jaise koi ziddi bachcha kab bahle bahlane se

By

jaise koi ziddi bachcha kab bahle bahlane se
aise hum duniya se chhup kar dekhen khwab suhane se
sab kuchh samjhe lekin itni baat nahin pahchane log
mil jata hai chain kisi ko ek tumhaare aane se
hum to gham ki ek ek shiddat bahar aane se roken
us ki aankhen baz na aain angare barsane se
logo! hum pardesi ho kar jaane kya kya kho baithe
apne kuche bhi lagte hain begane begane se
dekho dost! tumhaara maqsad shayad hamdardi hi ho
mera paikar tut girega wo baaten dohrane se
ghar ka sannata to 'humaira' hangamon ki nazr hua
dil ki virani waisi ki waisi ek zamane se

qayamaten guzar gain riwayaton ki soch mein

By

qayamaten guzar gain riwayaton ki soch mein
khalish jo thi wahi rahi mohabbaton ki soch mein
ye ab khula ki us ki shaeri mein meri baat ka
jo rang khas tha mita izafaton ki soch mein
main apne chehra-e-junun ko aaine mein dekh lun
to aks bujh na jaega haqiqaton ki soch mein
main apni dhup chhanw ki zamanaten na de sakun
to aap kyun jalen-bujhen tamazaton ki soch mein
ajab mazaq us ka tha ki sar se panw tak mujhe
wafaon se bhigo diya nadamaton ki soch mein
gai ruton ne hans ke raston ke zakhm bhar diye
'humaira' aaj kaun tha masafaton ki soch mein

log to ek manzar hain taKHt-nashinon ki KHatir

By

log to ek manzar hain takht-nashinon ki khatir
farsh bichhaya jata hai qalinon ki khatir
kitni be-tartibi phaili kya kuchh tut gaya
saje-sajae ghar the unhi makinon ki khatir
thahar gae hain ain safar mein bin soche-samjhe
ham-safari ke kuchh be-nam qarinon ki khatir
jal bujhte hain log kisi ko faiz pahunchne par
gir jate hain kuchh be-mani zinon ki khatir
hum aur tum jo badal gae to itni hairat kya
aks badalte rahte hain aainon ki khatir
unche dam lage hain humaira kore jazbon ke
sauda bura nahin hai chand mashinon ki khatir