chahat meri chahat hi nahin aap ke nazdik

By

chahat meri chahat hi nahin aap ke nazdik
kuchh meri haqiqat hi nahin aap ke nazdik
kuchh qadr to karte mere izhaar wafa ki
shayad ye mohabbat hi nahin aap ke nazdik
yun ghair se bebak ishaare sar-e-mahfil
kya ye meri zillat hi nahin aap ke nazdik
ushshaq pe kuchh had bhi muqarrar hai sitam ki
ya us ki nihayat hi nahin aap ke nazdik
agli si na raaten hain na ghaten hain na baaten
kya ab main wo 'hasrat' hi nahin aap ke nazdik

but-e-be-dard ka gham monis-e-hijran nikla

By

but-e-be-dard ka gham monis-e-hijran nikla
dard jaana tha jise hum ne wo darman nikla
aankh jab band hui tab khulin aankhen apni
bazm-e-yaran jise samjhe the wo zindan nikla
hasrat-o-yas ka amboh fughan ki kasrat
main teri bazm se kya ba-sar-o-saman nikla
khun ho kar to ye dil aankh se barson tapka
na koi par dil-e-nakaam ka arman nikla
aaina paikar-e-taswir nigah-e-mushtaq
jise dekha teri mahfil mein wo hairan nikla
mujh ko hairat hai hua kya dam-e-rukhsat hamdam
jaan nikli mere pahlu se ki jaanan nikla
khub dozakh ki musibat se bache hum 'hasrat'
is ka darogha wahi yar ka darban nikla

har haal mein raha jo tera aasra mujhe

By

har haal mein raha jo tera aasra mujhe
mayus kar saka na hujum-e-bala mujhe
har naghme ne unhin ki talab ka diya payam
har saz ne unhin ki sunai sada mujhe
har baat mein unhin ki khushi ka raha khayal
har kaam se gharaz hai unhin ki raza mujhe
rahta hun gharq un ke tasawwur mein roz o shab
masti ka pad gaya hai kuchh aisa maza mujhe
rakhiye na mujh pe tark-e-mohabbat ki tohmaten
jis ka khayal tak bhi nahin hai rawa mujhe
kafi hai un ke pa-e-hina-basta ka khayal
hath aai khub soz-e-jigar ki dawa mujhe
kya kahte ho ki aur laga lo kisi se dil
tum sa nazar bhi aae koi dusra mujhe
begana-e-adab kiye deti hai kya karun
us mahw-e-naz ki nigah-e-ashna mujhe
us be-nishan ke milne ki 'hasrat' hui ummid
aab-e-baqa se badh ke hai zahr-e-fana mujhe

hail thi bich mein jo razai tamam shab

By

hail thi bich mein jo razai tamam shab
is gham se hum ko nind na aai tamam shab
ki yas se hawas ne ladai tamam shab
tum ne to khub rah dikhai tamam shab
phir bhi to khatm ho na saki aarzu ki baat
har chand hum ne un ko sunai tamam shab
bebak milte hi jo hue hum to sharm se
aankh us pari ne phir na milai tamam shab
dil khub jaanta hai ki tum kis khayal se
karte rahe adu ki burai tamam shab
phir sham hi se kyun wo chale the chhuda ke hath
dukhti rahi jo un ki kalai tamam shab
'hasrat' se kuchh wo aate hi aise hue khafa
phir ho saki na un se safai tamam shab

ghaTega tere kuche mein waqar aahista aahista

By

ghatega tere kuche mein waqar aahista aahista
badhega aashiqi ka e'tibar aahista aahista
bahut nadim hue aakhir wo mere qatl-e-nahaq par
hui qadr-e-wafa jab aashkar aahista aahista
jila-e-shauq se aaina-e-taswir-e-khatir mein
numayan ho chala ru-e-nigar aahista aahista
mohabbat ki jo phaili hai ye nikhat bagh-e-alam mein
hui hai muntashir khushbu-e-yar aahista aahista
dil o jaan o jigar sabr o khirad jo kuchh hai pas apne
ye sab kar denge hum un par nisar aahista aahista
ajab kuchh haal ho jata hai apna be-qarari se
bajate hain kabhi jab wo sitar aahista aahista
asar kuchh kuchh rahega wasl mein bhi ranj-e-furqat ka
dil-e-muztar ko aaega qarar aahista aahista
na aaenge wo 'hasrat' intizar-e-shauq mein yunhi
guzar jaenge ayyam-e-bahaar aahista aahista

dua mein zikr kyun ho muddaa ka

By

dua mein zikr kyun ho muddaa ka
ki ye shewa nahin ahl-e-raza ka
talab meri bahut kuchh hai magar kya
karam tera hai ek dariya ata ka
kahan tak naz uthae aakhir ai husn
hawas tere mizaj-e-khud sata ka
nahin malum kya ai shah-e-khuban
tujhe kuchh haal apne mubtila ka
baja-e-ism-e-azam aap ka nam
wazifa hai mera subh o masa ka
ghazab ka samna hai aashiqon ko
dayar-e-haq mein afwaj-e-bala ka
nisar un par hue achchhe rahe hum
taqaza tha yahi khu-e-wafa ka
gunahgaro chalo afw-e-ilahi
bahut mushtaq hai arz-e-khata ka
teri mahfil mein ahl-e-dil ko jalwa
nazar aa jaega shan-e-khuda ka
uthaya hai maza dil ne bahut kuchh
mohabbat ke gham-e-rahat-faza ka
jafa ko bhi wafa samjho ki 'hasrat'
tumhein haq un se kya chun-o-chara ka