahin
hazar muflis-o-nadar main sahi 'rahbar'
khuda ka shukr kisi ka bhi qarz-dar nahin

jo baat haqiqat ho be-KHauf-o-KHatar kahiye

By

jo baat haqiqat ho be-khauf-o-khatar kahiye
main is ka nahin qail shabnam ko guhar kahiye
lafzon ki hararat se ajsam pighal jaen
sanjida zara ho kar ashaar agar kahiye
apnon ne pilae hain zahrab ke ghunt akasr
honton pe jo khushki hai talkhi ka asar kahiye
bazar-e-tasannoa ke jalwon ki numaish ko
tute hue shishon ka adna sa khandar kahiye
jazbaat ka khun kar dun ehsas kuchal dalun
zakhmon se lahu tapke sau bar agar kahiye
takhliq-e-ajussa ya 'hafiz' ki ghazal 'rahbar'
jis se ho baqa fan ki mearaj-e-hunar kahiye